تەڭىزگە شىعار جولدىڭ جوقتىعىن كەمشىلىكتەن ارتىقشىلىققا اينالدىرۋعا بولادى - ە ىدىرىسوۆ
بۇگىن الماتىدا تەڭىزگە شىعار مۇمكىندىگى جوق ەلدەردىڭ ب ۇ ۇ جانىنداعى تۇراقتى وكىلدەرىنىڭ كوشپەلى كەڭەسى بارىسىندا ق ر سىرتقى ىستەر ءمينيسترى ەرلان ىدىرىسوۆ وسىنداي پىكىر ءبىلدىردى.
«ءبىز بۇل ماسەلەمەن سوناۋ تاۋەلسىزدىك العان جىلداردان باستاپ اينالىسا باستادىق. كەزىندە قازاقستاننىڭ بولاشاعىنا كۇمانمەن قاراعاندار بولدى. ول تۇسىنىكتى دە. قازاقستان - تەڭىزگە شىعار جولى جوق الەمدەگى ەڭ ۇلكەن مەملەكەت. 90- جىلدارى ءبىزدىڭ سىرتقى تۇگىلى ىشكى جولدارىمىز دا ناشار دامىعان ەدى. سوندىقتان، قازاقستان ءۇشىن لوگيستيكا، ينفراقۇرىلىم، ءترانزيتتى دامىتۋ - ماڭىزدى باسىم باعىت.
تاۋەلسىزدىك جىلدارىندا ءبىز مىڭداعان شاقىرىم جاڭا جولدار سالدىق. گاز، مۇناي قۇبىرلارى، تەمىر جولدار تارتىپ، قازاقستان شەت ەلدەرمەن دە ترانزيتتىك بايلانىسىن نىعايتىپ وتىر. قازىر قازاقستان بۇكىل الەمدىك بانكپەن بىرلەسە وتىرىپ، باتىس قىتاي - باتىس ەۋروپا اۆتوكولىك جولىن سالىپ جاتىر. بۇل - قاشىقتىعى 10000 شاقىرىمنان اساتىن الىپ جوبا. ونىڭ 3000 شاقىرىمى قازاقستان ارقىلى وتەدى.
كەلەسى جىلى ءبىزدىڭ ەلىمىز وزىنە تيەسىلى وسى جول بولىگىن تولىعىمەن اياقتايدى. سونىمەن قاتار، وتكەن جىلى قازاقستان تۇركىمەنستان شەكاراسىنا دەيىن تەمىر جول سالدى. قازىر بۇل ەل تەمىر جولدىڭ وزىنە تيەسىلى بولىگىن ءارى قاراي سالىپ جاتىر. بولاشاقتا بۇل جول يراننىڭ بانداراباس پورتىنا دەيىن سوزىلادى. وسىلايشا، قازاقستان پارسى شىعاناعىنا شىعادى» - دەدى ءوز سوزىندە ەرلان ىدىرىسوۆ.
بۇگىنگى شاراعا تەڭىزگە شىعار مۇمكىندىگى جوق 28 ەلدىڭ وكىلى قاتىسۋدا. وتىرىس بارىسىندا الماتى ءىس-ارەكەت باعدارلاماسىن جۇزەگە اسىرۋ بارىسى تالقىلاندى.
ايتا كەتەلىك، الماتى ءىس-ارەكەت باعدارلاماسى 2003 - جىلى 28-29 -تامىز ارالىعىندا الماتى قالاسىندا تەڭىزگە شىعار مۇمكىندىگى جوق دامۋشى ەلدەر مينيسترلەرىنىڭ حالىقارالىق كونفەرەنتسياسىندا قابىلدانعان بولاتىن.
اتالعان باعدارلاما تەڭىزگە شىعار مۇمكىندىگى جوق ەلدەردىڭ «جول كارتاسى» دەسە دە بولادى. وندا ترانزيتتىك تاسىمالداۋ جانە ترانسپورتتىق ينفراقۇرىلىمداردى دامىتۋ بويىنشا ناقتى شارالار مەن ۇسىنىستار تولىعىمەن قامتىلعان.
كەڭەس 16 - شىلدەگە دەيىن جالعاسادى.
اۆتور: جاپپاربەرگەن ايبوتا
