باسپانا جونىنەن ازاماتتارعا ورالماندارمەن بىردەي جەڭىلدىك قاراستىرىلادى

ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا مينيستر ىشكى كوشى-قون ماسەلەسىنە قاتىستى سۇراققا جاۋاپ بەردى.

بۇل ماسەلەنىڭ وزەكتىلىگى سول، حالىقتىڭ كوشىپ-قونۋى رەتتەلمەي جاتقاندىقتان، كوپتەگەن اۋىل قاڭىراپ، بوس قالدى. "اتا زاڭىمىزعا سايكەس، قازاقستاننىڭ ءاربىر ازاماتىنىڭ قاي جەرگە بارىپ تۇرام دەسە دە، ءوز ەركى. ال ىشكى جۇمىس ميگراتسياسى بولسا، بۇل - مۇلدەم باسقا اڭگىمە. بۇگىندە ءبىز كوشى-قون ساياساتىنا ارنالعان جاڭا قۇجاتتىڭ ىشىندە جۇمىس بابى بويىنشا ىشكى ميگراتسياعا ەرەكشە ءمان بەرىپ وتىرمىز.

وسىعان وراي، 2030 - جىلعا دەيىن جۇمىس كۇشىنىڭ كولەمىن، قاي وبلىستا حالىقتىڭ سانى وسەدى، قايسىسىندا كەميدى، قانداي ماماندىقتار قاجەت بولادى - سونىڭ بارلىعىن انىقتاپ الدىق. تۇجىرىمداماعا سايكەس، جۇمىس كۇشى از جانە جۇمىس كۇشى ارتىق ايماقتار بەلگىلەندى. ەندى جۇمىس كۇشى ارتىق ايماقتاردىڭ ازاماتتارى جۇمىس كۇشى از جەرلەرگە بارسا، ولارعا قوسىمشا الەۋمەتتىك قولداۋ شارالارى ۇسىنىلادى"، - دەپ اتاپ كورسەتتى دۇيسەنوۆا.

ونىڭ ايتۋىنشا، بۇگىندە ورالمان اعايىنداردى باسپانامەن قامتاماسىز ەتۋگە ارنالعان "اسار" سياقتى جوبالار "جۇمىسپەن قامتۋ" باعدارلاماسىندا دا قاراستىرىلىپ وتىر. "ورالماندارعا ەلدىڭ قاي ايماعىنا بارسا دا، ءۇي بەرىلەدى. تۋرا سول سياقتى ءوزىمىزدىڭ جەرگىلىكتى ازاماتتارعا دا سونداي الەۋمەتتىك جەڭىلدىك قاراستىرىلعان"، - دەيدى مينيستر حانىم.

ءمينيستردىڭ سوزىنە قاراعاندا، ىشكى جۇمىس ميگراتسياسىنا ارنالعان زاڭ جوباسى اعىمداعى جىلى قىركۇيەك ايىندا پارلامەنتتىڭ قاراۋىنا ەنگىزىلەدى. ال كەلەسى جىلدىڭ ءبىرىنشى توقسانىندا اتالعان قۇجاتتىڭ قابىلدانۋى ابدەن مۇمكىن.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى