ب ۇ ۇ: الداعى ەكى جىلدا نەگىزگى ازىق- تۇلىك ونىمدەرىنىڭ باعاسى تومەندەيدى
ال ەكى جىلدان كەيىن باعا 2008 - جىلعا دەيىن بولعان باعا دەڭگەيىندە تۇراقتالاتىن بولادى.
جاڭا باياندامانىڭ شىعۋىنا بايلانىستى ف ا و باس ديرەكتورى جوزە گراسيانۋ دا سيلۆا:
«ءبىزدىڭ بولجاۋىمىزشا ءداندى داقىلداردىڭ باعاسى الداعى ەكى جىل بارىسىندا تومەندەيدى. ەندى، ەت پەن بالىق ونىمدەرىنە قاتىستى جاعداي ءبىرشاما باسقاشا بولايىن دەپ تۇر. بۇل سالادا سۇرانىس كەرىسىنشە ارتا تۇسەدى» - دەدى.
نەگىزگى ءداندى داقىلداردىڭ الەمدىك باعاسى ارزاندايدى. جالپى ءداندى داقىلدار ادامدار ءۇشىن ءالى دە نەگىزگى ازىق- تۇلىك ونىمدەرى بولىپ قالا بەرمەك. الايدا، تۇرعىنداردىڭ تابىسىنىڭ ارتۋىنا جانە حالىقتىڭ قالالارعا شوعىرلانۋ ۇدەرىسىنىڭ جۇرۋىنە بايلانىستى اس مازىرىندە اقۋىزدىق تاعامداردىڭ، مايلار مەن قانتتىڭ ۇلەستەرى بارعان سايىن ارتادى.
ءسۇتتىڭ باعاسى ازداپ ارزاندايدى. ءۇندىستان ەۋرووداقتى باسىپ وزىپ، الەمدەگى ەڭ ءىرى ءسۇت ءوندىرۋشى مەملەكەتكە اينالادى. ول قۇرعاق مايسىزداندىرىلعان ءسۇتتى ءىرى كولەمدە ەكسپورتقا شىعارا الاتىن دارەجەگە جەتەدى.
ازيا ەلدەرىنىڭ ەت جانە ەت ونىمدەرىن سىرتقا شىعارۋ دەڭگەيى ساقتالدى. ويتكەنى ولارعا دەگەن سۇرانىس جوعارى. سوندىقتان ەتتىڭ باعاسى تۇسپەيدى. باعا وتكەن ونجىلدىقتاعى ورتاشا كورسەتكىشپەن سالىستىرعاندا جوعارى بولىپ قالا بەرمەك. وعان تەك ينفلياتسيانىڭ عانا ازداپ اسەرى بولۋى مۇمكىن. ال سيىر ەتىنىڭ باعاسى بارىنشا قىمباتتايدى دەپ كۇتىلۋدە!
بايانداما اۆتورلارىنىڭ ايتۋلارىنشا جەر شارى حالقىنىڭ سانى ارتىپ جاتىر. وسىعان بايلانىستى الداعى ون جىلدىقتا اۋىل شارۋاشىلىعى ونىمدەرىنە دەگەن سۇرانىس تا ارتا تۇسپەك. دەمەك اۋىل شارۋاشىلىعى ونىمدەرى ءوندىرىسى دە ۇلعايادى. بۇل ۇلعايۋدىڭ 75 پايىزى دامۋشى ەلدەردىڭ، ءبىرىنشى كەزەكتە ازيا مەن لاتىن امەريكاسى ەلدەرىنىڭ ۇلەسىنە تيەدى.
باياندامادا سونداي- اق بيووتىندى ءوندىرۋ جانە تۇتىنۋ دەڭگەيىنىڭ 50 پايىزعا ارتاتىندىعى ايتىلعان. بۇل نەگىزىنەن قانتتىڭ نەگىزىندە وندىرىلەتىن ەتانول مەن بيوديزەل ءوندىرىسىنىڭ وسۋىنە بايلانىستى بولماق. ەتانول باعاسى شيكى مۇناي باعاسىمەن قاتار وسەتىن بولسا، بيوديزەلدىڭ باعاسى وسىمدىك مايىنىڭ باعاسىمەن تىعىز بايلانىستى بولادى.
اۆتور: جاپپاربەرگەن ايبوتا
