قازاقستان- قىتاي اسكەري ىنتىماقتاستىعى ءالى سىلبىر

قازاقستان پرەزيدەنتى نۇرسۇلتان نازاربايەۆ قىتايعا ساپارى بارىسىندا ازياداعى ءوزارا ىقپالداستىق جانە سەنىم شارالارى كەڭەسىنىڭ كەزەكتى سامميتىنە دە قاتىسادى دەپ جوسپارلانعان. قازاقستان ءىرى اسكەري دەرجاۆالارمەن كوپ ۆەكتورلى اسكەري ساياسات ۇستانادى.

 قازاقستان اسكەري سالادا رەسەي، قىتاي جانە ا ق ش- پەن ىنتىماقتاسادى. قازاقستان قىتايمەن شەكارالاس بولعانىمەن، ساراپشىلار ەكى ەلدىڭ اسكەري ىنتىماقتاستىعى سىلبىر ەكەنىن ايتادى.

الماتىلىق ساياساتتانۋشى كونستانتين سىروەجكين نۇرسۇلتان نازاربايەۆتىڭ قىتايعا ساپارىنان ەكى ەلدىڭ اسكەري جانە اسكەري- تەحنيكالىق ىنتىماقتاستىعىن كۇشەيتەتىندەي ەلەۋلى ناتيجە كۇتپەيدى. استانا ادەتتە قىتاي، قىرعىزستان، رەسەي، تاجىكستان، وزبەكستان جانە قازاقستان كىرەتىن شاثحاي ىنتىماقتاستىق ۇيىمى (ش ى ۇ) اياسىندا وتەتىن جاتتىعۋلارعا قاتىسۋمەن شەكتەلەدى.

 2010 - جىلى قىتاي اسكەريلەرى ش ى ۇ اياسىندا قازاقستان تەرريتورياسىندا وتكەن جاتتىعۋلارعا قاتىستى.

ش ى ۇ مۇشە ەلدەردىڭ قارۋلى كۇشتەرىنىڭ جاتتىعۋى 2014 - جىلى قىتايدا وتەدى دەپ جوسپاردانعان. ساراپشىنىڭ ايتۋىنشا، ۋكرايناداعى جاعدايعا بايلانىستى بۇل جاتتىعۋلار كەزىندە تەرروريستىك قۇرىلىمداردى جويۋ ءادىس- تاسىلدەرىن جەتىلدىرۋگە ەرەكشە كوڭىل بولىنەدى.

 سىروەجكيننىڭ ايتۋىنشا، قازاقستان پرەزيدەنتىنىڭ قىتايعا ساپارىنا ۋكرايناداعى جاعدايدىڭ دا اسەرى بولارى ءسوزسىز. ساراپشىنىڭ پايىمداۋىنشا، رەسەيدىڭ قىرىمدى ءبولىپ الۋى جانە رەسەيشىل سەپاراتيستەردىڭ كيەۆ بيلىگىمەن اسكەري قاقتىعىسى قازاقستان مەن قىتاي باسشىلىعىن الاڭداتادى.

 سىروەجكين قازاقستان مەن قىتايدىڭ اسكەري- تەحنيكالىق ىنتىماقتاستىعىنان جۋىردا الدەبىر دامۋ كۇتپەيدى. ساراپشىنىڭ بولجامىنشا، «قىتاي قازاقستانعا اۋىر جۇك تاسىعىش تەحنيكا مەن تاعى بىردەڭەلەر ساتۋى مۇمكىن. ەكى ەلدىڭ اسكەري- تەحنيكالىق ىنتىماقتاستىعى بۇل كەزەڭدە وسىمەن شەكتەلۋى مۇمكىن. ويتكەنى قازاقستان ديۆەرسيفيكاتسيا جاساۋعا قانشا تىرىسقانىمەن، اسكەري تەحنيكا مەن قارۋ- جاراقتى كوبىنەسە رەسەيدەن الادى» .

  قىتايدىڭ قازاقستانعا قاتىستى اسكەري مۇددەسى

 كونستانتين سىروەجكيننىڭ ايتۋىنشا، قازاقستاننىڭ قىتايعا قاتىستى اسكەري مۇددەسى ونشا بايقالمايدى. پارلامەنت ءماجىلىسىنىڭ حالىقارالىق ىستەر، قورعانىس جانە قاۋىپسىزدىك كوميتەتىنىڭ مۇشەسى ۆلاديسلاۆ كوساريەۆ تە ونىڭ پىكىرىن قوستايدى.

قازاقستاننىڭ بۇرىنعى قورعانىس ءمينيسترى ادىلبەك جاقسىبەكوۆتىڭ قىتاي ورتالىق اسكەري كەڭەسى ءتوراعاسىنىڭ ورىنباسارى فان چانلۋنمەن بىلتىرعى كەزدەسۋلەرىن پارلامەنت دەپۋتاتى «ديپلوماتيانىڭ ءبىر كورىنىسى عانا» دەپ باعالايدى. ول ەكى ەل قورعانىس ءمينيسترىنىڭ بىشكەك قالاسىندا ش ى ۇ اياسىندا ۇيىمداستىرىلعان بىلتىرعى كەزدەسۋى مەن ەكى ەل قورعانىس مينيسترلىگى اراسىندا بەكىتىلگەن نيەتتەستىك مەموروندۋمىن دا وسى تۇرعىدان باعالايدى.

 ءبىراق قىتايتانۋشى ساراپشى مامان سىروەجكين دە، پارلامەنت دەپۋتاتى كوساريەۆ تە بىلتىر قىتاي ورتالىق اسكەري كەڭەسى ءتوراعاسىنىڭ ورىنباسارى فان ءچانلۋننىڭ ماڭعىستاۋ وبلىسىنىڭ ورتالىعى اقتاۋ قالاسىنا كەلگەنىنە نازار اۋدارادى.

  قىتاي جوعارعى باسشىلارىنىڭ ءبىرىنىڭ بۇل ساپارى تۋرالى قازاقستاندىق اقپارات قۇرالدارى فان چانلۋن قازاقستان اسكەري- تەڭىز كۇشتەرىنە قىزىعۋشىلىق تانىتتى دەگەن سارىندا حابارلاعان ەدى. ول كەزدە ب ا ق: «اسپان استى ەلىنەن كەلگەن دەلەگاتسيا قازاقستاندىقتاردىڭ تەڭىز جاياۋ اسكەرى بريگاداسىندا قىزمەت ەتۋ جاعدايىمەن تانىسىپ، كاسپيدەگى «ورال» ارتيللەريالىق- زىمىران كەمەسىنىڭ سىناعىنا قاتىستى» دەپ جازعان.

 

ءبىراق سىروەجكين بۇل ساپاردى قىتايدىڭ مۇناي ءوندىرۋ كومپانيالارىنىڭ قازاقستاننىڭ باتىسىندا شوعىرلانۋىمەن جانە قازاقستان مۇناي سالاسىندا قىتاي كاپيتالىنىڭ ۇلەسى جىل سايىن ءوسىپ كەلە جاتقانىمەن بايلانىستىرادى.

 قازاقستان اسكەري- تەڭىز كۇشتەرى باس قولباسشىسى، ادميرال جانداربەك جانۇزاقوۆتىڭ ازاتتىق تىلشىسىنە ايتۋىنشا، قازاقستان مەن قىتايدىڭ اسكەري- تەڭىز ىنتىماقتاستىق اياسى ازىرشە شەكتەۋلى سيپاتتا قالىپ وتىر.

- قىتايدا ازىرشە ەكى كۋرسانتىمىز عانا وقىپ جاتىر. ولار العاشقى جىلى قىتاي ءتىلىن ۇيرەندى. قىتاي بىزگە اۋىر جۇك تاسيتىن بىرنەشە ترەيلەر بەردى. جاساپ جاتقان باسقا دا ۇسىنىستارىن قارايمىز، - دەيدى ول.

 ادميرالدىڭ ايتۋىنشا، فان چانلۋن قازاقستاندىق تەڭىزشىلەرمەن كەزدەسۋىنەن كەيىن قىتاي مۇناي كومپانياسىنىڭ اقتاۋداعى ورتالىق كەڭسەسىنە بارعان.

قازاقستان- قىتاي شەكاراسىنىڭ ۇزىندىعى - شامامەن 1 مىڭ 740 شاقىرىم. ب ا ق دەرەكتەرى بويىنشا، قازاقستان ارمياسىندا 70 مىڭ ادامعا جۋىق، ال قىتاي ارمياسىندا 1 ميلليون 500 مىڭعا جۋىق ادام قىزمەت ەتەدى.

«ازاتتىق»

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى