جەكەشەلەندىرۋدىڭ ەلىمىزگە بەرەر پايداسى قانداي؟
ساۋدالانعان 14 مەكەمەدەن بيۋدجەتكە 440 ميلليون تەڭگە پايدا كەلدى.
بۇل جوسپارلاعاننان ەكى ەسەگە ارتىق.
بۇگىندە مەملەكەتتىك سەكتوردىڭ ۇلەسىندە 7 مىڭعا جۋىق ۇيىم بار. مۇنشالىقتى كوپ كومپانيانىڭ مەملەكەت قاراماعىندا بولۋى كاسىپكەرلىكتىڭ دامۋىنا كەرى اسەرىن تيگىزۋدە.
بۇل ولقىلىقتى جويۋ ءۇشىن 800 گە جۋىق ۇيىم باسەكەلەستىك ورتاعا بەرىلەدى.
ونىڭ 416 سى كوممۋنالدىق مەنشىك بولسا، 337 سى ۇلتتىق حولدينگ پەن كومپانيا اكتيۆى. وسىلايشا «سامۇرىق-قازىنانىڭ» قاراماعىنداعى 106، «بايتەرەك» حولدينگىندەگى 15، ال «قازاگرونىڭ» 30 دان استام ەنشىلەس كاسىپورنى ساتىلىمىعا شىعارىلادى.
نۇرلان ءابىلقاسىموۆ، ق ر ۇلتتىق ەكونوميكا مينيسترلىگىنىڭ باسقارما باسشىسى:
- ءارتۇرلى ۇيىمداردى مەملەكەت ءوز قاراماعىندا ۇستاۋ ارقىلى ستراتەگيالىق، الەۋمەتتىك ماقساتتاردى جۇزەگە اسىرادى. الايدا ونىڭ شەكتەن تىس بولۋى بيزنەس ءۇشىن ءتيىمسىز. سەبەبى جەكەمەنشىك كومپانيالار مەملەكەتپەن باسەكەلەستىككە تۇسە المايدى. بۇل تۇستا مەملەكەت ءوز قاراماعىندا كەيبىر مەكەمەلەردى جەكەنىڭ قولىنا بەرۋ ارقىلى، ەلىمىزدە كاسىپكەرلىكتىڭ قانات جايۋىنا جاعداي جاسايدى.
باسەكەلەستىك دامىعان سايىن حالىقتىڭ ساپالى ءارى ارزان باعاداعى ونىمگە قول جەتكىزۋىنە جول اشىلماق. ۇيىمداردى جەكەنىڭ قولىنا بەرۋدە بارماق باستى، كوز قىستىلىققا جول بەرمەي، بارىنشا ادىلدىكتى قامتاماسىز ەتۋ مىندەتى تۇر.
بۇل رەتتە مەكەمە باستاپقى باعاسى كورسەتىلگەن ونلاين رەجىمىندەگى اۋكسيوندا ساۋدالانادى. وعان كەز كەلگەن ازامات قاتىسا الادى جانە كىمنىڭ قانداي باعاعا ساتىپ العاندىعىن دا بىلۋگە بولادى.
نۇرلان ءابىلقاسىموۆ، ق ر ۇلتتىق ەكونوميكا مينيسترلىگىنىڭ باسقارما باسشىسى:
- بارلىق اكتيۆ پەن كومپانيا ەلەكتروندى فورماتتاعى ساۋدا الاڭىندا ساتىلادى. كاسىپكەرلەر www.gosreestr.kz سايتىنا كىرىپ، ءتيىستى مەكەمەنىڭ باستاپقى باعاسى مەن قويىلاتىن شارتپەن تانىسىپ، ساتىلىمعا قاتىسا الادى. ال ساتىپ الۋشىمەن جاساسقان شارتتىڭ ورىندالۋىن قۇزىرلى ورگاندار 4 جىلعا دەيىن قاداعالاپ وتىرادى. ياعني، جەكەنىڭ يگىلىگىنە بەرىلگەن مەكەمە ءوزىنىڭ وسى ۋاقىتقا دەيىن اينالىسىپ كەلگەن مىندەتىن اتقارۋى ءتيىس. ەڭ باستىسى كادر ىزدەپ، باس قاتىرۋدىڭ قاجەتى جوق.
24.kz
