كەلىسسوز جۇرگىزۋ تەحنيكاسى

كەلىسسوز مىنا بولىكتەردەن تۇرادى:

تانىسۋ. بايلانىستى قالىپتاستىرۋ؛

قارىم- قاتىناس بارىسىن باقىلاۋ؛

ماسەلەنى تالداۋ؛

ماسەلەنى شەشۋ؛

بايلانىستى ءتامامداۋ.

اقپارات جيناۋ

ساتتىلىك سىرى ەكىنشى ءبىر ادامنىڭ جۇرەگىنە، كوڭىلىنە، باسقاشا ايتقاندا قالتاسىنا جول تابا بىلۋدە جاتىر. ءسىز بەلگىلى ءبىر كومپانيامەن ارىپتەستىك بايلانىس ورناتۋ ءۇشىن كەلىسسوزگە بارساڭىز، ول كومپانيا تۋرالى مۇمكىن بولعان بارلىق دەرەكتى ءبىلىپ بارعانىڭىز ءجون. اتالعان كومپانياعا قاتىستى كەز كەلگەن دەرەك ماڭىزدى بولۋى مۇمكىن. اقپارات جيناۋ «ەكىنشى جاققا شىن مانىندە نە كەرەك؟» دەگەن ماڭىزدى سۇراققا جاۋاپ بەرە الماق. تۇپكىلىكتى ماقسات ايتىلعان سوزبەن سايكەسپەي جاتۋى دا مۇمكىن.

سۇيكىم

ءوزىڭىز تۋرالى جاعىمدى اسەر تۋدىرىڭىز. كۇلىمدەڭىز، باس شۇلعىڭىز، سۇراق قويىپ، مۇقيات تىڭداڭىز. وعان جىلى شىراي تانىتىپ، ءار ءسوزىڭىزدى ويلانىپ ايتىڭىز. ەگەر ادام سىزگە وڭ كوزبەن قاراسا، ءسىزدىڭ مۇددەڭىزگە جەڭىلدىك جاساۋى ابدەن مۇمكىن. ول تۋرالى الدىن الا جەتكىلىكتى اقپارات جيناپ العان سوڭ، ونىڭ قاي باعىتقا ۇمتىلاتىنىن دا شامالاڭىز. ەشقاشان ءبىر جاققا اسىعىپ تۇرعان كەيىپ تانىتپاڭىز. ءسىز بۇل اڭگىمەنى جالعاستىرىپ وتىرا بەرۋگە بارسىز.

ال ەگەر جاقسى كەلىسىمگە كەلۋ مۇمكىن بولماعان جاعدايدا، اشۋىڭىزدى كورسەتپەي، جاي عانا قوشتاسىپ، ورنىڭىزدان تۇرىپ، سۇيكىمىڭىزدى ساقتاپ كەتە بەرىڭىز. ەشقاشان كەلەسى تاراپتىڭ الدىندا اشۋعا بەرىلمەگەن ءجون. شىن مانىندە بۇل كەلىسسوزدە جەڭىس دەگەنىمىز - سىزگە ءتيىمدى شەشىلگەن جايتتار، ال قالعانى، ياعني ولارعا ءتيىمدى شەشىلگەن ماسەلەلەر - جەڭىلىس.

سوندىقتان كەلىسسوزدىڭ الدىندا ءسىز ءۇشىن ناقتى نەنىڭ جەڭىس اكەلەتىنىن ءبىلىپ وتىرعانىڭىز ءجون. قارسى تاراپ سىزگە ءتيىمدى ۇسىنىس جاساعاندا، قۋانىپ تۇرعانىڭىزدى بىلدىرمەڭىز. ەگەر ۇسىنىسقا بىردەن كەلىسىم بەرسەڭىز، ءسىزدى كوندىرۋ وڭاي ەكەنىنە ولاردىڭ كوزى جەتپەك. ءسىزدىڭ سوڭعى ءسوزىڭىز: «ويلانىپ كورەيىن» بولۋى كەرەك.

ناقتىلىق پەن تاجىريبە

ءسوزىڭىز دە، ۇسىنىسىڭىز دا ناقتى بولسىن. قارسى تاراپتىڭ ءالسىز تۇسىن ءبىلىپ الىپ، سوعان باعىتتاپ مۇقيات ارەكەت ەتكەن دۇرىس. كەلىسسوز بارىسىندا ءوزىڭىز ارىپتەستىك بايلانىس ورناتقان كومپانيالاردى اتاپ ءوتىپ تۇرىڭىز. قارسى تاراپ بۇل كومپانيالاردى ءبىرىنشى رەت ەستىپ وتىرسا دا، ءسىزدىڭ تاجىريبەڭىزدىڭ مول ەكەنىن تۇسىنبەك. ال تانىمال، بەدەلدى كومپانيالارمەن بايلانىس ورناتقان بولساڭىز، بۇل قارسى تاراپقا ناتيجەلى اسەر قالدىرماق.

كاسىبيلىك

جۇمىس بارىسىندا ءوز-ءوزىڭىزدى دامىتىپ، جەتىلدىرىپ وتىرۋعا تىرىسىڭىز. ويتكەنى كەز كەلگەن كەلىسسوزدە ءسىزدىڭ كاسىبيلىگىڭىز بەن ءبىلىمىڭىز سىنعا تۇسپەك. قانشالىقتى ءوز ءىسىڭىزدى تەرەڭ بىلسەڭىز، كەز كەلگەن ادام مول ءبىلىمنىڭ الدىندا وسالدىق تانىتادى.

دايىنداعان: مەيىرگۇل وڭعاروۆا

massaget.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى