ءناپاقامدى بوكستان تاۋىپ جۇرگەن سوڭ، سپورتتان كەتكىم كەلمەيدى - ءبىرجان جاقىپوۆ

 تۋرنيردىڭ شيرەك فينالدىق كەزدەسۋلەرى اياقتالعاننان كەيىن «الاش ايناسىنىڭ» ءتىلشىسى بىرجانمەن جولىعىپ، سۇحباتقا تارتقان ەدى.

- ءبىرجان، الدىمەن پرەزيدەنت كۋبوگى ءتۋرنيرى تۋرالى ايتىپ بەرسەڭىز. قانداي دەڭگەيدە ءوتىپ جاتىر؟

 -  تۋرنير جوعارى دەڭگەيدە ءوتىپ جاتىر دەۋگە تولىق نەگىز بار. ويتكەنى، شەت ەلدەن كەلگەن بوكسشىلارعا قازاقستان بوكس فەدەراتسياسى بارلىق جاعدايدى جاساپ وتىر. بوكسشىلاردىڭ دەڭگەيى دە وسال ەمەس. اسىرەسە، كۋبا، وزبەكستان، فيليپپين، موڭعوليا ەلدەرىنىڭ سپورتشىلارى وتە مىقتى.

- حالىقارالىق تۋرنيرگە شىققاندا سىزدەردىڭ دە جاعدايلارىڭىزدى ءدال وسىلاي جوعارى دەڭگەيدە جاسايدى ما؟

 -  ارينە، قازىر AIBA بوكستىڭ دامۋىنا ەلەۋلى ۇلەس قوسىپ جاتىر عوي. ءبىز دە شەت ەلگە بارعاندا بىزگە دە ءدال وسىلاي جوعارى دەڭگەيدە جاعداي جاسايدى. ءبىراق، بارلىق ەلدەردە دەي المايمىن. ويتكەنى، بوكسى كەندە قالعان ەلدەردە قوناقتارعا دا قاتتى ءمان بەرىلمەيدى.

- الماتىدا وتكەن الەم چەمپيوناتىنان كەيىن قانشا ۋاقىت دەمالدىڭىز. قاشاننان باستاپ جاتتىعۋ جۇمىستارىنا كىرىستىڭىز؟

- الەم چەمپيوناتىنان كەيىن ۇزاق دەم العان جوقپىز. ەكى اي عانا شىعار. جەلتوقسان ايىنان باستاپ قايتا جاتتىعۋ جۇمىستارىنا كىرىسىپ كەتتىك.

- ال پرەزيدەنت كۋبوگى تۋرنيرىنە قايدا دايىندالدىڭىزدار؟

 -  پرەزيدەنت كۋبوگىنا ءبىز الماتىنىڭ ماڭىندا جۋىردا عانا اشىلعان AIBA- نىڭ اكادەمياسىندا دايىندالدىق. ۇلتتىق قۇرامامەن بىرگە. وتە كەرەمەت جەر ەكەن. بوكسشىلارعا بارلىق جاعداي جاسالعان. مۇنداي عيمارات وزگە ەلدەردە جوق دەسەم قاتەلەسپەيتىن شىعارمىن. سەبەبى، ءبىز قانشا ەلدە تۋرنيرگە باردىق. ءبىراق، مۇنداي جاتتىعۋ زالىن بايقامادىق.

- ايتپاقشى، ءسىز الەم چەمپيونى اتانعان سوڭ و ق و اكىمدىگى سىزگە پاتەر بەردى دەگەندى ەستىدىك. سول پاتەردى شىنىمەن الدىڭىز با؟ ويتكەنى، قازىرگى تاڭدا كوپتەگەن سپورتشىلاردىڭ پاتەرگە بايلانىستى باستارى داۋعا ۇشراپ ءجۇر.

-  پاتەردى الدىم. ءبىراق، ول مەنىڭ اتىمدا ەمەس، مەملەكەتتىڭ اتىندا تىركەۋدە تۇر. ساتىپ ال، جەكەشەلەندىرىپ ال دەگەن اڭگىمە بولعان جوق. مەملەكەتتىڭ اتىندا. ەگەر زاڭدا قانداي دا ءبىر وزگەرىس بولىپ كەتپەسە، ول جاقتا مەنىڭ تۇرا بەرۋىمە بولادى.

- ەندى كوپشىلىكتىڭ كوكەيىندە جۇرگەن ساۋالدى قويسام. كوپتەگەن بوكس جانكۇيەرلەرى الەم بىرىنشىلىگىن اياقتالعاننان سوڭ، ءسىزدى بوكستان كەتەدى دەگەن بولاتىن. ءبىراق، ءسىز ول كىسىلەردىڭ پىكىرىن جوققا شىعارىپ، قايتا جۇدىرىقتاسىپ ءجۇرسىز. سپورتتان قاشان كەتەتىن ويىڭىز بار؟

-  شىنى كەرەك، ونى وزىمدە بىلمەيمىن. ءار جىل باستالعاندا «وسى سوڭعى جىل، سوڭعى جىل» دەپ جۇرگەنىمە دە 5-6 جىل بولىپ قالىپتى. ەندى بوكستان ءناپاقامدى تاۋىپ جۇرگەن سوڭ، سپورتتان كەتكىم دە كەلمەيدى. سەبەبى، مەنىڭ قولىمنان بوكستاسقاننان باسقا ەشتەمە كەلمەيتىن سياقتى. بار ءومىرىمدى وسى بوكسقا ارناعان ادامبىز عوي. سوندىقتان بۇگىن نە ەرتەڭ كەتەمىن دەپ ايتا المايمىن. بۇيىرتقانىن كورە جاتارمىز.

- ءناپاقامدى بوكستان تاۋىپ ءجۇرمىن دەپ قالدىڭىز. قۇپيا بولماسا بوكسشىلاردىڭ جالاقىسى قانشا بولاتىنىن ايتىپ كەتسەڭىز ...

-  دەنەشىنىقتىرۋ جانە سپورت اگەنتتىگى ارى كەتسە 50-60 مىڭ تەڭگە بەرەتىن شىعار بوكسشىلارعا. بىزگە نەگىزى فەدەراتسيا كوپ كومەكتەسەدى. قازاقستان بوكس فەدەراتسياسىنىڭ بوكسشىلاردىڭ دەڭگەيىنە قاراپ بەرەتىن جالاقىلارى 2-3 مىڭ دوللاردىڭ كولەمىندە.

- كاسىپقوي بوكسقا اۋىسۋ تۋرالى ويلاپ كورمەدىڭىز بە؟

-  جوق. ونداي وي مۇلدە بولمادى.

- «استانا ارلاندارى» كومانداسىنىڭ شاقىرتۋ الدىڭىز با؟

- بىلتىر «ارلانداردىڭ» قاتارىنا شاقىرتۋ العان ەدىك. ۇلتتىق قۇراما ساپىنداعى بىرنەشە جىگىتتەرمەن بىرگە. ءبىراق، قۇرامانىڭ قاتارىندا جاتتىعۋ جۇمىستارىن جاساپ جۇرگەندىكتەن، ول جاققا بارا المادىق. ال، بيىل ول سەريانىڭ ءتورتىنشى ماۋسىمى اياقتالىپ قالدى. بەسىنشى ماۋسىمى جەلتوقساندا باستالادى دەپ ەستىدىم. ازىرشە، شاقىرتۋ العان جوقپىن. ءبىراق، «ارلاندار» قىركۇيەك ايىندا جينالادى عوي. سول كەزدە شاقىرتىپ جاتسا، بۇل ماسەلەنى دە ويلاستىرىپ كورەمىز.

- ۇلكەن سپورتپەن قوش ايتىسقان سوڭ، باپكەر بولۋعا قالاي قارايسىز؟

-  قارسى ەمەسپىن. ونىڭ ۇستىنە مەن م. اۋەزوۆ اتىنداعى وقو مەملەكەتتىك ۋنيۆەرسيتەتىنىڭ دەنە شىنىقتىرۋ فاكۋلتەتىن ءبىتىرىپ العانمىن. سپورتشى عۇمىرىمدى اياقتاعاننان كەيىن، باپكەر بولاتىن دا شىعارمىن. ويتكەنى، تاعى دا ايتايىن، ءبىز ءومىرىمىزدى تەك بوكسقا ارناعان ادامبىز.

- ەندى پرەزيدەنت كۋبوگىنا قايتا ورالساق، بۇل تۋرنيردە قازاقستان ءۇش قۇرامامەن ونەر كورسەتىپ جاتىر. دەمەك، ءار سالماقتا ءۇش بوكسشى دەگەن ءسوز. وسى ورايدا ءسىز ونەر كورسەتەتىن 49 كەلىدەگى ەل بوكسشىلارىنىڭ دەڭگەيى تۋرالى ايتىپ وتسەڭىز .. .

-  قۇرماعا شاقىرتىلعان جىگىتتەردىڭ بارلىعى دا وسال ەمەس. سايدىڭ تاسىنداي ىرىكتەلگەن. 49 كەلىدە تەمىرتاس ءجۇسىپوۆ پەن جومارت ەرجان دەگەن جىگىتتەر بار. سوڭعىسى كەشە پرەزيدەنت كۋبوگىنىڭ جارتىلاي فينالىنا شىقتى. ال، تەمىرتاس ءبىرىنشى اينالىمدا كۋبالىق بوكسشىعا جەڭىلىپ قالدى. وزىنەن نەگە جەڭىلىپ قالدىڭ دەپ سۇراسام -شامالى شارشاپ قالدىم دەيدى. ءبىراق، بۇل جىگىتتىڭ الەۋەتى زور ەكەنىنە مەن سەنىمدىمىن. جومارتتىڭ دا قارقىنى كۇشتى. الداعى ۋاقىتتا بۇل سالماقتاعى ءبىرىنشى ءنومىرلى بوكسشى بولۋعا وسى ەكى جىگىتتىڭ تالاساتىندىعىنا كۇمان كەلتىرمەيمىن.

- وزبەكستان قۇراماسىندا ونەر كورسەتەتىن حاسانباي دۋسماتوۆ تۋرالى نە ايتاسىز. بۇل بوكسشىمەن ءسىز الەم بىرىنشىلىگىندە كەزدەسىپ، وتە قيىن جەكپە-جەكتە جەڭگەن ەدىڭىز. دەگەنمەن حاسانبايدىڭ دەڭگەيى وتكەن جىلعا قاراعاندا ءوسىپ قالعان سياقتى .. .

-  حاسانباي مىقتى جىگىت. بىلتىر الەم چەمپيوناتى بارىسىندا شامالى تاجيريبەسى جەتىسپەي تۇرعان سياقتى ەدى. ەندى قاراپ وتىرساڭىز ونىڭ دەڭگەيى ءوسىپ، قارقىنعا-قارقىن قوسىپتى. دەگەنمەن، مەن دە قاراپ وتىرعان جوقپىن. كۇنىنە ەكى نە ءۇش جاتتىعۋ جۇمىستارىن جاساپ ءجۇرمىن. سوندىقتان دا بيىل مەن ونى تاعى جەڭەتىنىمەن سەنىمدىمىن.

- اڭگىمەڭىزگە راقمەت!

اۆتور: ۋاليحان قوسانباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى