اسكەرگە شاقىرىلۋشىلاردىڭ دەنساۋلىعىنا قويىلاتىن تالاپ وزگەردى

وسى رەتتە كەيبىر بولاشاق ساربازدار مەديتسينالىق تەكسەرۋگە الدىن الا شاقىرىلىپ جاتىر. ويتكەنى، وتان الدىنداعى بورىشىن وتەۋشىلەردىڭ دەنساۋلىعىنا قويىلار تالاپ وزگەرگەن.

بۇعان دەيىن جىگىتتەردىڭ اسكەرگە جارامسىز دەپ تابىلۋىنا نەگىز بولعان كەيبىر اۋرۋلار قازىر تىزىمنەن الىنىپ تاستالىندى.

الدىن سوزىلمالى اسقازان اۋرۋىمەن (گاستريت) اۋىراتىن بولاشاق ساربازدىڭ اسكەرگە بارۋى ءۇش جىل كەيىنگە قالدىرىلسا، قازىر ول مەرزىم قىسقارعان.

ون ەكى ايدان سوڭ، دياگنوز قايتا راستالۋى قاجەت.

سونداي- اق، ەكىنشى دارەجەلى مايتاباندىلىق اسكەردەن قۇتقارمايدى.

دەنساۋلىق ساقتاۋ مينيسترلىگىمەن كەلىسىلگەن قورعانىس ءمينيسترىنىڭ بۇيرىعى بويىنشا، جاستار بەلگىلى ءبىر شەكتەۋلەرمەن اسكەري قىزمەتكە جارامدى سانالادى. ءدال وسىنداي وزگەرتۋلەر لور، كارديولوگيالىق اۋرۋلارعا دا قاتىستى بولىپ وتىر.

وبلىستىق اسكەري كوميسساريات مەدكوميسسياسىنىڭ اعا دارىگەرى يگور جۋراۆكيننىڭ وسى سالادا جۇرگەنىنە 30 جىل بولىپتى. وسى ۋاقىت ارالىعىندا بولاشاق بورىشىن وتەۋشىلەردىڭ وزدەرىنە دە، ولاردىڭ دەنساۋلىعىنا دا تالاپتار وزگەرتىلگەن.

«سوزىلمالى دەرتتەرى بار جىگىتتەر كوبەيدى. قانت ديابەتى، جۇرەك قان تامىرلارى جۇيەسى، تىنىس دەمىكپەسى، جۇيكە جۇيەسىنىڭ دامۋىندا اقاۋلارى، ومىرتقاسىندا پاتولوگياسى بار جاستار كوپ»، - دەدى ول.

دەسە دە، اسكەري كوميسسارياتتاعىلار مەديتسينالىق تالاپتاردىڭ وزگەرۋى اسكەرگە شاقىرىلۋشىلاردىڭ سانىنا اسەر ەتپەگەنىن اتاپ ءوتتى.

«اسكەرگە شاقىرۋشىلار دەنساۋلىعىنا قويىلار تالاپتاردىڭ وزگەرۋى تۋرالى بۇيرىقتا قانداي پاتولوگيالىق اۋرۋلارمەن بورىش وتەۋگە بولاتىنى ناقتىلانعان. ويتكەنى، اۋرۋدىڭ الدىن الۋ شارالارى جاقساردى» ، - دەدى يگور جۋراۆكين.

ەسكە سالا كەتەيىك، كوكتەمگى اسكەرگە شاقىرۋ ماۋسىم ايىنىڭ سوڭىنا دەيىن جالعاسادى.

Baq.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى