نەمىس ارداگەرى گيتلەردىڭ قول استىندا قالاي جۇمىس ىستەگەنىن ايتىپ بەردى
«جۇبايىم اسكەردە قىزمەت ەتىپ جۇرگەن كەزىندە، مەن اۋە شابۋىلىنان ساقتانۋ ماقساتىندا بەرليننەن راستەنبۋرگكە (قازىر كەنتشين دەپ اتالاتىن پولشا قالاسى) باردىم. سوسىن مەنى ازاماتتىق قىزمەتكە «قاسقىر اپانى» (Wolfsschanze) دەگەن جەرگە الىپ كەتتى. ول فيۋرەردىڭ پولشاداعى قۇپيا باسقارۋ ورتالىعى ەكەن. سوسىن بىلۋىمشە مەنىمەن بىرگە كەلگەن تاعى 14 قىز، بارلىعىمىز گيتلەردىڭ دەگۋستاتورى بولىپ قىزمەت ەتەتىن بولىپپىز»، - دەپ ەسكە الادى مارگو.
«قاسقىر اپانى»
كەلەسى ەكى جارىم جىل بويى، ءوز ءومىرى ءۇشىن قورقۋمەن، نەمىس ايەلى گيتلەردىڭ ۇستەلىنە قويىلاتىن تاعامداردىڭ بارلىعىن تاتىپ كورۋمەن بولعان. بۇل جۇمىستىڭ ءبىر عانا ارتىقشىلىعى بولىپتى. ازىق-تۇلىك تاپشى بولعان كەزەڭدە، ۆوەلك قاشاندا توق جۇرگەن.
«گيتلەر ۆەگەتاريان بولعان. «قاسقىر اپانىندا» وتكىزگەن بار عۇمىرىمدا بىردە-ءبىر رەت ەت جەپ كورمەدىم. گيتلەر اعىلشىنداردىڭ ءوزىن ۋلاپ قويۋىنان قورقاتىن بولعان. سوندىقتان ونىڭ 15 دەگۋستاتورى بولدى.
ۇستەلگە قويىلاتىن ءتۇرلى سالاتتاردان باستاپ، بارلىق اس تۇرلەرىن الدىمەن ءبىز تاتىپ كورەتىنبىز. سودان كەيىن عانا كوشباسشى اس ۇستەلىنە جاقىندايتىن. دەگەنمەن، ءبىز ول تاعامداردى ءلاززاتتانىپ جەمەيتىنبىز. سەبەبى ءاربىر تاعامدى بايقاپ كورۋ ولىمگە الىپ كەلۋى مۇمكىن ەدى. اركەز ۇستەلگە وتىرعان كەزدە، بۇل ءبىزدىڭ سوڭعى ءدام تاتۋىمىز دەپ ويلاۋدان قورقاتىن ەدىك»، - دەيدى كوپ جاستى وتكەرگەن كارى كىسى.
گيتلەر جانە پولشاداعى «س س» قۇرامى
گيتلەردىڭ ءولىمى وقىستان بولۋى جازىلماعان ەكەن. 1944 - جىلى 20- شىلدەدە پولكوۆنيك كلاۋس شەنك فون شتاۋففەنبەرگ جينالىس بولاتىن بولمەدە بومبانى جارىپ، فيۋرەردى ولتىرۋگە تىرىسادى. «ءبىز سول كەزدە اعاش ورىندىقتاردا وتىرعان ەدىك. سوسىن بىرەۋ «گيتلەر ءولدى» دەگەن ايقايمەن شىقتى. دەگەنمەن ول ولمەگەن ەدى»، - دەيدى كۇرسىنىپ ۆوەلك، - «وسى وقيعادان كەيىن قاتاڭ باقىلاۋ ءتارتىبى ىسكە قوسىلدى. ال كۇزگە قاراي گيتلەر مۇلدە پولشادان كەيىن قايتىپ كەتتى. بىرنەشە اي وتكەننەن كەيىن «س س» قىزمەتكەرى كەڭەس اسكەرلەرىنىڭ شابۋىلعا وتكەنىن ايتىپ، ءبىزدىڭ قايتۋىمىزدى بۇيىردى».
مارگو وسىدان كەيىن بەرلينگە قايتا ورالىپ، قاراپايىم كۇنىن كەشە بەرەدى. جاسى 95 كە كەلىپ تىرەلگەندە، ىشىندەگى بار سىرىن وسىلاي جۇرشىلىققا ايتىپ بەرگىسى كەلگەن ەكەن.
دايىنداعان: جولداس ورىسبايەۆ
