استانادا بۇلشىق ەتتى قىز- جىگىتتەر اراسىندا ەل بىرىنشىلىگى ءوتتى - فوتو
ايتا كەتەيىك، 17- مامىردا ەلوردامىزدا بوديبيلدينگ پەن بوديفيتنەسس، فيتنەسس، مەنس فيزيك جانە فيتنەس- بيكينيدەن قازاقستاننىڭ 27 - چەمپيوناتى جالاۋىن ءتۇردى.
شاراعا قازاقستان قالالارىنان، رەسەي، ۋكراينا جانە قىرعىزستاننان كەلگەن 134 اتلەت قاتىستى. تورەشىلەر قاتىسۋشىلاردى بۇلشىق ەتتەرىنىڭ سۇلۋلىعىنا قاراپ ەمەس، سپورتتىق بىتىمىنە ءمان بەرەمىز دەپ وتىر. ال، جارىستىڭ باستى ەرەكشەلىگى - ول ەل بىرىنشىلىگى دەگەن ستاتۋسپەن وتكىزىلسە دە، وعان الەمنىڭ بارلىق ەلىنەن اتلەتتەر قاتىسا الادى. بيىل باسەكە ءتورت نوميناتسيا بويىنشا وتكىزىلىپ وتىر: كلاسسيكالىق بوديبيلدينگ؛ ەكسترەمالدى بوديبيلدينگ؛ مەنس فيزيك جانە فيتنەس- بيكيني.
شارانى ۇيىمداستىرۋشىلاردىڭ ءبىرى مارينا ناسرەتدينوۆانىڭ ايتۋىنشا، قازاقستانداعى بوديبيلدينگ سوڭعى بەس جىلدا اجەپتەۋىر «جاسارىپ» قالعان. ءبىزدىڭ جاس اتلەتتەر قازىر ۇلكەن اسۋلاردى باعىندىرۋدا دەيدى ول.
«بيىلعى چەمپيوناتقا تىركەلگەن قاتىسۋشىلاردىڭ سانى رەكوردىق دەڭگەيگە جەتىپ وتىر. حالىقارالىق دارەجەدەگى قانشاما شەبەرلەر كەلىپ قاتىسىپ جاتىر. ءدال وسى بىرىنشىلىكتە ازيا چەمپيوناتىنا ىرىكتەۋ جۇرگىزىلەدى. بيىلعى جارىستىڭ كورەرمەندەرى دە وتە كوپ. قىزىعۋشىلىق تانىتۋشىلار كوپ بولعانىمەن، بۇلشىقەتتەردى ءدال وسىلاي ءوسىرىپ شىعارۋ ۇلكەن ەڭبەك. سول ءۇشىن قازاقستاندا اتلەتتەردىڭ سانى از. جالپى، كەلەمىن، قاتىسامىن دەۋشىلەرگە ەسىگىمىز ءاردايىم اشىق» دەيدى بوديبيلدينگتەن استانا قالاسىنىڭ اعا باپكەرى مارينا ناسرەتدينوۆا. ونىڭ ايتۋىنشا، قازاقستاندىق اتلەتتەر بۇگىندە حالىقارالىق دەڭگەيگە شىعۋعا دايىن جانە ءىرى جارىستاردان مىندەتتى تۇردە جۇلدەمەن ورالۋى ءتيىس.
«قۇرىلعانىمىزعا ەكى جىل عانا بولسا دا 45 اتلەتىمىز بار. العاشقىدا ولاردىڭ سانى نەبارى تورتەۋ- اق بولاتىن. قازىرگى تاڭدا قۇرامامىزدا ەكى حالىقارالىق دارەجەدەگى سپورت شەبەرى، بەس سپورت شەبەرى، جەتى سپورت شەبەرىنە ۇمىتكەرىمىز بار. ءبىز قاتىسقان جارىستاردىڭ بارلىعىنان جۇلدەمەن ورالىپ ءجۇرمىز» دەدى م. ناسرەتدينوۆا.
ايتا كەتەيىك، جارىس جەڭىمپازدارىنا 200 دەن 500 ا ق ش دوللارى كولەمىندە سىياقى بەرىلەدى.
فوتو: عابيت ماداليەۆ
