قىتايدا بالاسىن جۇمىس ىستەتۋ ءۇشىن اتا- اناسى ونى سوتقا بەرگەن
قىتاي وتباسىنداعى بۇل وقيعا جالعىز ۇل - سيننىڭ ۋنيۆەرسيتەتتەگى وقۋىن تاستاپ كەتۋىنەن كەيىن باستالعان، دەپ جازادى Oddity Central. سول كەزدەن بەرى اناسى سيۋي سين ۇلىنىڭ قاس- قاباعىنا قاراپ، تاماعىن ازىرلەپ، كيىمدەرىن جۋىپ وتىرعان.
ال بالاسى بۇل ۋاقىتتا كۇنىمەن ۇيىقتاپ، نوۋتبۋكتا وتىرىپ، ينتەرنەتتە كۇنىن جاي وتكىزگەن. اكەسى كۋ ۇلىنا جۇمىس تاپقان كەزدە سين ول جەردە نەبارى ءۇش ايعا شىداعان.
كوپ ۋاقىت وتپەي 29 جاستاعى قىتايلىق جۇمىسسىز ايەلمەن تانىسىپ، ءبىر ايدان كەيىن ونى ۇيگە الىپ كەلگەن. ۇلىمەن بىرگە، ونىڭ جانىنداعى ايەلدىڭ دە تاماعىن ىستەپ، سوڭىنان كىرىن جۋىپ، بار جاعدايىن جاساۋ كەرەكتىگىن كورگەن اتا-انانىڭ امالى تاۋسىلعان. شاراسى قۇرىعان اتا-انا ۇلدارى سينگە ونىڭ نە جۇمىسقا ورنالاساتىنىن، نە قاسىنداعى قىزبەن ۇيىنەن كەتسىن دەگەن تالاپ قويعان. الايدا ولاردىڭ بۇل سوزىنە نە ۇلى، نە ونىڭ قاسىنداعى قىز قۇلاق اسپاعان. سول كەزدە اتا-اناسى سوتقا شاعىمدانۋعا ءماجبۇر بولعان.
ءىستىڭ ءمانىسىن انىقتاعاننان كەيىن سۋديا شاعىمدانۋشىلاردىڭ پايداسىنا شەشىم شىعاردى. ول ەڭبەككە جارامدى ۇلدىڭ جۇمىس تابۋى كەرەك ەكەنىن حابارلادى.
الايدا جۇمىسسىز جۇپ سوت شەشىمىنە قۇلاق اسپاي، بۇرىنعى ادەتتەرىن تاستاماعان. ءتىپتى سوت شەشىمى شىققاننان كەيىن 60 كۇن وتسە دە، ورىندارىنان قوزعالماعان.
امالى قۇرىعان اتا- انا بالاسى مەن ونىڭ قاسىنداعى قىزدى سوت پريستاۆتارىنىڭ كومەگىمەن ۇيدەن شىعارۋ ءۇشىن قايتادان سوتقا شاعىمدانعان.
وسى وقيعا قىتاي باسىلىمدارىندا كەڭ تارالدى. قازىر وسى سياقتى وقيعالاردىڭ قايتالانۋى قىتايداعى ءبىر بالا ساياساتىنىڭ سالدارى دەپ باعالانىپ وتىر.
