قىرىم تاتارلارى ۇدەرە كوشۋدە
بۇل تۋرالى ب ۇ ۇ جانىنداعى ۋكراينانىڭ وكىلى يۋري سەرگەيەۆ ءمالىم ەتكەن.
ۋكراينا وكىلى بۇل مالىمەتتى ب ۇ ۇ نيۋ يوركتەگى شتاب- پاتەرىندە جەرگىلىكتى تاتارلاردىڭ 1944-جىلى تاريحي وتانىنان دەپورتاتسيالانعانىنا 70-جىل تولۋىنا وراي وتكەن سالتاناتتى شارا بارىسىندا جاريالاپ وتىر.
قىرىمدىق تاتارلار مۇنداي شەشىمگە «جارتىلاي ارالدى باسىپ الۋشىلار تاراپىنان كورگەن قىسىمنان كەيىن» بارعان. تاتارلاردى ءجون-جوسىقسىز تەكسەرۋشىلەر دە، ولاردى قورقىتىپ- ۇركىتەتىندەر دە كوپ بولىپ وتىرعان كورىنەدى. ماسەلەن، قۋعىن- سۇرگىن قۇرباندارىن ەسكە الۋعا ارنالعان شاراعا قىرىم تاتارلاردىڭ كوشباسشىسى مۇستافا جەميلەۆ جىبەرىلمەگەن ەدى.
كەشە، 18-مامىردا سيمفەرەپولدە قىرىم تاتارلارىنىڭ دەپورتاتسيالانعانىنا 70-جىل تولۋىنا وراي قارالى جيىن ءوتتى. جيىنعا قاتىسۋشىلار، ۇلتتىق- ايماقتىق اۆتونوميا مارتەبەسىن انىقتاۋعا ارنالعان «قىرىم تاتارلارىنىڭ وزدەرىنىڭ تاريحي اۋماعىندا ءوزىن ءوزى باسقارۋ قۇقىعىنا يە بولۋعا مۇمكىندىك بەرەتىن» رەزوليۋتسيا قابىلدادى.
ودان بولەك قىرىم تاتارلارى جارتىلاي ارالعا جەرگىلىكتى ۇلتتىڭ دەپورتاتسيالانعانعا دەيىنگى تاريحي اتاۋىن قايتارۋ قاجەتتىگىن، قىرىم بيلىگىندە تاتار وكىلىنىڭ بولۋىن ماقۇلدايتىن ارنايى زاڭ قابىلداۋ كەرەكتىگىن، قۇرىلتاي مەن مەدجليستى قىرىمنىڭ نەگىزگى حالقىنىڭ وكىلەتتى ورگانى رەتىندە مويىنداۋدى تالاپ ەتكەن.
«اباي- اقپارات»
