پاۆلوداردا العاش رەت ەرتىس وزەنى كۇنى تويلانادى
بۇل تۋرالى فەستيۆالدى وتكىزۋ باستاماسىن كوتەرگەن «پاۆلودارلىق گەوگرافيا ءۇيى» قوعامدىق بىرلەستىگىنىڭ كوشباسشىسى الەكساندر ۆەرۆەكين حابارلادى.
مەرەكەنى تويلاۋ 6 - قىركۇيەكتە ايتىم اۋىلىنىڭ ماڭىنداعى وزەن جاعالاۋىندا باستالادى. بۇل جەردە قايىقتار كەرۋەنى سۋعا شىعادى. پاۆلودارعا قايتار جولدا قاتىسۋشىلار وزەن مەن ونىڭ جاعالاۋىن قوقىستان تازارتادى. بۇل كۇنى پاۆلودارداعى اۆتوجول كوپىرىنىڭ ماڭىندا دا سەنبىلىك وتەدى.
7 - قىركۇيەكتە پاۆلوداردىڭ تومەنگى جاعالاۋىندا «ەرتىس كۇنى-2014» فەستيۆالى وتەدى. فەستيۆالعا ارناپ «ەرتىس ءبىزدىڭ ماقتانىشىمىز ءارى ماسەلەمىز» بۋكلەتى شىعارىلادى. وندا ەكولوگتار پاۆلودارلىقتار نەلىكتەن ەرتىس وزەنىن ماقتان تۇتاتىنىن جانە وزەن سۋىنا قانداي قاۋىپ ءتونىپ تۇرعانى جايلى باياندايدى.
ۇيىمداستىرۋشىلاردىڭ ايتۋىنشا، مەرەكە باعدارلاماسىندا ءتۇرلى بايقاۋلار، پاۆلودارلىق بەلگىلى سۋرەتشىلەردىڭ سۋرەتتەرىنىڭ ءباسساۋداسى ت. ب. شارالار وتەدى. فەستيۆال پاۆلودار وبلىستىق جاستار ساياساتى باسقارماسى مەن بالالار جانە جاستار ۇيىمدارىنىڭ قاۋىمداستىعىنىڭ قولداۋىمەن وتەدى.
