اقتوبەدە ءتىرى ادامدارعا دا مولا سالىنىپ جاتىر

بۇرىن قاريالار قايتىس بولعاننان كەيىن مولاسىنىڭ جانىنان جارىنا ورىن قالدىرىلاتىن.

ەندى جاستار دا جاعالاسىپ، ماڭگى جانتاياتىن جەرىن الدىن الا دايىنداپ جاتىر.

جەرگىلىكتى يمامدار مۇنى حالىق اراسىنداعى باسەكەگە بالاپ، شاريعاتقا قارسى كەلەتىن شارا دەگەندى ايتۋدا.

اقتوبەنىڭ ىرگەسىندەگى قورىمدا ءبىر ادامدى جەرلەيتىن ورىن ون مىڭ تەڭگە تۇرادى. سوڭعى كەزدەرى قالتالى ازاماتتار جەر ساتىپ الىپ، ءتىرى ادامعا الدىن الا زيرات سالاتىن بولعان. مىسالى، ءمارمار تاسپەن قورشالعان بوس مولا ءبىر وتباسىعا ارنالىپتى. وسى جەردىڭ كۇزەتشىسى ادامداردىڭ ءومىر سۇرۋگە ەمەس، ولىمگە اسىعاتىنىنا قايران قالىپ وتىر.

وڭعارباي قايۋپوۆ، قورىم كۇزەتشىسى:

- بوس مولاعا قاراعاندا قورقىنىش بولادى. بوس مولاعا قاراساڭىز، قورقاسىز. بىلمەيمىن، ەندى ادامنىڭ پەيىلى سولاي بولىپ كەتكەن. بۇرىن اتا-بابامىزدىڭ داستۇرىمەن ءجۇرىپ كەلدىك. ءبىر مولانى ارتىندا ادامى قالماعان ادامدارعا عانا دايىنداعان.

يمامدار مۇسىلمان ءۇشىن ولىمنەن بۇرىن مولاسىن سالۋ شاريعاتقا قايشى كەلەتىنىن ايتادى. تەك جاسى كەلىپ، ساناۋلى كۇنى قالعان قاريالارعا عانا جارىنىڭ جاتقان جەرىنەن ورىن قالدىرۋعا رۇقسات بەرىلەدى. دەسە دە، سامايىن اق شالماعان جاستاردىڭ بۇل قىلىعىن مولدالار باسەكەگە بالاپ وتىر.

ءابدىمۇتالى داۋرەنبەكوۆ، ق م د ب اقتوبە وبلىسى بويىنشا وكىل يمامى:

- جالپى شاريعاتقا جەر الىپ قويۋ نەمەسە جەردى بەلگىلەپ قويۋ ساي كەلمەيدى. كەز كەلگەن مۇسىلماننىڭ ءبىر عانا ارمانى بولۋ كەرەك. ەگەر مەن كوز جۇما قالسام، مۇسىلمانداردىڭ جانىنا جەرلەنسەم دەگەن. ودان باسقا مىندەت مۇسىلمان بالاسىنا، جالپى ادامزات بالاسىنا مىندەتتەلمەيدى.

سونداي-اق يمامدار جەرلەۋ ءراسىمىنىڭ دە كەلەڭسىز جاقتارى قاپتاپ كەتكەندىگىن ايتادى. ساداقانىڭ ءوزى تويعا اينالىپ، جوقتاۋ ايتاتىن ادامدى جالدايتىن بولعان. سوندىقتان مازار سالۋ مەن ساداقانى وتكىزۋ جورالعىلارىن رەتتەۋ كەرەك دەيدى ءدىن وكىلدەرى.

24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى