جازۋلاردىڭ قۇپياسى
«مارتەل مىرزا،
قىزىم ەكەۋمىز «ءپيدىڭ ءومىرى» كىتابىن وقىپ بىتىردىك. ەكەۋمىز دە جانۋارلار تۋرالى حيكايانى تاڭدادىق. بۇل كەرەمەت كىتاپ - جاراتقاننىڭ بار ەكەنىن جانە حيكايالاردى كوركەم بايانداي ءبىلۋدىڭ انىق دالەلى. راحمەت.»
بۇل حاتقا ءبىر قاراعاننان-اق جازۋ مەن قولتاڭبا اراسىنداعى ايىرماشىلىقتى بايقاۋعا بولادى. قاراپايىم ادام مەن مەملەكەتتەگى ءرولدىڭ شەكاراسى مىنە قايدا جاتىر...
ءسىز جازۋعا قاراپ، ونىڭ اۆتورى تۋرالى بىلۋگە بولاتىنىن ەستىدىڭىز بە؟ سونىمەن بۇگىنگى تاقىرىپ، جازۋدىڭ قۇپياسىنا ارنالادى.
قىسقاشا انىقتاما
گرافولوگيا («گرافو» - جازامىن جانە «لوگوس» - ءسوز) - جازۋلاردى زەرتتەيتىن عىلىم. گرافولوگتار الەمدە ەكى بىردەي جازۋ بولمايتىندىقتان، ءاربىر ادامنىڭ جازۋى ونىڭ تۇلعالىق قاسيەتتەرىنىڭ ايناسى دەپ ەسەپتەيدى.
وتكەنگە كوز جۇگىرتۋ
ادام جانىنىڭ جاي-كۇيى مەن ونىڭ جازۋى اراسىندا بايلانىس بولاتىنى تۋرالى بولجامدار ەرتە زامانداردا ايتىلعان. العاش رەت جان مەن جازۋدىڭ اراسىنداعى بايلانىس تۋرالى يتالياندىق دارىگەر كاميلو بالدي (1622) جازادى. قازىرگى گرافولوگيا عىلىمىنىڭ اكەسى بولىپ جان يپپوليت ميشون سانالادى. ول ءار-ءتۇرلى قول جازبالاردى جيناپ، ولاردىڭ ءوزارا ايىرماشىلىقتارى مەن ۇقساستىقتارىن تاۋىپ، جازۋلاردىڭ اۆتورلارمەن سايكەستىگىن انىقتاۋعا تىرىسادى.
فيزيولوگيا عىلىمىنىڭ پروفەسسورى ۆيلگەلم پرەيەر قولدارىنان ايرىلعان ناۋقاستار اياقپەن نەمەسە اۋىزبەن جازعاندا، ولاردىڭ جازۋلارى بۇرىنعى جازۋلارىمەن بىردەي بولاتىنىن بايقايدى. پرەيەر ادام جازۋى ميدا قالىپتاسادى دەگەن تۇجىرىمعا كەلەدى.
گرافولوگيا - جالعان عىلىم
كەز-كەلگەن پسيحولوگيالىق اناليز سەكىلدى گرافولوگيا دا جارتىلاي عىلىم، جارتىلاي ونەر بولىپ تابىلادى. گرافولوگيالىق اناليزدىڭ ماكسيمالدى دۇرىس بولۋى اناليز جاساعان ماماننىڭ كاسىبيلىگىنە بايلانىستى.
وكىنىشكە وراي، ءبىزدىڭ قوعامدا گرافولوگيانى جالعان عىلىمدار ساناتىنا قوسادى. شىنىمەن دە، ونىڭ 100 پايىزدىق راستىعىن دالەلدەيتىن ناقتى فورمۋلا جوق. گرافولوگيا عىلىمى بۇگىنگى تاڭدا زەرتتەلۋ بارىسىندا.
جازۋ - ساياسي تىڭشىنىڭ قۇرالى
جازۋعا قاراپ ادامنىڭ مىنەزى مەن پسيحولوگيالىق جاعدايى تۋرالى ءبىراز اقپارات الۋعا بولادى. وسى مۇمكىندىكتى ساياسي تىڭشىلار بۇرىننان قولدانىپ كەلەدى. اسىرەسە بۇل ءتاسىل جۇمىسقا الۋ كەزىندە ءجيى قولدانىلادى ەكەن. بۇنىڭ ءبىر مينۋسى وزگەنىڭ سىرىن بىلگەنىمەن، وزىڭدىكىن جاسىرۋ قيىنعا سوعادى.
ەسكەرتۋ
گرافولوگيالىق اناليزدىڭ نەعۇرلىم ءدال بولۋى ءۇشىن، قالاممەن ەمەس قارىنداشپەن جازۋ كەرەك.
جازۋ جانە تەمپەرامەنت
ءاربىر تەمپەرامەنتتىڭ وزىندىك ەرەكشەلىكتەرى بولادى - باياۋ، جەڭىل، ەكپىندى، قىزۋ، ۇستامدى، سالقىن، سويداقتالعان، ءسويتىپ كەتە بەرەدى.
تالعامپاز، كەربەز، قيمىل-قوزعالىسى باياۋ جانداردىڭ جازۋلارى اسەم دوڭگەلەنىپ، ءتۇزۋ دە ۇقىپتى بولىپ كەلەدى.
بولمىسىنان بىربەتكەي ءارى اشىق جانداردىڭ جازۋلارىندا ورنەكتەۋلەر مەن اشەكەيلەۋدى كورمەيسىز، سوزدەر ءبىر جولدا سەكىرىپ تۇرعانداي ۇزىك-ۇزىك بولىپ، ارىپتەرى سىرتقا قاراي اينالىپ تۇرادى.
قاتال، تەز شەشىم قابىلداي الاتىن ادامداردىڭ جازۋلارىنداعى ارىپتەر، ادەتتە تىكە، ۇشكىر، ال جۇمساق جانداردىڭ جازۋلارى - دوڭگەلەنگەن، توماپاق بولىپ كەلەدى.
دورەكى، تۇرپايى ادامداردىڭ جازۋىندا ءجوندى-ءجونسىز بۇرامداۋلار كوپ بولادى.
ارينە، بۇل ايتىلعاندار جازۋلاردىڭ نەگىزگى بەلگىلەرى بولىپ تابىلادى. سوندىقتان وسىعان قاراپ، ادامدى مىناداي-اناداي دەۋ ءجون ەمەس. اناليزدىڭ نەعۇرلىم ءدال بولۋى ءۇشىن ءارتۇرلى سۋرەتتەر مەن قولتاڭباعا دا نازار اۋدارۋ كەرەك. ول تۋرالى كەلەسى ساندا جازاتىن بولامىز.
El.kz
