اقتاۋدا رەسپۋبليكالىق اقىندار ايتىسىنىڭ جۇلدەگەرلەرى ماراپاتتالدى - فوتو

«نۇر وتان» پارتياسىنىڭ ۇيىمداستىرۋىمەن رەسپۋبليكالىق اقىندار ايتىسى ەلىمىزدىڭ ءبىراز وبلىستارىندا وتەدى دەپ جوسپارلانعان بولاتىن.

جاقىندا عانا تالدىقورعان قالاسىندا «ءبىر ەل، ءبىر حالىق، ءبىر تاعدىر» اتتى رەسپۋبليكالىق اقىندار ايتىسى ءوتتى. سول ايتىستىڭ جالعاسىنداي بولىپ بۇگىن ايتىس اقتاۋ قالاسىنا دا كەلىپ جەتتى. ول «بەرەكە باسى - بىرلىكتە!» دەگەن اتاۋمەن ن. جانتورين اتىنداعى وبلىستىق مۋزىكالىق دراما تەاترىندا ءوتتى، دەپ حابارلايدى kazaitys.kz.

 الامان ايتىسقا ەلىمىزگە تانىمال اقىندار مۇحتار نيازوۆ، ايتپاي جۇماعۇلوۆ، ساادات نۇرمانوۆ، سارا توقتامىسوۆا، اباي جالماعامبەتوۆ، قانات مىرزاحان، اسەت دۇيسەنبيەۆ، راۋان قايدار سىندى جىر دۇلدۇلدەرى قاتىستى.

 جىر جارىسىنىڭ باستالۋىندا ماڭعىستاۋ وبلىسىنىڭ اكىمى اليك ايدابايەۆ ءسوز سويلەپ، شاراعا قاتىسۋشىلار مەن كورەرمەندەرگە جىلى لەبىزىن ءبىلدىردى.

جىر جامپوزدارىنىڭ ونەرىنە ءتورايىم رەتىندە ق ر پارلامەنتى ءماجىلىسىنىڭ دەپۋتاتى، «قۇرمەت» وردەنىنىڭ يەگەرى ورازگۇل اسانعازى، ال مۇشەلەرى رەتىندە ق ر ەڭبەك سىڭىرگەن قايراتكەرى، تاريح عىلىمدارىنىڭ دوكتورى، پروفەسسور، اكادەميك ءومىرزاق وزعانبايەۆ، ساتيريك- اقىن، جازۋشى، ق ر پرەزيدەنتى سىيلىعىنىڭ يەگەرى، «ارا» جۋرنالىنىڭ باس رەداكتورى كوپەن امىربەك، فيلولوگيا عىلىمدارىنىڭ كانديداتى، جازۋشى ماقسات ءتاجىمۇرات، «اسىل ارنا» تەلەارناسىنىڭ ديرەكتورى، مەملەكەتتىك «دارىن» سىيلىعىنىڭ يەگەرى مۇحامەدجان تازابەك تورەلىك ەتتى.

 بايراقتى بايگەدە ەشكىم دە جۇلدەسىز قالعان جوق، قاتىسقان ءار اقىنعا ارنايى ديپلوم مەن 500 مىڭ تەڭگە كولەمىندە سىيلىق تابىس ەتىلدى. ياعني راۋان قايدار، اباي جالماعامبەتوۆ، ايتباي جۇماعۇلوۆ سىندى ايتىسكەرلەرگە 500 مىڭ تەڭگە كولەمىندە اقشالاي سىيلىقتار بەرىلدى.

قوس 3- ورىندى ءوزارا بولىسكەن سارا توقتامىسوۆا مەن مۇحتار نيازوۆقا 750 مىڭ تەڭگەدەن بەرىلدى. سونداي- اق 2- ورىندى يەلەنگەن قانات مىرزاحان 1 ميلليون تەڭگە السا، اسەت دۇيسەنبيەۆ 1,5 ميلليون تەڭگە كولەمىندەگى سىيلىقپةن 1- ورىنعا يە بولدى.

ال رەسپۋبليكالىق دەڭگەيدەگى ايتۋلى دودانىڭ باس جۇلدەسىن، ياعني 2 ميلليون تەڭگە كولەمىندەگى اقشالاي سىيلىقتى جىرىمەن جۇرتتى تامسانتىپ، دەلەبەسىن قوزدىرعان سادات نۇرمانوۆ يەلەندى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى