بوكستان قازاقستان قۇراما كومانداسى پرەزيدەنت كۋبوگىن وسىمەن ءتورتىنشى رەت جەڭىپ الدى – فوتو
بوكستان قازاقستان قۇراما كومانداسى پرەزيدەنت كۋبوگىن وسىمەن ءتورتىنشى رەت جەڭىپ الدى (فوتو)
الماتى. قازاقپارات - كەشە الماتىدا بالۋان شولاق اتىنداعى سپورت سارايىندا بوكستان ەرەسەكتەر اراسىندا وتكەن «قازاقستان رەسپۋبليكاسى پرەزيدەنتىنىڭ كۋبوگى» IV حالىقارالىق تۋرنيرىنىڭ فينالدىق كەزدەسۋلەرىندە قازاقستان قۇراما كومانداسى 7 التىن، 4 كۇمىس جانە 6 قولا مەدالگە قول جەتكىزىپ، كوماندالىق ەسەپتە تۋرنير جەڭىمپازى اتاندى.
فينالدىق كەزدەسۋلەردىڭ شىمىلدىعىن 49 كەلى سالماق دارەجەسىندەگى بوكسشىلار اشتى. ءبىرجان جاقىپوۆ پەن وزبەكستاندىق حاسانباي دۋسماتوۆ اراسىنداعى جەكپە-جەك اسا تارتىستى ءوتتى. العاشقى ەكى راۋندا جاقسى ونەر كورسەتكەن ءبىرجان جاقىپوۆتىڭ ءۇشىنشى راۋندتا شارشاڭقىراپ قالعانى بايقالدى. ءبىراق سوعان قاراماستان 2013 - جىلعى الەم چەمپيونى جىگەرىن جانىپ، كەزدەسۋدى ءوز پايداسىنا شەشتى. ەسەپ 2:1. ءبىرجان بۇگىنگى جەڭىسىمەن تۋرنيردىڭ ءۇش دۇركىن چەمپيونى اتاندى.
52 كەلى سالماق دارەجەسىندە فيليپپيندىك رەي سالۋدار وزبەكستاندىق بوكسشى شاحوبيددين زويروۆپەن كەزدەسكەن بولاتىن. تارتىس تىزگىنىن ءوز قولىنا العانىمەن فيلليپيندىك بوكسشى وزبەك جىگىتىنىڭ ءساتتى جاساعان قارىمتا شابۋىلدارىنا تاپ بولىپ جاتتى. ءۇش راۋندتا دا شاحوبيددين ۇرىمتال تۇسىن تاۋىپ، رەي سالۋداردى ءدال سوققىلاردىڭ استىنا الدى. ناتيجەسىندە وزبەك بوكسشىسى 2:1 ەسەبىمەن جەڭىسكە جەتتى. وسىلايشا بوكستان وزبەكستان قۇراما كومانداسى 1 التىن، 1 كۇمىس، 4 قولا مەدالگە يە بولدى.
56 كەلى سالماق دارەجەسىندە شارشى الاڭعا قوس قازاقستاندىق بوكسشى 23 جاستاعى قايرات ەرالييەۆ پەن 20 جاستاعى جانبولات تىلەگەن ۇلى شىقتى.
قايرات العاشقى ساتتەن-اق بەلسەندى ارەكەتكە كوشىپ، رينگ ورتاسىن قارسىلاسىنا بەرمەدى. ساقتىقپەن قيمىلداپ، قارسىلاسىنىڭ شابۋىلدارىنا تويتارىس بەرىپ، ءوز سوققىلارىن دارىتا ءبىلدى. وسىلايشا 3:0 ەسەبىمەن ايقىن باسىمدىقپەن جەڭىسكە جەتتى.
60 كەلى سالماق دارەجەسىندە ونەر كورسەتكەن قازاقستاندىق بوكسشى، اسكەري قىزمەتشىلەر اراسىنداعى الەم چەمپيونى بەرىك ءابدىراحمانوۆ فيلليپيندىك چارلي سۋارەزپەن قولعاپ ءتۇيىستىردى. ەكى راۋند بويى ءابجىل قيمىلداپ، قارسىلاسىنا ەبىن تاۋىپ، اۋىر سوققىلاردىڭ دارىتا بىلگەن بەرىك ءۇشىنشى راۋندتىڭ اياعىندا قاپىلىستا نوكداۋنعا ءتۇسىپ قالدى. دەگەنمەن، وزىنە-ءوزى تەز كەلگەن بەرىك، قارسىلاسىنىڭ جاۋدىرعان سوققىلارىنا توتەپ بەرىپ، جەڭىستى قانجىعاسىنا بايلادى. ەسەپ 2:1.
64 كەلى سالماق دارەجەسىندە شارشى الاڭعا شىققان تايلاندىق ۆۋتتيچاي ماسۋك كۋبالىق لۋيس وليۆا گەنەرمەن كەزدەسىپ 2:1 ەسەبىمەن جەڭىسكە جەتتى.
بوكستان قازاقستان قۇراما كومانداسىنىڭ كاپيتانى، 69 كەلى سالماق دارەجەسىندە شارشى الاڭعا شىققان دانيار ەلەۋسىنوۆ ساعادات راحمانقۇلوۆپەن كەزدەستى. بوكستان 2013 - جىلعى الەم چەمپيونى ءوز تاجىريبەسىنىڭ ارقاسىندا ساعاداتتان 3:0 ەسەبىمەن باسىم ءتۇستى.
تاعى ءبىر قازاقستاندىق بىلعارى قولعاپ شەبەرى، 2013 - جىلعى الەم چەمپيونى جانىبەك ءالىمحان ۇلى ءوز سالماق دارەجەسىندە (75 كەلى) اقتىق سىندا ۋكراينالىق دميتريي ميتروفانوۆپەن كەزدەسكەن بولاتىن. العاشقى ەكى راۋندا جانىبەك بەلسەندىلىك تانىتسا، ءۇشىنشى راۋندتا ۋكرايندىك بوكسشىنىڭ بەلسەندىلىگى بايقالدى. دەگەنمەن تاجىريبەسىنىڭ جانە جويقىن سوققىلارىنىڭ ارقاسىندا جانىبەك جەڭىستى قانجىعاسىنا بايلادى. ەسەپ 3:0.
81 كەلى سالماق دارەجەسىندە رينگكە شىققان ادىلبەك نيازىمبەتوۆ ءوزىنىڭ كوماندالاسى داۋرەن ەلەۋسىنوۆپەن قولعاپ ءتۇيىستىردى. ءدال سوققىلارىمەن قارسىلاسىنا دەس بەرمەگەن لوندون وليمپياداسىنىڭ كۇمىس جۇلدەگەرى، دانيار ەلەۋسىنوۆتىڭ اعاسىن 3:0 ەسەبىمەن تىزە بۇكتىردى.
91 كەلى دارەجەسىندە قازاقستاندىق انتون پينچۋككە قارسى شىققان كۋبالىق بوكسشى لۋيس كوردوۆا حەريحتىڭ مەرەيى ۇستەم بولدى. شەبەرلىگىنىڭ ارقاسىندا ول 2:1 ەسەبىمەن جەڭىسكە قول جەتكىزدى.
ەڭ اۋىر سالماق دارەجەسىندە (+91 كەلى) شارشى الاڭعا شىققان قازاقستاندىق يۆان دىچكو كۋبالىق بوكسشى يوراندي تويراكا ورتەگيدەن باسىم ەكەندىگىن كورسەتتى. دىچكو ءۇشىنشى راۋندا قارسىلاسىن نوكداۋنعا جىبەردى. قورىتىندى ەسەپ: 3:0.
بۇل تۋرنيردە كۋبا، وزبەكستان جانە تايلاند قۇراما كوماندالارىنا عانا ءبىر-ءبىر التىننان بۇيىردى.
وسى تۋرنيردەن كەيىن كوپ ۇزاماي بوكستان قازاقستان قۇراما كومانداسىنىڭ باس باپكەرى مىرزاعالي ايتجانوۆ الداعى قىركۇيەك ايىندا وڭتۇستىك كورەيانىڭ ينچحون قالاسىندا وتەتىن ازيا ويىندارىنا باراتىن بوكسشىلاردىڭ ءتىزىمىن جاريالايدى.
