پان گي مۋن ۇكىمەتتەردى جۇمىس ورىندارىن اشۋعا باعىتتالعان تۇراقتى ءوسۋ ساياساتىن قابىلداۋعا شاقىردى
"الەم ەكونوميكاسى 2008 -جىلعى قارجىلىق داعدارىستان ءالى ايىققان جوق. ب ۇ ۇ- نىڭ ەكونوميكالىق بولجامدارى جاعىمدى بولعانىمەن، جاھاندا كوپتەگەن ماڭىزدى ماسەلەلەر بار. مەنى جاستار اراسىنداعى جۇمىسسىزدىق ماسەلەسى قاتتى الاڭداتادى. ولار ءوز ارماندارىن ىسكە اسىرۋعا جانە ءبىزدىڭ ورتاق ىلگەرىلەۋىمىزگە ۇلەس قوسۋلارى ءتيىس. وسىعان بايلانىستى مەن ۇكىمەتتەرگە جۇمىس ورىندارىن اشۋعا باعىتتالعان تۇراقتى ءوسۋ ساياساتىن قابىلداۋعا شاقىرامىن"، - دەپ اتاپ ءوتتى ول.
"قازىرگى ۋاقىتتا ب ۇ ۇ الدىنا ءوزارا بايلانىستى 3 مىندەت قويدى. ونىڭ ءبىرىنشىسى - مىڭجىلدىق ماقساتتارىنا قول جەتكىزۋگە قاتىستى كەدەيلىكپەن كۇرەس. بۇل پروبلەمانى قازىرگى الەم ەلدەرى باستارىنان كەشۋدە. ەكىنشى مىندەت - 2015 - جىلدان كەيىنگى دامۋدىڭ جاھاندىق كۇن ءتارتىبىن قالىپتاستىرۋدان تۇرادى. ب ۇ ۇ مۇشە مەملەكەتتەر كەدەيلىكپەن ماسەلەسىن شەشۋ تۇراقتى دامۋدىڭ نەگىزى رەتىندە بولاتىن بولاشاق كۇن ءتارتىبىنىڭ باستى مىندەتىنە اينالۋى ءتيىس دەپ سانايدى. ال ورنىقتى دامۋ وعان نەگىز بولۋى شارت. ءۇشىنشى مىندەت - كليماتتىق جاعدايلار سالاسىندا ماقساتتى تۇردە ءتيىستى كەلىسىمدەر جاساۋعا باعىتتالعان. مەن 23 - قىركۇيەكتە نيۋ- يورك قالاسىندا شەشىمدەر مەن ءىس- قيمىلداردى جۇمىلدىرۋ ءۇشىن كليماتتىق ماسەلەلەرگە ارنالعان فورۋمدى شاقىرتۋدى جوسپارلاپ وتىرمىن. قازىرگى سىناقتار مەن وزگەرىستەر زامانىندا ەلدەردىڭ كوشباسشىلارى ادامداردىڭ جانە جالپى جەر شارىنداعى بۇكىل حالىقتاردىڭ يگىلىگىنە جۇمىستى بىرلەسە ىستەۋى جانە كەيىنگى ۇرپاققا مۇراسىن قالدىرۋى ءتيىس"، - دەدى ول بەينەحابارلامادا.
ايتا كەتەيىك، فورۋمنىڭ بۇگىنگى جۇمىسىنا ق ر پرەزيدەنتى ن. نازاربايەۆ قاتىسىپ، دەلەگاتتار الدىندا بايانداما جاساعان بولاتىن.
21 - مامىر كۇنى ەلوردادا باستالعان VII استانا ەكونوميكالىق فورۋمى ءوزىنىڭ اۋقىمى جىل سايىن كەڭەيىپ، ماڭىزى دا ارتىپ وتىرعانىن دالەلدەدى. ءۇش كۇنگە ۇلاساتىن القالى جيىنعا 15 مىڭنان استام دەلەگات قاتىسسا، سونىڭ ىشىندە، الەمنىڭ جۇزدەن استام مەملەكەتىنەن 130 دان استام سالالىق مينيسترلەر ات باسىن استاناعا ارنايى بۇرىپتى. وسىنىڭ ءوزى- اق ەلوردالىق الاڭنىڭ جاھاندىق اۋقىمىن اڭعارتسا كەرەك.
اۆتور: جاسۇلان جولدىبايەۆ
