ساۋد ارابياسىنداعى شۋ - تەلەجۇرگىزۋشى قىزعا بايلانىستى شىقتى

وندا مەملەكەتتىك تەلەۆيزيانىڭ ورتالىق تەلەارناسىندا جاڭالىق وقيتىن تەلەجۇرگىزۋشى قىز ەفيرگە حيدجابسىز شىققان.

بۇل شاريعات زاڭىن قاتاڭ ۇستاناتىن يسلام مەملەكەتىندە ۇلكەن داۋعا اينالدى، دەپ جازادى ۆەستي Independent-كە سىلتەمە جاساپ.

بۇعان دەيىن حيدجاب تاستامايتىن Al Ekhbariya ارناسىنىڭ قىزمەتكەرى بۇل جولى ەفيرگە باسىنا تۇك تاقپاي شىققان. وسى قالىپپەن ول لوندون جاڭالىقتارىن وقي باستادى. ساۋد ارابياسىندا ايەلدەرگە قاتىستى قاتاڭ درەسس-كود بار.

ولار كوپشىلىك الدىنا دەنەسىن تولىق جاۋىپ تۇراتىن كەڭ كويلەكتە جانە بەتىن جاۋىپ تۇراتىن پەردەسى بار حيدجابپەن عانا كورىنۋى ءتيىس. تەلەۆيزيا سالاسىندا جاڭالىق جۇرگىزۋشىلەر مۇنداي قادامعا بۇرىن سوڭدى بارعان ەمەس.

ساۋد ارابيا راديوسى مەن تەليەۆيزياسىنىڭ وكىلى سالەح ءال-مۋگحاليف جۇرگىزۋشىنىڭ مۇنشالىقتى ەركىنسۋ سەبەبىن تۇسىندىرۋگە تىرىستى. ونىڭ ايتۋىنشا، قىز جاڭالىق وقيعان ستۋديا لوندوندا ورنالاسقان ەكەن.

«ول ساۋد ارابياسىنان تىس جەردە ءجۇردى. سوندىقتان ءبىز ەلىمىزدە قالىپتاسقان قۇندىلىقتارعا بەيجاي قارايمىز دەۋدەن اۋلاقپىز»، - دەدى ول. سونىمەن قاتار ءال-مۋگحاليف مۇنداي جايتتار قايتالانباس ءۇشىن قاجەتتى شارالار قابىلداۋعا ۋادە ەتتى. نەگىزىنەن، شۋدىڭ تۋىنداۋىنا جاڭالىقتار توپتاماسىنان كەيىن كورەرمەندەردەن تۇسكەن نارازىلىق تولقىنى سەبەپ بولعان.

Al Ekhbariya ارناسىنىڭ تاياۋ شىعىستا، ەۋروپا مەن امەريكادا كەڭسەلەرى بار. تەلەارنا ءوز قاتارىندا ايەل قىزمەتكەرلەردىڭ كوپتىگىمەن تانىمال. 2004 - جىلى ءدال وسى ارنادا تۇڭعىش رەت جاڭالىقتار توپتاماسىن ايەل جۇرگىزۋشى وقيعان بولاتىن.

مۇنداي تاجىريبە حالىق اراسىندا داۋ تۋدىرماعانىمەن، قىزداردىڭ ەفيرگە حيدجابسىز شىعۋى الەۋمەتتىك جەلىلەردە ۇلكەن شۋعا اينالدى. ساۋد ارابياسىنىڭ ينتەرنەت پايدالانۋشىلارى قىز ۇلتتىق ءداستۇردى اياققا تاپتادى دەگەن پىكىرگە ورتاقتاستى. بلوگەرلەر مۇنداي ەركىنسۋگە جول بەرمەۋ كەرەك دەپ ەسەپتەيدى، سەبەبى بۇل «ايەلدەردىڭ ءوز قۇقىعى ءۇشىن كۇرەسىن» بىلدىرسە كەرەك.

BNews.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى