قۇرىلىستان كوش سوڭىندا قالعان ءوڭىر
قارجىنى يگەرۋ، تۇرعىن ۇيلەردى تۇرعىزۋ، ينجەنەرلىك جۇيەلەردى جوندەۋ سياقتى قۇرىلىستىڭ باسقا دا سالالارى بويىنشا ەڭ سوڭعى ورىنعا سىرعىدى.
جاسالعان جۇمىسقا كوڭىلى تولماعان وبلىس اكىمى سالا ماماندارىن سىننىڭ استىنا الدى. قۇرىلىستىڭ سىلبىر جۇرگەنى ازداي، ونىڭ ساپاسىزدىعى دا سان سوقتىرىپ وتىر.
وتكەن جىلى سالىنعان سەلينوگراد اۋدانىنداعى مەكتەپتى بيىل قايتادان كۇردەلى جوندەۋدەن وتكىزۋگە تۋرا كەلىپ تۇر.
جالعا بەرىلەتىن پاتەر قۇرىلىستارىنىڭ قارجىسى نەبارى 50 پايىزعا ورىندالعان. ال جارتى جىل وتسە دە، ءالى كۇنگە تەندەرلەردىڭ تەڭ جارتىسى وتكىزىلگەن جوق. سوراقىسى سول، كەيبىر سمەتالىق قۇجاتتار ءاۋ باستان دۇرىس جاسالماعان.
كوپ قاباتتى ءۇي سالىنىپ، ونىڭ ينجەنەرلىك جۇيەلەرى ەستەن شىعىپ كەتكەن. وسىنداي ولقىلىقتاردى جىپكە تىزگەن سەرگەي كۋلاگين قۇرىلىسشىلاردى ءبىر شيراتىپ الدى. جاۋاپكەرشىلىكپەن جۇمىس ىستەۋگە شاقىردى. ال ىستەرىنە سالعىرت قاراعانداردى كەلەر جولى بايقاۋعا قاتىستىرمايتىنىن ايتتى.
اكىم مەملەكەت سۇراعان قارجىنى ءۇيىپ-توگىپ بەرىپ جاتقاندىعىن، ال ونى قاجەتكە جۇمساي الماي، جۇمىستى اقساتىپ وتىرعاندىقتارىن جەتكىزدى.
سەرگەي كۋلاگين، اقمولا وبلىسىنىڭ اكىمى:
- ءبىز تاعى ەڭ سوڭعى ورىندامىز. ساپالى جۇمىس كورسەتە الماساڭدار، نە ءۇشىن بايقاۋعا قاتىساسىڭدار؟ مەن 15 جىل اكىم بولىپ جۇمىس ىستەيمىن، ءبىراق مەنىڭ تاجىريبەمدە مۇنداي جاعداي ءبىرىنشى رەت بولىپ وتىر. تانىس-تامىر ىزدەپ جۇرەسىڭدەر. مەن ەشقاشان ەشكىمدى تىڭدامايمىن. كىم ساپالى جۇمىس ىستەيدى، سول ۇتىپ الادى. ال جاۋاپسىزداردى بايقاۋعا مۇلدە قاتىستىرمايمىن.
24.kz
