الماتىدا ەسىرتكىنىڭ جاڭا ءتۇرى كوبەيىپ بارادى

 ءتىپتى ماريحۋانا مەن گەرويندى تۇتىناتىن ناشاقورلار سوڭعى ۋاقىتتا جاپپاي «لەگالكاعا» كوشكەن. ال قىتايدان كەلەتىن ەسىرتكىنىڭ وسى ءتۇرى باسقالارىنان 5-6 ەسە زيان دەيدى ماماندار.

33 جاستاعى ۆيتالي ەسىمدى ناشاقور 18 جاسىنان باستاپ ەسىرتكىگە تاۋەلدى. «لەگالكانى» ول ەكى جىل بۇرىن دوستارىمەن بىرگە تارتىپ كورىپتى. سودان بەرى، ەسىرتكىنىڭ جاڭا تۇرىنە «بايلانىپ» قالعان. ەندى دەنساۋلىعى مەن جۇمىسىنان ايىرىلىپ، اقىر سوڭىندا ەمدەلۋگە بەل بۋىپتى.

ۆيتاليي قازىر ناركولوگ مامانداردىڭ باقىلاۋىندا. ەسىرتكىگە دەگەن تاۋەلدىلىكتەن قۇلان- تازا ايىعىپ كەتۋى ءۇشىن ءالى دە ءبىراز ۋاقىت ەم الۋى قاجەت. ناركولوگيالىق ورتالىقتا ۆيتالي سياقتى ەم الىپ جاتقاندار جەتەرلىك. بارلىعى دا وسى «لەگالكانى» ارتىق مولشەردە قابىلداپ قويعان.

ەسىرتكىنىڭ بۇل ءتۇرى، نەگىزىنەن، قىتايدان كەلەدى ەكەن. ادامنىڭ جۇيكە جۇيەسىن زاقىمدايتىن «لەگالكانىڭ» اسەرى ناشا، ماريحۋانا جانە گەرويننەن 5-6 ەسەگە ارتىق. ونى قولدانعان ادام ەسىرتكىگە تەز تاۋەلدى بوپ قالادى. اقىل- ەسىنەن ايىرىلا باستايدى.

ايگۇل ەمبەرگەنوۆا، ناركولوگ- دارىگەر:

- ءبىر ەكى شەككەننەن كەيىن سونداي اۋىتقۋلار پايدا بولادى. ناۋقاستار وزىنە لايىق ەمەس ءىس- ارەكەتتەر جاسايدى. مىسالى تەرەزەدەن سەكىرىپ كەتەدى، ءوز- وزىنە قول جۇمسايدى. ءبىزدىڭ كلينيكادا ءبىر ەر بالا بولعان ءوزىنىڭ اناسىنىڭ كويلەگىن كيىپ دالادا جۇرەدى. بىردەڭە دەسەڭ الاق- جۇلاق ەتىپ، شوپكە تىعىلىپ ءوزىن جانۋار سياقتى ۇستايدى.

ەلىمىزدە ەسىرتكىنىڭ جاڭا ءتۇرىن قولداناتىندار نەگىزىنەن الماتىلىق جاستار ەكەن. ونى پايدالانعان ناشاقوردان ناركولوگيالىق سىناما الساڭ دا، ەسىرتكى شەككەنىن دالەلدەي المايسىڭ دەيدى دارىگەرلەر. سونداي- اق، «لەگالكانى» زاڭدى دەپ ۇعاتىندار دا از ەمەس. الايدا ونى پايدالانۋعا كەز- كەلگەن ەسىرتكى ءتۇرى سياقتى زاڭ بويىنشا تىيىم سالىنعان.

«KTK»  ارناسى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى