ەڭ قىمبات الەم چەمپيوناتى

ءسوزسىز، برازيلياداعى الەم چەمپيوناتى فۋتبول تاريحىنداعى ەڭ قىمبات بىرىنشىلىك بولعالى تۇر.

سەبەبى، بۇعان دەيىن الەم بىرىنشىلىگىن قابىلداعان ەلدەر 10 ميللياردتان كوپ شىعىندالماعان. برازيليانىڭ چەمپيوناتقا بولگەن 12 ميللياردتىڭ 3,6 ميللياردى جاڭا ستاديونداردى سالۋعا كەتكەن. ال، بيۋجەتتىڭ باسىم بولىگى قالاداعا ترانسپورت پەن جاڭا قوناق ۇيلەر سالۋعا جۇمسالعان.

سالىستىرمالى تۇردە الىپ قارايتىن بولساق، 2002 - جىلى فۋتبول تويىن قابىلداعان كورەيا مەن جاپونيا ەكەۋى بىرلەسە وتىرىپ 7,2 ميلليارد دوللارعا شىعىندالىپتى. ال، 2006 - جىلى گەرمانيا چەمپيوناتقا 7,7 ميلليارد جۇمساسا، 2010 - جىلى وڭتۇستىك افريكا رەسپۋبليكاسى 5,2 ميلليارد دوللار شاماسىندا شىعىن كورگەن كورىنەدى.

قاراپ وتىرساڭىز، برازيليا الەم چەمپيوناتىن وتكىزۋ ءۇشىن الدىڭعى مەملەكەتتەرگە قاراعاندا 2 ەسە كوپ قارجى جۇمساعان. ءدال وسى سيفرلاردى كورگەن مەملەكەتتىڭ تۇرعىندارى ەل بيۋدجەتىنىڭ باسىم بولىگى فۋتبولعا كەتىپ جاتقانى ءۇشىن قايتا-قايتا ەرەۋىلگە شىعىپ جاتىر.

الەم بىرىنشىلىگىنەن 4,5 ميلليارد دوللار كولەمىندە پايدا تۇسەدى

مۇنداي مالىمەتتى سان-پاۋلۋدا الەم بىرىنشىلىگىنە ارنالعان باسپا ءسوز جيىنىندا ف ي ف ا -نىڭ ۆيتسە-پرەزيدەنتى جەروم ۆالكە ءمالىم ەتتى. «الەم چەمپيوناتىنان 4,5 ملرد دوللار كولەمىندە پايدا تۇسەدى.

ف ي ف ا بۇل بايراقتى باسەكەنى وتكىزۋ ءۇشىن 2 ميلليارد دوللارعا جۋىق قارجى جۇمسادى. تۇسكەن پايدانىڭ 30 پايىزى قايىرىمدىلىق قورىنا جۇمسالاتىن بولادى»، - دەدى ۆالكە.

الدىڭعى الەم بىرىنشىلىكتەرىمەن سالىستىراتىن بولساق بۇل ارينە ۇلكەن كورسەتكىش. مىسالى سول 2002 - جىلعى كورەيا مەن جاپونيا بىرلەسىپ 1,906 ميلليارد، گەرمانيا - 2,343 ميلليارد ، ال و ا ف - 4,189 ميلليارد دوللار پايدا كورگەن.

دەسە دە، ءبىر نارسەنى ەسكەرگەنىمىز ابزال. پايدا رەتىندە تۇسكەن بۇل اقشالاردىڭ بارلىعى دا ەلدىڭ قازىناسىنا كەلىپ تۇسپەيدى. ولاردىڭ ءبىر بولشەگىن ف ي ف ا الەم بىرىنشىلىگىنە قاتىسقان كوماندالارعا، ەكىنشى بولىگىن قايىرىمدىلىق قورىنا، ءۇشىنشىسىن ءوزىنىڭ ەسەپ-شوتىنا سالادى.

برازيلياداعى ءبىر كۇن ءۇشىن قاراپايىم جانكۇيەر 500 دوللارعا شىعىندالادى

بۇعان دەيىن «الاش ايناسى» گازەتى الەم چەمپيوناتى كەزىندە ازىق-تۇلىكتىڭ باعاسى قىمباتتايتىنى تۋرالى جازعان بولاتىنبىز. ەندى سونى ناقتى دالەلدەرمەن كەلتىرەتىن بولساق، وڭتۇستىك امەريكاداعى ەڭ ءجيى ساتىلاتىن كايپيرينيا كوكتەيلى 10 دوللار (1800 تەڭگە) ، چيزبۋرگەر - 17 دوللار، ال قاراپايىم پيتستسانىڭ باعاسى 35 دوللارعا جەتكەن. بۇل ەۋروپامەن جانە امەريكامەن سالىستىرعاندا 2 ەسە، ال قازاقستانمەن سالىستىرعان 4 ەسە قىمبات دەگەن ءسوز.

ەلدەگى ەڭ قىمبات قالالاردىڭ ءبىرى ريو-دە-جانەيرو. بۇل قالادا ءبىر كۇن تۇنەپ شىعۋ ءۇشىن قوناق ءۇي سىزدەن 445 دوللار الادى. ەگەر، قوناق ءۇي جانە دە تۇرىپ-ءجۇرۋىڭىزدى ەسەپتەيتىن بولساق، وندا الەم بىرىنشىلىگى كەزىندە ءاربىر جانكۇيەر كۇنىنە 500-600 دوللارعا شىعىندالاتىن كورىنەدى.

فۋتبولشىلار دوپينگتى لوزاننادا تاپسىرادى

ارينە، قانداي سپورت بولماسىن ونىڭ باسىندا جانە اياعىندا مىندەتتى تۇردە سپورتشىلار دوپينگ باقىلاۋدان وتۋلەرى ءتيىس. الدىڭعى الەم چەمپيوناتتارىندا فۋتبولشىلار تەكسەرۋدەن بىرىنشىلىكتى قابىلداپ جاتقان ەلدە وتەتىن ەدى.

ءبىراق، ەندى برازيلياداعى چەمپيونات بارىسىندا سپورتشىلاردىڭ قاندارى شۆەيتسارينىڭ لوزاننا قالاسىندا تەكسەرىلەتىن بولادى. ويتكەنى، برازيليادا بولعان كوپتەگەن دوپينگ داۋىنا بايلانىستى حالىقارالىق دوپينگكە كۇرەس اگەنتتىگى (WADA) بۇل ەلدىڭ LADETEC زەرتحاناسىنىڭ ليسەنزياسىن الىپ تاستاعان بولاتىن.

الەم بىرىنشىلىگىنە قاتىساتىن بارلىق 736 فۋتبولشىدا مىندەتتى تۇردە دوپينگ سىناقتان وتۋلەرى ءتيىس. ەندى زەرتحانا لوزاننادا ورنالاسقاندىقتان دوپينگ سىناعى بىلاي وتەدى: الدىمەن سپورتشى قۇراماسىمەن بىرگە برازيلياعا كەلەدى، كەيىن كومانداسىمەن بىرگە WADA-نىڭ برازيلياداعى ورتالىعىندا قان تاپسىرادى. تاپسىرىلعان قاندار 33 ساعاتتىڭ ىشىندە شۆەيتسارياعا جەتكىزىلەدى.

ەسكەرە كەتەتىن ءجايت، الەم بىرىنشىلىگىنىڭ ءاربىر ماچتارىنان سوڭ، ەكى كوماندانىڭ كەز- كەلگەن ەكى ويىنشىسى دوپينگ سىناقتان ءوتۋى ءتيىس. ءبىراق، ەكى ويىنشىنى WADA مۇشەلەرى تاڭداپ الادى. ەگەر، فۋتبولشىنىڭ قانىنان قانداي دا ءبىر رۇقسات ەتىلمەگەن دارۋمەن تابىلسا ول بىردەن الەم بىرىنشىلىگىنەن الاستاتىلادى، سونداي-اق دوپينگتىڭ كۇشىنە قاراي فۋتبولدان دا شەتتەتىلەدى.

اۆتور: ءۋاليحان قوسانباي

BAQ. KZ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى