پلاتونوۆ پايعامبار ما؟
وسى كۇنى بيلىك تىزگىنىن ۇستاعان باسشىلارىمىزدى كورگىمىز كەلسە ك ت ك تەلەارناسىنداعى «سلۋگي نارودا» باعدارلاماسىن ىزدەيتىن بولدىق.
ساعىنعاندىقتان ەمەس، وسى ەلدىڭ ازاماتى بولعاندىقتان بۇگىنگى بيلىك باسىنداعىلاردىڭ بەت-بەينەسىن كورىپ، كىم ەكەنىن بىلگىمىز كەلگەندىكتەن... قاراپايىم پەندەلىك قۇمارلىق.
ءبىر عاجابى، انشەيىندە «قازاقشا وقىمايمىن» دەپ كەرگيتىن اكىم-قارالارىمىزدىڭ ءبارى تەلەديداردى قوسساڭىز بولدى، پلاتونوۆ باس بەرەتىندەي سونىڭ الدىندا وتىرادى.
اڭگىمە - سول باياعى اڭگىمە. سۇراق تا -سان ەستىپ، ابدەن جاۋىر بولعان جاتتاندى سۇراق. تاڭسىق تۇگى جوق، سوندا دا كورگىمىز كەلەدى...
سونداعىمىز -عايىپتان تايىپ جۋرناليست الدىندا «جان سىرىن» اقتارىپ وتىرعان باسشى-قوسشىلارىمىز جاعىمدى بىردەڭە ايتىپ قالا ما دەگەن اڭعال ءۇمىت. وكىنىشكە قاراي، ازىرگە ايتا قالارلىقتاي ەشتەڭە جوق. باياعى جىر، باياعى بىلىق!..
«بالىق باسىنان ءشىريدى» ... بۇگىندە پلاتونوۆتان باسقانى كوزگە ىلمەيتىن «كوسەمدەرىمىز» تۇگىل، قاتارداعى قاراپايىم شەنەۋنىكتەرىمىزدىڭ ءوزى قازاق تەلەديدارىن كورىپ، قازاق باسىلىمدارىن وقىمايدى. سەنبەسەڭىز سۇراپ كورىڭىز!..
نەگە؟ .. بۇعان سەبەپ كوپ. دەگەنمەن، بۇل - بولەك اڭگىمە...
الايدا، ايتا كەتەر ءجايت، اينالىپ كەلگەندە ءبارى سول بيلىك باسىنداعىلارعا تىرەلەدى.
قوش، سونىمەن ءبىزدىڭ باسشىلارىمىز پلاتونوۆقا نەگە قۇمار؟ ونىڭ باعدارلاماسىنا اكەسى ءتىرىلىپ كەلگەندەي تۇرا شاباتىنى نەلىكتەن؟
كەزىندە قازاق تەلەجۋرناليستەرى مينيسترلەرىمىز بەن ءبىرىنشى سالا باسشىلارىنىڭ قازاق تىلىندەگى حابارلارعا كەلگىسى كەلمەيتىندىكتەرى جايىندا كوپ جازدى. سەبەبى ايتپاسا دا تۇسىنىكتى!..
ال ەندى سول «مىقتىلارىمىز» ك ت ك شاقىرسا بولدى، قوس وكپەسىن قولىنا الىپ نەگە جەتىپ بارادى؟!
سىيلاۋ - قورقۋدىڭ تاساسىندا... جەتپىس جىل بويى ايتسا كونىپ، الداسا سەنىپ باس شۇلعۋعا ۇيرەنگەن ءبىزدىڭ باسشىلارىمىز بويىنداعى قورقىنىشتان ءالى-ءازىر ارىلا المايدى. جانە، ەڭ سوراقىسى، ودان ءتىپتى ارىلعىسى دا كەلمەيدى!.. بۇنى ءبىر دەڭىز...
ەكىنشى: بيلىك باسىنداعىلار اراسىندا ءوز ويىن قازاقشا تۇسىنىكتى تىلمەن تولىق جەتكىزە الاتىن باسشىلار ساۋساقپەن سانارلىق. سوسىن ولار پلاتونوۆقا بارماعاندا كىمگە بارادى؟..
ءۇشىنشى: بىرەۋدىڭ قاڭسىعى-بىرەۋگە تاڭسىق... «قازاق جۋرناليستيكاسىنىڭ دەڭگەيى تومەن دەپ» ولار ءبىزدى مەنسىنگىسى كەلمەيدى. الايدا، كىمدى كىم مەنسىنبەيتىنى-داۋلى ماسەلە!..
تىزە بەرسەك سەبەپ كوپ. دەگەنمەن، ءدال قازىر ماسەلە وندا ەمەس... اڭگىمە - اكىم- قارالارىمىزدىڭ ەرتەڭ دۇنيە تەرىس اينالعان كۇنى، سول ءوز سۇحباتتارىنىڭ وزدەرىنە تاياق بوپ تيەتىنىن تۇسىنبەيتىن ناداندىعىندا.
ورىس ءتىلدى اقپارات قۇرالدارىنىڭ (سونىڭ ىشىندە ك ت ك تەلەارناسى دا بار) كىمنىڭ سويىلىن سوعاتىنى ايتپاي-اق بەلگىلى. بۇعان دالەل-كەشەگى «اڭىز ادام» جۋرنالىنا بايلانىستى كوتەرىلگەن ايقاي- شۋ. ءبىراق بۇل-بەر جاعى. «قۋىرداقتىڭ كوكەسىن تۇيە سويعاندا كورەسىز» ...
پلاتونوۆتىڭ تالانتتى تەلەجۋرناليست ەكەنىنە ەشقانداي داۋىمىز جوق. ءبىراق ودان ارتىق بولماسا، كەم تۇسپەيتىن قازاق جىگىتتەرى دە از ەمەس. ماسەلەن، كەشەگى «شىننىڭ ءجۇزى» مەن «كوكپار» -دى جۇرگىزگەن قاسىم امانجولوۆ پەن سەرىك جانبولاتتى الايىق... كىمنەن كەم ەدى؟ !
تەك ءبىزدىڭ «تەكتىلەرىمىز» باسقاعا جەرىك!..
ايتەۋىر سول شاقىرسا بولدى، تايلى- تاياعى قالماي تۇرا جۇگىرەدى... سونشالىق ول كىم، پايعامبار ما؟!
جاقىندا ۇساق شارۋامەن كورشىمنىڭ ۇيىنە كىرسەم، تەلەديداردان «سلۋگي نارودا» حابارى ءجۇرىپ جاتىر ەكەن. جۇرگىزۋشى-ارتۋر پلاتونوۆ، قوناق - باۋىرجان بايبەك. نەمەرەسىنىڭ مۋلتفيلم كورگىسى كەلدى مە، «بالاپان» ارناسىنا اۋىستىرعىسى كەلدى. اتاسى: «كۇنىم، قويا تۇر، تىڭدايىق!.. نۇر- وتان پارتياسىنىڭ باسشىسى سويلەپ جاتىر»، - دەپ زورعا كوندىردى. سالدەن سوڭ نەمەرەسى كۇتپەگەن جەردەن: «اتا، ول كىم؟ مىناۋ ما؟ »-دەپ پلاتونوۆتى كورسەتسىن.. .
بالا قايدان بىلەدى، ويى دا، بويى دا، ءوزى دە، ءسوزى دە سوعان كەلەدى... ونىڭ قاسىندا ءبىزدىڭ بالامىز شاكىرت سياقتى، ال ول-ءپىر.. . ەندى قايتسىن؟!
تۇرماعانبەت كەنجەبايەۆ
«ۇلت» سايتى
