عالىمدار الەمدەگى ەڭ قارا ءتۇستى ماتەريالدى ويلاپ تاپتى

ادام شاشىنان 10 ەسە جۇقا ماتەريال گرافيتتى نانوترۋبكادان جاساعان جانە Vantablack نەمەسە «سۋپەر قارا» دەگەن اتقا يە بولعان، - دەپ حابارلايدى Tengrinews.kz Independent گازەتىنە سىلتەمە جاساپ.

ونىڭ جىلۋ وتكىزۋشىلىك قابىلەتى مىسقا قاراعاندا 7,5 ەسەگە ءتيىمدى جانە قاتتىلىعى تەمىردەن 10 ەسە جوعارى. ماتەريال ءتۇسىنىڭ قارالىعى سونشا، ونىڭ مايىسقانىن ادام كوزىمەن بايقاۋ مۇمكىن ەمەس. وعان قاراعان كەزدە بارلىق كونتۋرلار مەن فورمالار جوعالىپ كەتەدى، تۇڭعيىققا كوز جىبەرگەندەي كۇيدە بولاسىڭ.

«بۇل عاجايىپ قۇبىلىس: فولگانى مايىستىرىپ، ونىڭ بەتىنىڭ وزگەرگەنىن كورمەك بولاسىڭ، ءبىراق ول مۇمكىن ەمەس» دەيدى Surrey NanoSystems كومپانياسىنىڭ قىزمەتكەرى بەن دجەنسەن.

«Vantablack كە قاراۋ قارا تەسىككە قاراۋمەن بىردەي. ادامزات بۇدان قارا دۇنيەنى ءالى كورگەن ەمەس» - دەيدى ليدسك ۋنيۆەرسيتەتىنىڭ مامانى ستيۆەن ۋەستلەند.

جاڭا ماتەريال استرونوميالىق كامەرلاردا، تەلەسكوپتاردا جانە ينفراقىزىل سكانەرلىك جۇيەدە قولدانۋ ءۇشىن جاساپ شىعارىلعان. بۇل جاڭالىق لوندون ىرگەسىندەگى فارنبورو قالاسىندا 14-20- شىلدە ارالىعىندا وتەتىن اۆياسالوندا كورسەتىلمەك.

Vantablack-ءتىڭ جارىقتى قالاي جۇتاتىنىن science-Naked پارتالى بىلاي تۇسىندىرەدى: ونىڭ نەگىزىندەگى گرافيتتى نانوترۋبكالاردىڭ جۇقالىعى سونشا، جارىق ساۋلەلەرى وعان شاعىلمايدى. ونىڭ ورنىنا فوتوندار ترۋبكالار اراسىنداعى تەسىكتەرگە ءتۇسىپ، تولىقتاي جۇتىلىپ كەتەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى