باتىستا ماسقارا بولعان مودەلەر رەسەيدى پانالادى
ءۇش جىل بۇرىن انتيسەميتتىك سوزدەرى ءۇشىن جانجالعا ىلىگىپ، ەندى ءسان الەمىنە قايتىپ ورالۋى مۇمكىن ەمەستەي كورىنگەن بريتاندىق مودەلەر دجون گاليانو قىزمەتىن جالعاستىرىپ جاتىر.
ۋكرايناداعى ارەكەتتەرى ءۇشىن باتىستىڭ سىنىنا ۇشىراپ رەسەيگە كەلگەن ديزاينەر گاليانو مامىردىڭ 22-كۇنى ماسكەۋ تۇبىندە وتكەن شوۋ كەزىندە رەسەيلىك «ل ەتۋال» كوسمەتيكا دۇكەندەرى جەلىسىنىڭ جاڭادان تاعايىندالعان كرەاتيۆ ديرەكتورى رەتىندە تانىستىرىلدى. كومپانيا گاليانونىڭ جاڭا جۇمىس ورنى تۋرالى تاراتقان باسپاءسوز حابارلاماسىن «دجون ورالدى» دەپ اتاعان. ريتەيلەردىڭ مالىمدەۋىنشە، مودەلەر «ل ەتۋال» (L'Etoile) برەندىن قۇرۋمەن اينالىسپاق.
گاليانونىڭ بۇل قىزمەتكە تاعايىندالۋىن جۇرت سان-ساققا جۇگىرتتى. كەيبىر كوممەنتاتورلار «انتيسەميتتىك كوزقاراستارىمەن تانىلعان الدەكىم ءوزىن ۋكراينا مەن باتىستا قايتا جاندانعان فاشيزمگە قارسى كۇرەسكەر رەتىندە كورسەتكىسى كەلەتىن رەسەيگە كوشىپ كەلدى» دەپ مىسقىلدايدى. ەندى بىرەۋلەر ءوزىنىڭ گەي ەكەنىن جاسىرمايتىن گاليانونىڭ جۋىردا عانا گوموسەكسۋاليزمدى ناسيحاتتاۋعا تىيىم سالعانى ءۇشىن باتىستىڭ سىنىنا ۇشىراعان رەسەيدى تاڭداۋىن ەرسى كورەدى.
850 فيليالى بار اسا ءىرى رەسەيلىك «ل ەتۋال» كوسمەتيكا جەلىسىنىڭ دەڭگەيى كەزىندە گاليانو جۇمىس ىستەگەن ايگىلى فرانتسۋز ءسان ۇيلەرى دارەجەسىنە جەتپەيدى.
ءبىراق انتيسەميتتىك سوزدەرى ءۇشىن باسى داۋعا قالىپ، Christian Dior كومپانياسىنداعى 15 جىلدىق ماڭىزدى قىزمەتىنەن ايىرىلىپ، باتىستان كەتكەن ديزاينەر جاڭا جۇمىسىنا ريزا سياقتى. ول رەسەيدىڭ يتار-تاسس اگەنتتىگىنە: «مەن ءۇشىن بۇل - مۇمكىندىك ءارى ۇلكەن سىناق. ونىڭ ناتيجەسى ادەمى ءارى شابىت شاقىرارداي بولادى دەپ ويلايمىن» دەدى.
پاريجدەگى ءبىر كافەدە ماس كەزىندە ناتسيستىك ديكتاتور ادولف گيتلەردى ماداقتاپ، ۇلتى ەۆرەي ەكى يتالياندىق ايەلدى مازاق ەتكەنى ءتۇسىپ قالعان ۆيدەو جاريالانعان سوڭ قازىرگى زامانداعى ەڭ دارىندى ديزاينەرلەردىڭ ءبىرى دەپ ەسەپتەلەتىن گاليانو قۋعىنعا ۇشىرادى.
كەيىنىرەك گاليانو ءوز قىلىعىن جۇمىستاعى شارشاۋمەن، ەسىرتكىگە تاۋەلدىلىكپەن بايلانىستىرىپ، كەمسىتۋ سوزدەرى ءۇشىن كەشىرىم سۇراعان. ءبىراق وعان بۇل سوزدەرى ءۇشىن جانە ءبىر جىل بۇرىنعى ناسىلشىلدىك شابۋىلى ءۇشىن 8 مىڭ 400 دوللار ايىپپۇل سالىندى. فرانتسيا ونى 2009-جىلى ماراپاتتاعان «قۇرمەت لەگيونى» مەدالىنەن ايىردى.
بىلتىر Vanity Fair جۋرنالىنا بەرگەن سۇحباتىندا گاليانو ەسىرتكى مەن ىشىمدىككە تاۋەلدىلىكتەن كۇرەسۋگە ماجبۇرلەگەن جانجالعا «العىس ايتامىن» دەپ مالىمدەگەن.
ماسكەۋ مەن باتىستىڭ اراسى ۋشىعىپ تۇرعان تۇستا رەسەي ءوز ەلىنىڭ ۇكىمەتىمەن جانجالداسقان جۇلدىزداردى پانالاتىپ جاتىر.
بىلتىر فرانتسيا ۇكىمەتى سالىق ساياساتىن كۇشەيتكەننەن كەيىن فرانتسۋز اكتەرى جەرار دەپاردە رەسەي ازاماتتىعىن الدى. ا ق ش بارلاۋ قىزمەتىنىڭ اگەنتى ءارى ەلىندە قۇپيا اقپاراتتى جاريا ەتكەنى ءۇشىن ىزدەۋ جاريالانعان ەدۆارد سنوۋدەن دە رەسەيدە باس ساۋعالادى.
ءبىراق سنوۋدەن رەسەيدە جۇرت كوزىنە تۇسپەي وقشاۋ ءومىر ءسۇرىپ جاتسا، دجون گاليانو جاڭا وتانىندا ءوزىنىڭ بۇرىنعى ءومىر سالتىنان باس تارتقىسى كەلمەيتىن سياقتى. ديزاينەر ماسكەۋدەگى ءبىر ءتۇنى 12 مىڭ دوللار تۇراتىن قوناق ءۇيدىڭ 370 شارشى مەترلىك پرەزيدەنتتىك ليۋكس ءنومىرىن جالداعان. ءبىر قىزىعى، بۇل قوناق ءۇي «ۋكراينا» دەپ اتالادى.
(ماقالا اۆتورى - ازاتتىق ءتىلشىسى كلەر بيگگ)
