قالالىقتار اۋىل مەكتەپتەرىندە ساباق بەرىپ، اۋىل جاستارىنىڭ دۇنيەتانىمىن كەڭەيتۋگە اتسالىسادى
«زياتكەر ۇرپاق» جوباسى اياسىندا نەگىزىنەن قالالىق بىلىمدىلەر، اعارتۋشى مۇعالىمدەر، ءتۇرلى سالانىڭ كوشباسشىلارى ءوز قالاۋلارىمەن اۋىلداعى مەكتەپتەرگە بارىپ، وندا 9-11 سىنىپ وقۋشىلارىنا قىسقا مەرزىمدى كۋرس ساباقتارىن وتپەك.
«كۋرستىڭ ۇزاقتىعىن، تاقىرىبىن وعان قاتىساتىن وعان باراتىن مۇعالىمدەر وزدەرى تاڭدايدى. كۋرس بىرنەشە ساعاتقا، اپتاعا نەمەسە ودان دا ۇزاق مەرزىمگە سوزىلۋى مۇمكىن. كۋرس مەكتەپتىڭ ماتەماتيكا، فيزيكا، اعىلشىن ءتىلى پاندەرىن، سونداي-اق ەركىن تاقىرىپتاردى قامتي الادى. سونىڭ ىشىندە ليدەرلىك جولى، لوگيكانى دامىتۋ، ءى ت- تەحنولوگيا سالالارىن قامتۋ دا جوسپاردا بار»، - دەيدى جوبا جەتەكشىسى، نازاربايەۆ ۋنيۆەرسيتەتى جەر عىلىمدارى ورتالىعىنىڭ ديرەكتورى اسقار مۇنارا.
ونىڭ ايتۋىنشا، قالالىق مۇعالىمدەر مەن جالپى جوباعا قاتىسۋشىلار اۋىلداردى، ەلدى- مەكەندەردى وزدەرى تاڭدايتىن بولادى. «بۇگىنگى كۇنى ەلىمىزدىڭ تانىمال ساياساتكەرلەرى، بلوگەرلەرى، بيزنەسمەندەر مەن ارتىستەر دە وسى جوباعا قاتىسۋعا نيەت ءبىلدىرىپ جاتىر. حالىق اعارتۋشىلارىنان قۇرالاتىن توپ قۇرامىنداعىلار اۋىلداعى جاس ۇرپاقتىڭ دۇنيەتانىم ءورىسىن كەڭەيتۋگە، بولاشاعىن ايقىنداۋعا ءوز ۇلەسىن قوساتىن بولادى»، - دەيدى اسقار مۇنارا.
ال «قازاقستان-2050» جالپى ۇلتتىق قوزعالىسى كەڭەسى ءتوراعاسى دانات ءجۇميننىڭ سوزىنە قاراعاندا، جوبا نەگىزىنەن اۋىل مەكتەپتەرىنىڭ ءبىلىم ساپاسىن ارتتىرۋعا باعىتتالادى. «بۇگىنگى كۇنى قالا مەكتەبى مەن اۋىل مەكتەبىنىڭ ءبىلىم ساپاسىنداعى ايىرماشىلىق بىردەن بايقالادى. وڭىرلەرگە بارعاندا ءدال وسى ماسەلەنى جۇرتشىلىق كوپ كوتەردى. بىلىكتى مۇعالىمدەر اۋىلدا جەتىسپەيدى. ال بۇل مىندەتتى تەك مەملەكەتتىڭ موينىنا ارتىپ قويۋ جارامايدى. ماسەلەن، كەيبىر اۋىلداردا قاراپايىم اعىلشىن ءتىلى ءپانىنىڭ ءمۇعالىمى جەتىسپەيدى، ال ءبىزدىڭ ەرىكتى- مۇعالىمدەر وقۋشىلارعا كۋرس اياسىندا اعىلشىن ءتىلىن مەڭگەرۋدىڭ ەڭ ءتيىمدى تاسىلدەرىمەن بولىسەتىن بولادى. سول سەكىلدى كۋرس اياسىندا اۋىل وقۋشىلارىنا قاجەتتى باعىتتا بەلگىلى ءبىر قۇشتارلىقتى وياتۋعا تىرىسامىز»، - دەيدى ول.
اۆتور: قانات مامەتقازى ۇلى
