ورالماندار ماسەلەسى جاقىن ارادا شەشىمىن تاباتىن بولادى - ت. دۇيسەنوۆا
ەسكە سالا كەتەيىك، بۇنىڭ الدىندا ءبىرقاتار ب ا ق بەتتەرىندە الماتى وبلىسىندا قىتايدان كۆوتاسىز كەلگەن 100گە جۋىق وتباسى قايتادان كوش باسىن كەرى بۇرماقشى دەگەن اقپارات تاراعان بولاتىن. قازاقستان جاقتان سوتتالماعاندىعى جونىندە انىقتاما سۇرالسا، قىتاي تاراپى ول قۇجاتتى بەرمەي، ابدەن سارساڭعا سالعان.
ءمينيستردىڭ ايتۋىنشا، جاڭا قاۋلىعا سايكەس، ورالمانداردىڭ بۇل ماسەلەسى جاقىن ارادا شەشىمىن تاباتىن بولادى.
«بۇل ماسەلەدەن ءبىز حاباردارمىز. كەشە ورالماندارمەن پىكىرتالاستاردا وسى ماسەلە كوتەرىلدى. قولدانىستاعى زاڭناماعا سايكەس، قازاقستاندا ورالمانداردى قابىلدايتىن ايماقتار بەلگىلەنگەن بولاتىن. ءبىز بۇل قاۋلىنى وزگەرتتىك. ەندى جەرگىلىكتى ءوڭىردىڭ اتقارۋشى ورگاندارى قانداستارىمىزعا ورالمان مارتەبەسىن بەرە الادى. بۇرىن ەگەر ورالمانداردى قابىلدايتىن ايماقتارعا ەمەس، وزگە وڭىرلەرگە قونىستانعىسى كەلەتىن بولسا، ءوز- ءوزىن قامتي الاتىنى جونىندە انىقتاما بولۋى شارت بولاتىن. جاڭاعى قاۋلىعا سايكەس، ول دا الىنىپ تاستالدى. سوتتالۋ انىقتاماسى جونىندە ءبىز كەشە قاراپ، ايتتىق. زاڭعا بۇل ماسەلە ەنگىزىلەدى، ىشكى ىستەر مينيسترلىگىنە دە وسىعان قاتىستى تاپسىرما بەرىلدى. قازىر الماتى وبلىسىمەن تىعىز بايلانىستامىز. وسى ماسەلەنى شەشۋ جونىندە ءبىزدىڭ جەرگىلىكتى دەپارتامەنت جانە وبلىستاعى جۇمىسپەن قامتۋ باسقارماسى بۇل جۇمىستى ءوزىنىڭ باقىلاۋىنا الىپ وتىر» ، - دەدى مينيستر.
اۆتور: جاسۇلان جولدىبايەۆ
