باتىر اناعا بەرگەن باسپاناسى ۋاقىتشا بولىپ شىقتى

قىزىلوردا قالاسىنىڭ بۇرىنعى اكىمى مارحابات جايىمبەتوۆ ءنازيرا سابىراليەۆاعا باتىر انا القاسىن تابىستاپ، 26 جاسىندا 7 بالا تۋعان جاس اناعا پاتەر بەرەمىن دەپ تە ۋادە ەتكەن بولاتىن. شەنەۋنىك ۋادەسىندە تۇردى. ءبىراق بەرگەن باسپاناسى ۋاقىتشا بولىپ شىقتى. كەز-كەلگەن ساتتە ءۇيدىڭ جاڭا يەسى تابىلىپ، باتىر انانى جەتكىنشەكتەرىمەن دالاعا قۋىپ شىعۋى مۇمكىن. جاقسىلىقتى ءبۇتىن جاساي الماعان اتقامىنەرلەرگە جاس انا وتە قاپالى.

نازيرا سابىراليەۆا، كوپ بالالى انا:

جۋرناليستەرگە قالا اكىمى 5 ميلليونعا ءۇي الىپ بەردىك دەپ ايتىپتى. 5 ميلليونعا ءۇي الىپ بەرسە، مەن ءبۇيتىپ وتىرار ما ەدىم.

قورعانسىزدىڭ كۇيىن كەشكەن باتىر انانىڭ ازابى مۇنىمەن بىتپەدى. اكىمشىلىك بەرگەن ءۇي كوممۋنالدىق قارىزعا بەلشەدەن باتىپ وتىرعانى بەلگىلى بولدى. ونى بالالارعا بەرىلەتىن جاردەم اقىسى مەن وتاعاسىنىڭ كۇندەلىكتى تاپقان تيىن-تەبەنىنەن جىرىپ جابايىن دەسە باسپانا قۇجاتتارى دۇرىس ەمەس. تۇرعىلىقتى مەكەن-جاي بويىنشا تىركەۋگە تۇرماعاندىقتان بالالاردى مەكتەپ، بالا-باقشاعا ورنالاستىرۋ پروبلەماسى تاعى شىقتى.

اكىمشىلىكتەگىلەرمەن بايلانىسقانىمىزدا قازاقتىڭ سانىن كوبەيتىپ جۇرگەن جاس وتباسىنىڭ پاتەر كەزەگىنىڭ سوڭىندا ەكەندىگىن بىلدىك.

ورازحان ابدۋللاەۆ، قىزىلوردا قالالىق تۇرعىن ءۇي ينسپەكسياسى ءبولىمى مەملەكەتتىك مەكەمەسىنىڭ باسشىسى:

ازاماتشا سابىراليەۆا ءنازيرا مەرىشبەك قىزى 2007 - جىلدىڭ 14 ماۋسىمىندا كوپ بالالى انا رەتىندە مەملەكەتتىك تۇرعىن ءۇي قورىنان پاتەر الۋ كەزەگىنە تۇرعان. قازىرگى كەزەگىنىڭ رەتى - 1730.

سپورتشىلارى مەن ايتىسكەر اقىندارىنا كەزەكسىز پاتەر سىيلاعان قىزىلوردالىق شەنەۋنىكتەر ەلىمىزدىڭ ەڭ جاس باتىر اناسىن باسپانامەن قامتاماسىز ەتە الماي وتىرعانىنا قاراپ قارنىڭ اشاتىنى راس. اسپاننان كيىز جاۋسا دا، كەدەيدىڭ ۇلتاراققا جارىماستىڭ كەرى كەلىپ تۇر.

گۇلناز بيسەن، مۇحامەدجان اياپبەرگەنوۆ.

Kz. 31

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى