قازاقستاننان گورى شەتەلدە دەمالۋ نەگە ارزان؟
وتكەن اپتا بەكىتىلگەن تۋريزمدى دامىتۋدىڭ 2020-جىلعا دەيىنگى تۇجىرىمداماسىندا وسى ماقسات قويىلعان. تۋريستەر مەن ساراپشىلار ونىڭ ورىندالاتىنىنا سەنبەيدى.
Facebook الەۋمەتتىك جەلىسىندەگى Azamat Ashimov دەگەن قولدانۋشىنىڭ قازاقستاننىڭ بۋرابايى مەن تۇركيانىڭ الانيا كۋرورتىندا دەمالۋ قۇنىن سالىستىرعان جازباسى ۇلكەن تالاس تۋدىردى.
اۆتور كەلتىرگەن اقپاراتقا قاراعاندا، جولداما قۇنىنا ترانسفەر (كۇتىپ الۋ- شىعارىپ سالۋ) قىزمەتى كىرمەيتىن، تاڭعى اس قانا بەرەتىن قازاقستاندىق قوناق ۇيدە 10 كۇن دەمالۋ تۇرىك قوناق ۇيىندەگى «ءبارى ەسەپتەلگەن» دەمالىستان شامامەن ءبىر جارىم ەسە قىمبات.
الماتىلىق تۇرعىن اسەل ساندىباتوۆا الەۋمەتتىك جەلىدەگى جازبانى كورگەن، ءارى ول - قالتاسىنداعى اقشاسىنىڭ ەسەبىن جاقسى بىلەتىندەردىڭ ءبىرى. الماتى قالاسىنداعى مەكتەپتەردىڭ بىرىندە حاتشى بولىپ ىستەيتىن بويجەتكەن جازعى دەمالىسىن تۇركيادا وتكىزبەك.
- بۋرابايدىڭ جولداما باعاسىن كورگەندە قايران قالدىم. 10 كۇندىك جولداما 350 مىڭ تەڭگە تۇرادى. جولداما قۇنىنا تاماقتان تاڭعى اس قانا كىرگەن. جول شىعىنىن ءوزىڭ كوتەرەسىڭ. ال ويىن- ساۋىققا قوسىمشا اقشا تولەۋگە ءتيىسسىڭ، - دەيدى اسەل ساندىباتوۆا ازاتتىق تىلشىسىنە.
Facebook قولدانۋشى Azamat Ashimov-تىڭ فوتوكوللاجى:
بەس تۋريستىك كلاستەر
تابىسى ورتاشا قازاقستاندىقتار ازىرشە شەتەلدە دەمالعاندى ءجون كورەدى. ال ەل ۇكىمەتى ىشكى تۋريزمدى دامىتۋ عانا ەمەس، قازاقستانعا شەتەلدەن تۋريستەردى تارتۋ جوسپارىن دا مالىمدەدى. ۇكىمەت تۋريستىك سالانى 2020-جىلعا دەيىن دامىتۋ تۇجىرىمداماسىن جاريالادى.
تۇجىرىمداما جالپى ىشكى ونىمىندەگى (ج ءى و) تۋريزمنىڭ ۇلەسىن 3 پايىزعا دەيىن، تۋريزم سالاسىنان تۇسەتىن كىرىستى 10 ميلليارد 200 ميلليون دوللارعا دەيىن، ال ەلگە كەلەتىن تۋريستەر سانىن 8 ميلليون 500 مىڭ ادامعا دەيىن جەتكىزۋ سياقتى ۇلكەن مىندەتتەر قويىپ وتىر.
تۇجىرىمدامانى تانىستىرعان يندۋستريا جانە جاڭا تەحنولوگيالار ۆيتسە- ءمينيسترى نۇرلان ساۋرانبايەۆ ەلدەگى دەمالىستىڭ قىمباتقا تۇسەتىنى تۋرالى Facebook جەلىسىندەگى پوستقا كوممەنتاري بەرۋىن سۇراعان جۋرناليستەرگە «باعاداعى الشاقتىقتى وڭاي تۇسىندىرۋگە بولادى» دەپ جاۋاپ بەردى.
كادەسىي ساتۋشى. بۋراباي دەمالىس ايماعى، 22 - ماۋسىم 2013 - جىل. (كورنەكى سۋرەت)
شەنەۋنىكتىڭ پىكىرىنشە، بۋراباي كۋرورتىنىڭ ورتاشا جىلدىق جۇكتەمەسى 24 پايىز، سوندىقتان قازاقستاندا تۋريزمدى جىل بويى جۇمىس ىستەيتىن سالاعا اينالدىرۋ كەرەك.
- سول كەزدە جازعى ءۇش ايدىڭ كىرىسى بۇكىل كەزەڭگە بولىنەدى. قازىر ينفراقۇرىلىم مەملەكەت ەسەبىنەن سالىنادى. بۇرىن بۇل پروبلەمالاردى تۋريستەردىڭ موينىنا ارتاتىن. بۇل باعدارلاما 2020-جىلعا دەيىن جۇرگىزىلەدى، ونى ءبىر جىلدىڭ ىشىندە اتقارا المايمىز، - دەيدى نۇرلان ساۋرانبايەۆ.
يندۋستريا جانە جاڭا تەحنولوگيالار مينيسترلىگى تۇجىرىمداماسىندا بەس تۋريستىك كلاستەر قۇرۋ قاراستىرىلعان. كونتسەپتسياعا سايكەس، استانا قالاسى (بۋراباي، شۋچە- بۋراباي كۋرورت ايماعى) تۋريزم ورتالىعىنا، الماتى ىسكەرلىك جانە حالىقارالىق تۋريزم ورتالىعىنا («كوكجايلاۋ» تاۋ شاڭعىسى كۋرورتى جوباسى) اينالادى. شىعىس قازاقستان ەكولوگيالىق تۋريزمدى دامىتۋ ورتالىعى («بۇقتىرما»، «كاتون- قاراعاي» جوبالارى قاراستىرىلعان) بولادى. وڭتۇستىك قازاقستاندى مادەني تۋريزم، ال باتىس قازاقستاندى مادەني جانە جاعاجاي تۋريزمىنە («كەندىرلى» جوباسى) اينالدىرۋ كوزدەلگەن.
شەتەلدىك تۋريستەر جانە قامىس
الماتىداعى تۋريستىك كومپانيا وكىلدەرى ازاتتىققا ۇكىمەت كونتسەپتسياسىنىڭ ىسكە اسىپ، قازاقستانعا شەتەلدىك تۋريستەردىڭ اعىلاتىنىنا سەنبەيتىندەرىن ايتتى. «اي ترەۆەل» تۋريستىك اگەنتتىگىنىڭ ديرەكتورى عاليا ءىزباستوۆا ازاتتىق تىلشىسىنە:
- ءبىز كوشپەلى تۋريزممەن اينالىسامىز. شەتەلدە ءبىزدىڭ تۋريستەردى قۋانا قارسى الادى. قازاقستاندىق قوناقۇيلەرمەن سالىستىرعاندا، ولاردا باعا دا ارزان، ينفراقۇرىلىمى دا جاقسى. قازاقستان قوناقۇيلەرىندە باعا تىم قىمبات، ال وركەنيەتتىڭ ءىزى دە جوق، - دەيدى.
تۋريستەر تۇسەتىن كيىز ۇيلەر. قازاقستان، 2012-جىلدىڭ جازى.
عاليا ءىزباستوۆا «قازاقستانداعى شارىن شاتقالىندا ءتىپتى ءجونى ءتۇزۋ اجەتحانا، قاراپايىم جۋىناتىن دۋش، كەمپينگ جوق. شەتەلدىك تۋريستەردى اپارعان كەزدە قاتتى ۇيالامىز» دەيدى.
تۋريستىك اگەنتتىك ديرەكتورىنىڭ ايتۋىنشا، شەتەلدىكتەر شىمبۇلاق، مەدەۋ، كوكجايلاۋدى جاقسى بىلەدى. ءبىراق ولاردىڭ باعاسى قىمبات. مەدەۋدەن شىمبۇلاققا دەيىن اسپالى جولمەن كوتەرىلۋ باعاسى - ءۇش مىڭ تەڭگە. كولساي مەن تۇرگەن سارقىراماسىنداعى ينفراقۇرىلىم دا ناشار.
- قوناقۇيدىڭ باعاسى قىمبات بولعان سوڭ شەتەلدىكتەر جەرگىلىكتى تۇرعىنداردىڭ ۇيىندە تۇرادى. كولىك جۇرگىزۋشىسى مەن اسپازدىڭ اقىسىن بولەك تولەيسىڭ. قىرۋار اقشا كەتەدى، ءبىز تيىن- تەبەن تابامىز. بۇل شارۋانى كىم، قاشان قولعا الادى - ول بەلگىسىز، - دەيدى عاليا ءىزباستوۆا.
الماتى قالاسىنداعى قازاق سپورت جانە تۋريزم اكادەمياسىنىڭ بۇرىنعى وقىتۋشىسى سادەن امانتايەۆ «قازاقستاندا ينفراقۇرىلىم جاقسارىپ، جولدار جوندەلىپ، جاڭا قوناقۇيلەر سالىنىپ جاتىر. ءبىراق شەتەلدىكتەردى تىم قىمبات باعا ۇركىتەدى» دەپ ەسەپتەيدى.
- بۇل جاعىنان العاندا وزبەكستان مەن قىرعىزستاننان كوپ ۇتىلامىز. مەملەكەت نارىقتا ساتۋشى بولا المايدى. ول تۋريستىك بيزنەستى دامىتۋدان تۇسكەن پايدادان پايىزىن الىپ وتىراتىن اكتسيونەر عانا بولۋى ءتيىس. قازاقستاندا ترانسپورت، قوناقۇي، مەيرامحانا قىزمەتتەرى تىم قىمبات. اۆيابيلەت قىمبات، بۇل سالانى مەملەكەت دۇرىس باقىلامايدى، - دەيدى سادەن امانتايەۆ ازاتتىق تىلشىسىنە.
تۋريستەر ءجيى باراتىن الماتى ماڭىنداعى اسى جايلاۋى. قۇرت جايىپ جاتقان ايەلدەر. 31 - ماۋسىم 2013 - جىل.
سادەن امانتايەۆتىڭ ايتۋىنشا، قازاقستاندا كەشەندى بولجاۋ، كاسىبي گيدتەر جوق، تۋريستەرگە بىلىكتى قىزمەت كورسەتىلمەيدى. مۇنىڭ ءبارى ەلدىڭ بەدەلىن تۇسىرەدى. قىزمەت تۇرلەرىنىڭ جۇتاڭدىعى مەن كۋرورت قوناقۇيلەرىندەگى قىمبات باعا قازاقستانعا كەلەتىن تۋريستەردى ۇركىتەدى.
قازىر قازاقستاندا بۋراباي، سارى اعاش، الاكول سياقتى تانىمال 15 دەمالىس ايماعى بار. قازاقستاننىڭ وڭتۇستىگىندەگى سۋمەن ەمدەيتىن ايگىلى «سارى اعاش» شيپاجايىندا دەمالۋ تاۋلىگىنە 7-15 مىڭ تەڭگە تۇرادى. الماتى ماڭىنداعى «التىن قارعالى» ساناتوريى- قوناقۇيىندە باعا - تاۋلىگىنە 15-32 مىڭ تەڭگە.
الما كەنجەبەكوۆا
