مۇمكىندىگىنشە تەز ارادا زايسان قالاسىن گازداندىرۋ كەرەك - ب. ساپاربايەۆ

 زايسان وڭىرىنە ساپارى بارىسىندا وبلىس اكىمى قاينار اۋىلى مەكتەبىنىڭ اۋماعىندا جاڭا سپورت مودۋلىنىڭ اشىلۋىنا قاتىستى. قۇنى 34 ميلليون تەڭگە بولاتىن قۇرىلىس جەرگىلىكتى بيۋدجەت قاراجاتىنا سالىندى،

 دەپ حابارلادى اكىمنىڭ اقپارات ورتالىعىنان.

جۇمىس ساپارى بارىسىندا اكىم تاعى ءبىر سپورت نىسانى - زايسان قالاسىنداعى جاڭا يپپودرومعا باردى. وعان 1500  كورەرمەن سىيادى. بۇدان باسقا وندا كيىم ىلەتىن ورىن، جۋىناتىن بولمە، كوممەنتاتور بولمەسى، سۋديا مۇناراسى كوزدەلگەن. اۋدان اكىمى الماس ونداقانوۆتىڭ ايتۋىنشا، يپپودرومدى ات سپورتىن دامىتۋعا عانا ەمەس، يپپوتەراپيامەن اينالىسۋعا پايدالانۋدى جوسپارلايدى.

اۋداندى گازداندىرۋ ماسەلەسىنە باسا نازار اۋدارىلدى. وبلىس اكىمى زايسان تۇرعىندارىنىڭ گاز قۇبىرىنا تەزىرەك قوسىلۋ قاجەتتىگىن اتاپ ءوتتى.
 «ۋاقىت جىلدام، وتە شىعادى - قازان ايى ەرتەڭ- اق» ، - دەدى جاۋاپتى ادامدارعا ب. ساپاربايەۆ. - سوزا بەرۋگە بولمايدى. تاعى دا قايتالايمىن، ءبىرىنشى كەزەكتە تۇرعىن ۇيلەر گازداندىرىلۋى قاجەت» .

اۋدان باسشىلىعى ءوڭىر باسشىسىنىڭ نازارىن زايسان قالاسىنداعى تەمىر بەتون بۇيىمدار زاۋىتىن جاڭعىرتۋ جانە كەڭەيتۋ بويىنشا اۋقىمدى جوباعا اۋداردى، ول 3 كەزەڭمەن ىسكە اسىرىلادى جانە قۇرىلىس ماتەريالدارىن وندىرۋدە قازاقستاندىق قامتۋ ۇلەسىن ۇلعايتۋعا مۇمكىندىك بەرەدى. سونداي- اق، ساپار شەڭبەرىندە اكىم تەرموجاڭعىرتۋ جانە حالىقتى اۋىزسۋمەن قامتاماسىز ەتۋ جۇمىستارى، اۋدان كاسىپكەرلىگىن دامىتۋ، سۋارمالى جەرلەردى يگەرۋ بارىسىمەن تانىستى.

بۇدان باسقا بەردىبەك ساپاربايەۆ زايسان قالاسى مەكتەپ- ينتەرنات قۇرىلىسىندا بولدى. وقۋ ورنى 600 بالاعا ارنالعان. قۇرىلىس جۇمىستارى كەستەگە سايكەس ءجۇرىپ جاتىر، ونى پايدالانۋعا تاپسىرۋ مەرزىمى وسى جىلعى تامىزعا بەلگىلەنگەن.

اۋدان اكىمىنىڭ جۇرتشىلىقپەن كەزدەسۋى اياقتالدى، وندا ول اعىمداعى جىلعى 5 ايعا جۇمىس ناتيجەلەرى تۋرالى ەسەپ ۇسىندى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى