استانادا ليفت جاسايتىن قازاقستان مەن قىتايدىڭ بىرلەسكەن زاۋىتى اشىلدى - فوتو
زاۋىتتا «Auxe» ماركالى جوعارى جىلدامدىقتى ليفتىلەر شىعارىلاتىن بولادى.
زاۋىت ديرەكتورى اباي نۇرعاليەۆتىڭ ايتۋىنشا، قازاقستاندا بۇعان دەيىن ليفت جاسالماعان. بۇل ەلىمىزدەگى ليفت جاسايتىن تۇڭعىش زاۋىت بولماق.
«زاۋىتتا جىلىنا 1000 عا جۋىق ليفت جاساپ شىعارىلاتىن بولادى. تۇرعىن ۇيلەر مەن كەڭسەلەرگە ارنالعان ستاندارتتى ليفتىلەردەن باسقا، جۇك، اۆتوكولىكتىك جانە اۋرۋحانا ليفتىلەرى دە شىعارىلادى. جەكە تاپسىرىس بويىنشا پانورامدىق ليفتىلەر دە قۇراستىرۋ جوسپاردا بار. سونداي-اق، زاۋىت كوتتەدج ۇيلەرگە ارنالعان ليفتىلەردى دە، ەسكالاتورلار مەن تراۆولاتورلاردى دا شىعارادى»، - دەپ اتاپ ءوتتى ا. نۇرعاليەۆ.
ونىڭ ايتۋىنشا، كەلەسى جىلى زاۋىتتىڭ ەكىنشى بولىگى ىسكە قوسىلىپ، جىلدىق قۋاتى 2000 ليفتىگە دەيىن جەتكىزىلەدى.
زاۋىت ديرەكتورى اتاپ وتكەندەي، كاسىپورىن ەندى عانا اشىلىپ جاتسا دا، ونىڭ ونىمدەرىنە دەگەن سۇرانىس ءقازىردىڭ وزىندە كوبەيىپ وتىر.
«بىزدە قازىردىڭ وزىندە ورال، كوكشەتاۋ، قاراعىندى، پاۆلودار جانە باسقا دا قالالاردان تاپسىرىستار كەلىپ ءتۇسىپ جاتىر»، - دەيدى ول.
«ءبىزدىڭ ءبىر ليفت 4 ميلليون تەڭگە تۇرادى. الايدا الداعى ۋاقىتتا ءبىز تاسىمالداۋ مەن باسقا دا ۇنەمدەۋ جولدارى ارقىلى بۇل باعانى 3,5 ميلليونعا دەيىن ءتۇسىرۋدى جوسپارلاپ وتىرمىز. سونداي-اق، ءبىز ونىمدەرىمىزدى ساتىپ العان عيماراتقا تولىقتاي ورناتۋ، ودان ءارى قىزمەت كورسەتۋ، جوندەۋ جۇمىستارىن دا ءوز موينىمىزعا الامىز»، - دەپ اتاپ ءوتتى زاۋىت ديرەكتورى.
ونىڭ ايتۋىنشا سونىمەن قاتار، زاۋىت ءوز ونىمدەرىن ت م د ەلدەرىندە، ونىڭ ىشىندە ۋكراينا، بەلارۋس، ءازىربايجان، تۇركىمەنستان جانە قىرعىزستاندا ەلدەرىندە ساتۋدى جوسپارلاۋدا.
«ليفتىلەردىڭ نەگىزگى بولىگى، ياعني تەمىر كورپۋسى، ەدەنى، توبەسى، قابىرعالارى جانە شاحتادا بولاتىن بارلىق تەمىر قۇرىلعىلارى قازاقستاندىق ونىمدەردەن جاسالادى، ال ەلەكترونيكا جاعى قىتايلىق وندىرۋشىلەردەن الىنادى. تەمىر ارقاندى قازاقستان نەمەسە رەسەي نارىعىنان ساتىپ الامىز»، - دەيدى ا. نۇرعاليەۆ.
اۆتور: ءابۋ- اسقار مەكەش ۇلى
