وكىنگەندى كەشىرە بىلگەن اقىن اينۇر تۇرسىنبايەۆا

وسىدان 8 جىل بۇرىن ءابۋ ابدۋ راحمان تۋىسقانىنىڭ ۇيلەنۋ تويىندا اياق كيىمىنەن ايىرىلىپ قالعان بولاتىن. ەندى ارادا 8 -جىل ۋاقىت وتىسىمەن كىشكەنە بالاقاي كەلىپ، 500 ريال سالىنعان حاتتى ۇسىنعاندا، تاڭدانىسىندا شەك بولمادى.

حات يەسى ءوزىنىڭ سول ءبىر قىلىعى ءۇشىن ولەردەي وكىنەتىنىن جازىپ، اراعا 8 جىل وتكەسىن تاۋبەسىنە كەلىپ، كەشىرىم ءوتىنىپتى. ال، ابدۋ راحمان بولسا، تۋىسقانىنىڭ تويىندا اياق كيىمىنەن ايىرعان ۇرىنى باياعىدا كەشىرىپ قويعانىن ايتادى. ۇرلانعان زاتتىڭ وتەۋى رەتىندە جولدانعان اقشانى ول قايىرىمدىلىق شاراسىنا جۇمسايتىنىن جەتكىزدى.

بۇل تۋرالى وتكەندە سايتىمىزدا جازعان بولاتىنبىز.

قاسيەتتى رامازان ايىندا وسىعان ۇقساس جاعداي بىزدە دە بولىپ جاتىر. ءتىپتى قىزىعى، مۇندايدىڭ ءبىرى الاشقا اتى بەلگىلى ايتىس ءدۇلدۇلى اينۇر تۇرسىنبايەۆامەن بايلانىستى بولىپ شىقتى. فەيسبۋك الەۋمەتتىك جەلىسىن قولدانۋشىلاردىڭ ءبىرى اينۇر تۇرسىنبايەۆاعا تومەندەگىدەي حات جازىپ جىبەرىپتى.

«اسسالاۋماعالەيكۋم، اينۇر. سىزگە كوپتەن جازعىم كەلىپ ءجۇر ەدى. قىزعانىش پا بىلمەيمىن، كۇيەۋىم ماقتاي باستاسا قويشى سول ساقاۋ قىزدى دەپ جاقتىرمايتىنمىن. قازىر قىزىم ەكى جاسقا كەلدى، ۆراچتار مىلقاۋ دەپ دياگنوز قويدى. ەندى ويلايمىن، ءوزىمنىڭ تىلدەن تاپقان قايعىم سياقتى. مەنى كەشىرىڭىز اللانىڭ رازىلىعى ءۇشىن!»

بۇعان بايلانىستى فەيسبۋكتەگى جەكە پاراقشاسىندا «ءيا، راببي، مەنى رەنجىتكەندەردى مەن كەشىردىم، ءبىزدىڭ ءبىلىپ بىلمەي جاساعان كۇنامىزدى اللا ءوزىڭ كەشىر! ءبىزدىڭ قاتەلىگىمىز ءۇشىن ۇرپاعىمىزعا زاۋال كەلتىرمە! ءار جازعان ورىنسىز پىكىرىم بولسا امال كىتابىنان ءوشىر... ەكى دۇنيەدە وزىڭنەن پانا تىلەدىم. بەرگەن سانسىز نىعمەتىڭە شۇكىر ەتتىم اللام!!!»، - دەپ جازعان اينۇر وزىنەن كەشىرىم سۇراعان اناعا دا شىنايى جۇرەك ءسوزىن ارناپتى.

«اللا سابىر بەرسىن، دۇعا ەتىڭىز، اللا بار سىناقتى ۋاقىتشا دەگەن. سىزگە ەش رەنجىمەيمىن. مەن ساقاۋمىن دەپ قاپالانبايمىن، 42 ءارىپتى تولىق ايتپاسام دا التى الاشتى اۋزىما قاراتقان اللاعا سانسىز ماقتاۋلار ايتامىن! ادامنىڭ باقىتى تىلگە تىرەلىپ تۇرعان جوق، ءالى-اق ءتىلاشار تويىن جاسايسىز! مەنى شاقىرۋدى ۇمىتپاڭىز! قىزىڭىزدىڭ دا، ءسىزدىڭ دە بەتىڭىزدەن ءسۇيدىم!!!»

تاقىرىپتا ايتىلعانداي 8 جىل بۇرىن ۇرلانعان ءابۋ ابدۋ راحماننىڭ اياق كيىمى مەن استانادا جۇرگەن اينۇر تۇرسىنبايەۆانىڭ قانداي قاتىسى بار دەيسىز عوي؟ رامازان ايى - كەشىرىم ايى! بۇكىل ادامزاتقا ورتاق! رامازان ايى - ادامداردىڭ ەڭ كوپ تاۋبەگە كەلەتىن ايى. يمامداردىڭ ايتۋىنشا، وسى ايدا تاۋبەگە كەلىپ نامازدى العاش باستايتىن ادامدار سانى وزگە ايعا قاراعاندا وتە كوپ بولادى ەكەن. ءوزىنىڭ كۇنالى، زياندى ىستەرىنەن جيركەنىپ، ودان ارىلۋعا تالپىنىس كۇشەيە تۇسەدى ەكەن. قاسيەتتى رامازان ايىنىڭ نىعىمەتىنەن قاپى قالمايىق، ارداقتى اعايىن!

بەك عالىم،

kazaitys.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى