تەكتى قىزدى قالاي تانۋعا بولادى؟
جاقسى ءسوز كەمشىن. سوسىن پسيحولوگيالىق سارىنداعى زەرتتەۋلەردى اقتارىپ شىقتىق. جاقسىنى تانۋ قيىن ەمەس دەيدى ولار.
تانۋعا تالپىنىس بولسا بولعانى. كوز كەرەك.
كوكىرەگى وياۋ ادام وزىنە لايىعىن اداسپاي تابادى.
دەگەنمەن، بۇگىنگى تاقىرىپ - تەكتى قىزدى قالاي تانۋعا بولادى؟
كوپ جىگىتتەر جاقسى قىز جوق دەپ اۋزىن قۋ شوپپەن سۇرتكەندى وڭتايلى سانايدى. اقتارىپ شىققان فورۋمداردان ءبىر مىسال كەلتىرەيىك.
«مەدەت، 26 جاس: وقۋ وقىعان نەشە جىلدا تالاي قىزعا عاشىق بولدىم، ءبىراق ءبىرى دە جاقسى ەمەس بولىپ شىقتى. جاتاقحاناعا بارساڭ، قىزداردىڭ ءبارى تەگىن زاتتاي. ولارعا قاراپ ۇيلەنگىم كەلمەيدى. قىز تابۋ قيىن. ءبارى جۇرگىش» .
قىزداردىڭ دا ايتارى وسى تەكتەس لاج. ال، وسىنداي دايەكتەرگە قاراپ، ەشكىم ۇيلەنبەي قالمايدى ەمەس. زاماندى بۇزاتىن ادام. جاقسى انادان الا دا تۋادى، قۇلا دا تۋادى. ءار ادام ىزدەگەنىن تابادى.
ال، كوكىرەگى جاقسىنى تانىماسا، ونى كىمنەن كورەدى؟ حاديستە دە ايتىلعان ءار ادام ءوزى قانداي بولسا، قوساعى دا سونداي بولماق دەپ. ياعني، زيناقورعا زيناشى ايەل، جۇرەگى تازا ادامعا تەكتى قىز بۇيىرماق. بارلىق يگىلىك ءناپسىنى تىيا بىلۋدەن.
كىم جاقسى قىزدى جولىقتىرىپ، جاقسى جار قۇشقىسى كەلمەيدى؟ ءبىراق بەس ساۋساق بىردەي ەمەس قوي...
ايەل زاتى دا ادام بالاسى عوي. ول دا وزگەرۋگە بەيىم. «قىز كۇنىندە ءبارى جاقسى، جامان قاتىن قايدان شىقتى» دەمەكشى، تەكتىنى تاني الىپ ءجۇرمىز بە؟ قاتىپ قالعان دۇنيە جوق، اركىم وزگەرە الادى. كىم قالاي وزگەرىپ جاتىر؟ قاناتسىز جاردان سورلاعان ادام از با؟ تاۋقىمەتتى تاعدىرلار، توقىراعان سەزىمدەر قانشاما؟..
اجىراسۋ بەلەڭ الىپ تۇرعان زامان سارىنى بۇل سولقىلداق تاربيە كەسىرىنەن دەگەن پايىمداۋلاردى العا تارتادى. جاقسى جار جوق دەيتىن ءبىرجاقتى پىكىرلەر تولاسسىز. ءبىراق بۇل تاربيە كورگەن، ونەگەلى قىزدار جوق دەگەن ءسوز ەمەس قوي. «ون مىڭنان بالكىم، ەكى ادام...»
ادام بالاسى تۇستىك ءومىرى بولسا، كەشتىك مال جينايتىن ادەتىنەن تانبايدى. «سەنىمدىلىك. كۇندەلىكتى قانشاما ادام قياناتتان جاپا شەگىپ، ۋايىم-قايعىمەن ءومىر ءسۇرىپ، ءبىر-بىرىنە ماعىناسىز مۇڭ سىيلايتىنىن كورىپ-بىلسەك تە، مۇنداي قاتەلىككە ءوزىمىز دە ۇرىنىپ قالۋىمىز مۇمكىن ەكەنىن تولىققاندى ءتۇسىنىپ تۇرساق تا، بارىمىزدە ۇيلەنۋگە اسىعامىز» دەيدى شىعىس دانالىعى.
سونىمەن، تەكتى قىزدى قالاي تانيمىز؟ باتىس عالىمدارى قىز بالانى سىرت قىلىقتارىنان-اق تانۋعا بولادى دەپ ەسەپتەيدى ەكەن. ءبىرقاتار بەلگىلەرىن دە انىقتاپ، جۇيەلەپتى. زەر سالعان ادام ءتۇيسىنۋى دە، كورىپ جۇرگەن قىز بالاسى تۋراسىندا بۇكىل وي-پىكىرىن وزگەرتۋى دە مۇمكىن. اتالمىش زەرتتەۋ ناتيجەسىن كوزى قاراقتى وقىرمان نازارىنا ۇسىنۋدى ءجون دەپ بىلدىك.
بىرىنشىدەن، قىز بالانىڭ كوركى - ول سىپايىلىعى. قازىرگى زاماندا اسا ماڭىزدىسى - سىرتقى سىپايىلىعى. كيىم كيىسى، بويانا ءبىلۋى. سىپايى قىزدار ۇنەمى اۋرەت جەرلەرىن جاۋىپ جۇرەتىن كيىم ۇلگىلەرىن تاڭدايدى. ازداعان قيىعى بار كويلەكتەرگە قارسى بولماسا دا، ءوڭىرى اشىقتاۋىن سيرەك كيەدى. ايەل زاتى سەكسۋالدى بولۋى كەرەك.
ءبىراق ونى اشىق تۇردە كورسەتپەۋگە ءتيىس. اياق كيىم تاڭداۋدا وكشەسى بارىنا دەن قويادى. ءبىراق ءبىز وكشە ەمەس. ول تىم انايى كورىنەدى.
ەكىنشىدەن، ءتۇس تاڭداي ءبىلۋى. تىم اشىق، گۇلدى كيىمگە، بۇيىمعا اۋەس بولماۋ.
ۇشىنشىدەن، تابيعيلىعى. شاشى دا وزىنىكى، قاسى دا وزىنىكى بولعانى ابزال. جاقسى قىز بويىن جاساندىلىقتان اۋلاق ۇستايدى.
تورتىنشىدەن، ۇساق-تۇيەكتەر. تەكتى قىز ءاماندا قۇندى زاتتارعا قىزىعاتىن ءارى ولاردى باعالايتىن جان. بىلعارى ەتىك، سومكە، بەلدىك، قىمبات ساعات، سىرعا، كيىمدەرى تەسىكسىز، الاباجاق ەمەس، تازا، ۇقىپتى، كوركەم.
بەسىنشىدەن، كلاسسيكا. ءسان قۋمايتىن، تەك وزىنە عانا جاراساتىندى تاني ءبىلۋى. مۇنداي قىزدارعا ءجاي عانا قارا كويلەكپەن ەرەكشە «برەند» بەلدىك تاقسا دا جەتكىلىكتى.
التىنشىدان، دۇرىس ءجۇرىپ-تۇرۋى، سويلەۋى. كىتاپ پەن سپورت زال جان دوستارى بولماق.
جەتىنشىدەن، شاش قويىسى. شاش ەشقاشاندا جالبىراپ تۇرماۋى كەرەك. شاش تازا، مۇقيات جينالعان، تۇيىلگەن، ورىلگەن، تەك بۋىلماۋى كەرەك. شاشتى تەك «ءوز ەرىڭنىڭ الدىندا عانا جاياسىڭ» قاعيداسىنا بەرىك بولۋى شارت. قىسقا شاشتى ادەمىلەپ قيۋ، ۇزىن شاشتى جيناپ ءجۇرۋى ماڭىزدى.
سەگىزىنشىدەن، شەبەرلىك. ۇيگە قاجەتتى ءبىر ىسمەرلىككە دەن قويۋى، كەستە تىگۋ، قۇراق قۇراۋ جانە تاعىسىن تاعىلار...
توعىزىنشىدان، جۇرەكتى بولۋ. تەكتىلىك دەگەن تاكاپپارلىق ەمەس. ول ادامگەرشىلىك. وزگە تۋرالى عايبات سويلەمەۋ.
ونىنشىدان، ۇنەمى جىميىپ ءجۇرۋ. ءتۇسى يگىدەن تۇڭىلمە دەيتىن حالىقپىز. ءجۇزى نۇرلى جاندار مەيىرىمدى كەلەتىنى راس. ابدۋللاھ يبن امر (ر. ا. ) ريۋايات ەتكەن حاديستە پايعامبارىمىز (س. ا. ۋ. ) : «راسىندا دۇنيەنىڭ بارشاسى نىعىمەت، ول نىعىمەتتىڭ ەڭ قايىرلىسى - ايەل»، - دەيدى.
ال، ەر ازاماتتار ايەل زاتىنان نە كۇتەدى؟ پسيحولوگيالىق سايتتىڭ ساۋالناماسىنا سۇيەنسەك، ساۋالناماعا جاۋاپ بەرگەن جىگىتتەردىڭ باسىم بولىگى، ياعني 43% جارىنان ءمولدىر ماحاببات كۇتەدى ەكەن. ال، جارىنان تەك ەردىڭ ءسوزىن ماقۇلداپ، يىلە ءبىلۋدى ازاماتتاردىڭ 9% عانا راستاپتى. ياعني، سۇيىسپەنشىلىكسىز ءومىر بوس. ءابۋ ھۋرايرادان (ر. ا.) ريۋايات ەتىلگەن حاديستە اللاھتىڭ ەلشىسىنە (س. ا. ۋ.): «قايسى ايەل جاقسىراق؟» - دەگەن سۇراق قويىلعان. سوندا ول (س. ا. ۋ. ) : «ەگەر قاراساڭ - قۋاندىراتىن، ءبىر نارسە بۇيىرساڭ - باعىناتىن جانە ءوزى مەن مالىنا قاتىستى ماسەلەلەردە وزىڭە قارسى شىقپايتىن ايەل» - دەپ جاۋاپ بەرەدى.
جاقسى جىگىت جاقسى جار تاڭداي ءبىلۋى كەرەك. ويتكەنى، تاڭداۋ ازاماتتىڭ موينىنداعى پارىز. ال، جاقسىنى باعالاۋ تەكتى قىزدىڭ ەركىندە. «ايەل كوركى - قىلىعىندا»، - دەپتى عوي ءجۇسىپ بالاساعۇن، سول ايتپاقشى اداسپاي تاڭداي ءبىلىڭىز.
قىزداردىڭ قۇلاعىنا التىن سىرعا دەپ، ءبىر سىردى ايتا كەتەيىك.
ەر ازاماتتار قانشا بۇزىلسا دا، بيولوگيالىق تۇرعىدا ولاردىڭ ۇرىعى جاڭارىپ، جاقسارىپ، جاڭعىرىپ تۇرۋعا بەيىمدى. اراق ىشكەن جىگىت قويىپ كەتسە، ونىڭ زاردابىن تەز جويا الادى. ال، قىز بالانىڭ انالىق جۇمىرتقاسى سول قالپىندا تۇرادى. جاڭارمايدى. تەك وسەدى. ىشىمدىك پەن تەمەكىنىڭ، ەسىرتكىنىڭ زيانى ءبىر تيسە، ونىڭ سالدارى ماڭگىلىككە وزگەرمەيدى. تۇزەتۋگە كەلمەيتىن قاتەلىككە بوي الدىرماۋ كەرەك. ونى قالپىنا كەلتىرۋ مۇمكىن ەمەس. سوندىقتان، قازاق قىزعا قىرىق ۇيدەن تىيىم سالعان. ساۋ ۇرپاق، سانالى ءومىر ءۇشىن تەكتى قىز العان ابزال.
شىنار ءابىلدا
blogtime
