مىڭ ارال ەلىنىڭ استاناسىندا قازاقستاننىڭ مادەني كۇندەرى ءوتتى
قازاقستان مەن يندونەزيا اراسىنداعى ديپلوماتيالىق قارىم- قاتىناس 2012 - جىلى ەلباسى نۇرسۇلتان نازاربايەۆتىڭ بۇل ەلگە جاساعان مەملەكەتتىك ساپارىنان كەيىن جاندانا ءتۇستى.
ال، مادەني بايلانىستىڭ قازىعى ەندى قاعىلىپ، قابىرعاسى جاڭا قالانۋدا. وتكەن جىلى يندونەزيانىڭ مادەني كۇندەرى قازاقستاندا وتكەن بولاتىن. ەندى بۇل ەلدىڭ حالقى دا مادەنيەتى باي قازاق ۇلتىنىڭ رۋحاني قۇندىلىعىمەن تانىسۋعا مۇمكىندىك الىپ وتىر. مادەني كۇندەردىڭ شىمىلدىعى ەلباسى تۋرالى تۇسىرىلگەن «بالالىق شاعىمنىڭ اسپانى» اتتى كوركەم فيلمىمەن اشىلدى. سونداي- اق، يندونەزيا كورەرمەنىنە وزگە دە ءتول كينوتۋىندىلار ۇسىنىلدى.
ەكى مەملەكەت اراسىنداعى مادەني بايلانىستى دامىتۋ ماسەلەسى جاۋاپتى ۆەدومستۆو وكىلدەرىنىڭ كەزدەسۋى بارىسىندا تالقىلاندى. قازاقستاننىڭ مادەنيەت ۆيتسە- ءمينيسترى اسقار بورىبايەۆ پەن يندونەزيانىڭ ءبىلىم جانە مادەنيەت ءمينيسترى مۇحامماد نۋح بۇل سالادا مامانداردى دايىنداۋ، تاجىريبە الماسۋ سياقتى ماسەلەلەردى كەڭىنەن تالقىلاندى. قازاقستاننىڭ مادەني كۇندەرى شەڭبەرىندەگى شارالار دا اڭگىمەگە ارقاۋ بولدى.
دوستىق تالعات ۇلى، ءتىلشى:
- تەاتر دجاكارتا. بۇل شاھارداعى ەڭ ءىرى مادەني وشاق. ونىڭ سىيىمدىلىعى 1200 كورەرمەن. قازاقستاننىڭ مادەني كۇندەرى شەڭبەرىندەگى كونتسەرتتىك باعدارلاما ءدال وسىندا ۇيىمداستىرىلدى.
قازاقتىڭ كەرەمەت مۋزىكاسى، اسەم اندەرى شىرقالىپ، ءتاتتى كۇيلەرى ورىندالعان كەزدە مىڭ ارال ەلىنىڭ كوپتەپ جينالعان قالىڭ كورەرمەنى ەرەكشە قوشەمەت كورسەتتى. قازاقتىڭ ونەرىن شەتەلدە تالاي تانىستىرىپ جۇرگەن «وتىرار سازى» وركەسترى، «سالتانات بي» ءانسامبلى سياقتى ۇجىمدار بۇل جولى دا بيىكتەن كورىندى. لاۋرا مەرتايەۆا وتباسىمەن بىلتىر اتىراۋدان دجاكارتاعا كوشىپ كەلگەن. سەبەبى، ۇلى مەن كەلىنى جۇمىس بابىمەن وسىندا اۋىسىپتى. قازاقستاننىڭ مادەني كۇندەرى وتەدى دەگەن حاباردى ەستىسىمەن، كونتسەرتكە كەلۋگە اسىقتىق، - دەيدى ول.
لاۋرا مەرتايەۆا، دجاكارتا تۇرعىنى:
- قۋانىپ جاتىرمىز وتە، جەرلەستەرىمىزدى كەزدەستىرىپ جاتىرمىز، ەلىمىزدى ساعىندىق. قازاقستاننىڭ اۋەنىن تىڭداپ، قازاقستاندا وتىرعانداي اسەر الدىم.
«سارىجايلاۋ» ، «گاككۋ» ، «ايتتىم سالەم، قالامقاس» اندەرىن كورەرمەن ىستىق ىقىلاسپەن قابىلدادى. سونداي- اق، يندونەزيا تىلىندە ورىندالعان اندەرگە دە ەرەكشە قوشەمەت كورسەتىلدى. مادەني كۇندەرگە ارنالعان كونتسەتتى ەسكەندىر حاسانعاليەۆ پەن ءبىرجان حاسانعاليەۆتىڭ ورىنداۋىنداعى «اتامەكەن» ءانى ءتامامدادى.
بەتتي مارليانە، دجاكارتا تۇرعىنى:
- وتە تاماشا كونتسەرت. وركەستر مەن انشىلەردىڭ ونەرىنە ءتانتى بولدىم. اسىرەسە، يندونەزيا مۋزىكاسىنا سالىپ، ءبىزدىڭ اندەردى كەرەمەت ورىنداعاندا تاڭ قالدىم.
حەنوراتمو بۋاراحارودجو، دجاكارتا تۇرعىنى:
- سوزبەن ايتىپ جەتكىزۋ قيىن. بۇرىندارى مۇنداي جوعارى دەڭگەيدەگى مادەني شارانى كورگەن جوقپىن.
ۆيەندۋ نۋريانتي، يندونەزيانىڭ ءبىلىم جانە مادەنيەت ۆيتسە- ءمينيسترى:
- انشىلەر دە، بيشىلەر دە، وركەستر ۇجىمى دا وتە ادەمى. تاڭ- تاماشا بولدىق. مەن قازاقستانعا دەگەن ىستىق ىقىلاسىمدى بىلدىرگىم كەلەدى.
التىناي جورابايەۆا، ق ر ەڭبەك سىڭىرگەن قايراتكەرى:
- حالىقتىڭ قوشەمەتى، ءبىزدى قابىلداۋ وتە ءبىر جوعارى دەڭگەيدە. مەن مۇنداي قوشەمەتتى شىنىمدى ايتسام، كورگەن ەمەسپىن قانشا شەتەلدە جۇرسەك تە.
- بۇدان بولەك، دجاكارتا تەاترىنىڭ دالىزىندە «بۇگىنگى قازاقستان» اتتى فوتوكورمە ۇيىمداستىرىلدى. وندا استانانىڭ اسەم كەلبەتى بەينەلەنگەن كوپتەگەن فوتوسۋرەتتەر قويىلعان. سونداي- اق، قازاقستاننىڭ مادەنيەتى، تاريحى، ادەت- عۇرپى، سالت- داستۇرىنەن سىر شەرتەتىن فوتوسۋرەتتەر دە كوپتەپ كەزدەسەدى.
«حابار» ارناسى
