سولاقاي سپورتشىلار جايلى نە بىلەمىز؟

ماسەلەن، الەمدەگى ءاربىر ءجۇز ادامنىڭ بىرەۋى عانا سولاقاي بولىپ تۋىلادى. عالىمدار مۇنداي جانداردان مىقتى سپورتشىلار شىعاتىنىن دا ايتادى. تەك ءبىرقاتار سپورت تۇرلەرىنە سولاقايلارعا قاتىسۋعا بولمايدى. وعان بياتلون سپورتى دالەل.

سولاقاي جاندارمەن سپورتتا سىنعا ءتۇسۋ وڭ قولى نەمەسە اياعىمەن جۇمىس جاسايتىندار ءۇشىن وڭاي ەمەس. ىڭعايسىز قارسىلاس سانالادى. سوندىقتان دا سپورتشىنىڭ باپكەرلەرى شاكىرتتەرىنە سولاقاي سپورتشىلارمەن سىنعا تۇسەر الدىندا ارنايى ءادىس- تاسىلدەر قولدانۋدى ۇيرەتەدى. بۇگىن نازارلارىڭىزعا الەمگە تانىمال سولاقاي سپورتشىلار تۋرالى اقپارات ۇسىناتىن بولامىز.

 فۋتبولدا باپكەرلەر كومانداسىندا ءۇش نەمەسە ءتورت فۋتبولشىنىڭ سولاقاي بولعانىن باستى نازاردا ۇستايدى. قارسىلاسقا ىڭعايسىز بولۋىمەن قاتار، سول قاناتتى مىعىم ۇستاۋعا دا بۇل ويىنشىلاردىڭ ماڭىزى زور. ماسەلەن، ⅩⅩعاسىردىڭ ەڭ ۇزدىك فۋتبولشىسى اتاعىنا تالاسقان «فۋتبول كورولى» پەلە مەن ايگىلى ارگەنتينالىق سۇرمەرگەن ديەگو مارادونا دا سولاقاي بولعان. بۇلاردىڭ قاتارىنا يوحان كرويففتى دا جاتقىزۋعا بولادى. بۇگىنگى ۋەفا پرەزيدەنتى فرانتسۋز ميشەل پلاتيني دە سولاقاي. ال اعىلشىننىڭ ايگىلى فۋتبولشىسى بوببي چارلتون دا سول اياعىمەن دوپتى تاماشا ۇستاي ءبىلۋ ارتىقشىلىعىنىڭ ارقاسىندا قارسىلاستارىن تالاي رەت سان سوقتىرعان. رۋد گۋلليت پەن ماركو ۆان باستەن، كەزىندە كەڭەس وداعى قۇراماسىنىڭ نامىسىن قورعاعان ولەگ بلوحين مەن ۆالەريي لوبانوۆسكيي دە سولاقاي بولعان. ال بۇگىنگى كۇننىڭ سولاقاي فۋتبولشىلارى كىمدەر دەگەندە، ەڭ ءبىرىنشى ليونەل مەسسي ويعا ورالادى. ارگەنتينا مەن كاتالوندىق «بارسەلونا» كومانداسىنىڭ سۇرمەرگەنى قاقپا الدىندا سول اياعىنا ىڭعايلى كەلگەن دوپتى قۇر جىبەرمەيتىنىن قالىڭ جۇرتشىلىق جاقسى بىلەدى. بۇگىندە مەسسيدەن دە وزگە كومانداسىن العا سۇيرەپ جۇرگەن سولاقاي فۋتبولشىلار بار. ەندى سولاردى تىزە وتىرايىق.

لۋكاس پودولسكي

ارەن روببەن

 مەسۋت وزيل

 حۋان ماتا

 داۆيد سيلۆا

 پەتر چەح

 روبين ۆان پەرسي

 لەيتون بەينس

 ەل فۋتبولىندا دا سولاقاي فۋتبولشىلار جەتەرلىك. سولاردىڭ ءبىرى، پرەمەر- ليگا تاريحىندا ەڭ كوپ گول سوققان قوستانايلىق «توبىل» كومانداسىنىڭ ويىنشىسى نۇربول جۇماسقاليەۆ. كوماندالاستارى جۇما (جۋما) دەپ اتايتىن جەرلەسىمىز ۇلتتىق قۇراما ساپىندا دا ءساتتى ونەر كورسەتتى.

ەل كلۋبتارى قاتارىندا ەۋروكۋبوك دودالارىندا ەڭ كوپ ونەر كورسەتكەن فۋتبولشىلاردىڭ ءبىرى - مارات حايرۋللين. بۇل فۋتبولشى دا سول اياعىمەن دوپتى تاماشا ۇستايتىن فۋتبولشىلاردىڭ ءبىرى.

وڭقايلار ءۇشىن، اسىرەسە، بوكس، ۇلكەن تەننيس جانە سەمسەرلەسۋ سپورتتارىندا سولاقايلارمەن ءتۇسىپ قالۋ قيىنداۋ. باتىرعا وڭ تەرىسىنىڭ ايىرماشىلىعى جوق بولعان كۇننىڭ وزىندە، قارسىلاستىڭ سولاقاي بولۋى ايتارلىقتاي قيىندىق تۋدىرا الادى.

سولاقاي بوكسشىلار وڭقاي بوكسشىلارعا قارسى قاراما- قارسى جانە ىڭعايسىز قالىپتا تۇرىپ (ستويكا) جۇدىرىقتاسادى. ولاردىڭ باستى قارۋى دا - سول جاق دەنە بولىگىنەن سوققى بەرۋ. ول ساتتە وڭقاي بوكسشى قورعانىستى كوبىرەك ويلايتىن بولسا، ەسە جىبەرۋى بەك مۇمكىن. بوكستا دا تانىمال سولاقاي ساڭلاقتار جەتەرلىك. سولاردىڭ ءبىرى - 1996 - جىلى ا ق ش- تا اتلانتا جازعى وليمپيادا ويىندارىندا توپ جارعان جەرلەسىمىز ۆاسيلي جيروۆ.

اراعا ءبىر جىل سالا كاسىپقوي بوكسقا اۋىسقان «جولبارىس» 42 كەزدەسۋ وتكىزىپ، ونىڭ 38 ىندە جەڭىسكە جەتتى. بىرەۋىن تەڭ اياقتاسا، 3 جەكپە- جەكتە جەڭىلىس تاپقان. سوڭعى كەزدەسۋىن 2009 -جىلى وتكىزگەن وتانداسىمىز قازىرگى تاڭدا ا ق ش- تىڭ اريزونا شتاتىندا تۇرادى.

2012 - جىلى لوندون وليپياداسىندا توپ جارعان جەرلەسىمىز سەرىك ساپيەۆ تە سول قولىمەن ونەر كورسەتەدى.

سولاقاي تانىمال بوكسشىلاردىڭ ءبىرى - وڭتۇستىك امەريكالىق كورري ساندەرس. 2003 - جىلى WBO جۇيەسى بويىنشا الەم چەمپيونى ءۇشىن وتكەن جۇدىرىقتاسۋدا ۋكراينالىق ۆلاديمير كليچكونى نوكاۋتقا جىبەرگەن بولاتىن. الايدا، اراعا ءبىر جىل سالا ءىنىسى ۆيتالي اعاسىنىڭ ەسەسىن قايتارعان- دى.

كاسىپقوي بوكستا تانىمال وزبەك رۋسلان چاگايەۆ تا سول قولىمەن جۇدىرىقتاسادى.

فيليپپيندىك مەنني پاكياو دا سولاقاي. 35 جاستاعى بوكسشى 1995 - جىلدان بەرى كاسىپقوي بوكستا باعىن سىناپ كەلەدى. از كولەمدەگى اقشا ءۇشىن جەكپە- جەككە شىقپايتىن بوكسشىلاردىڭ ءبىرى.

بوكستاعىداي ۇلكەن تەننيستە دە سولاقاي قارسىلاستار ىڭعايسىز سانالادى. ويتكەنى، ولار كوبىنە قارسىلاستىڭ ءالسىز تۇستارىنا قاراي سوققى جاسايدى. بۇگىنگىنىڭ ەڭ تانىمال سولاقاي تەننيسشىسى ول - رافاەل نادال. ال شىن مانىندە، يسپاندىق تەننيسشى وڭقاي. كەرىسىنشە، ومىردە سولاقاي، ال كورتتاعى ويىندا وڭقاي بولىپ ونەر كورسەتەتىن تەننيسشىلەر دە بار. ولاردىڭ قاتارىنا داتە كيميكو مەن ماريا شاراپوۆا ەنەدى. دەسە دە رەسەيلىك تەننيسشى وڭتايلى ساتىندە ەكى قولمەن دە ونەر كورسەتە الادى.

تانىمال سولاقاي تەننيسشىلەردىڭ ءبىرى - مارتينا ناۆراتيلوۆا. 2006 -جىلى سپورتتاعى مانسابىن اياقتاعان راكەتكا ەڭ كوپ جەتىستىك شىڭىن باعىندىرعان. ول 167 جەكەلەي تۋرنيرلەردە توپ جارسا، 177 جارىستا جۇپتىق ونەر كورسەتۋمەن جەڭىمپاز اتانعان.

وزگە سپورت تۇرلەرىندە دە تانىمال سولاقاي سپورتشىلار بار.

لەبرون دجەيمس، باسكەتبول

كارولينا كوستنەر، مانەرلەپ سىرعاناۋ

وتكەن عاسىرلاردا كەي قوعامدا سولاقايلار قاۋىمىنا دەگەن تەرىس كوزقاراستار قالىپتاسقان. ءبىر كەزدەرى ولارعا سوتتا كۋاگەرلىك ەتۋگە دە تىيىم سالعان كورىنەدى. ولاردى ءازازىل دەپ ايىپتاعان. پسيحولوگ ماماندار سولاقايلار ەرەكشە كۇشتى مىنەز بەن قارىمدى شىعارماشىلىق پوتەنتسيالعا يە دەپ سانايدى. ال زەرتتەۋ جۇرگىزگەن عالىمدار سولاقايلاردى سپورتقا تەز بەيىمدەلىپ، مەڭگەرىپ كەتە الاتىن جاندار دەپ باعالادى.

 دايىنداعان: ومىربەك سانسىزباي

massaget.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى