نارەندرا مودي ءۇندىستاندا بيلىكتى قولعا الۋعا ازىرلەنۋدە
ونىڭ الدىندا ەلەۋلى ەكونوميكالىق مىندەتتەر تۇر، دەپ حابارلادى بي- بي- سي.
سەنبى كۇنى كەشتە 63 جاستاعى ساياساتكەر گانگا وزەنىنىڭ جاعاسىنداعى ۇندىلىكتەر ءۇشىن قاسيەتتى ۆاراناسي قالاسىندا ءمىناجات ەتتى.
ونىڭ سايلاۋ الدىنداعى ۋادەلەرىنىڭ ءبىرى قاسيەتتى وزەندى يندۋستريالىق قالدىقتاردان تازارتۋ بولاتىن.
مودي پارلامەنتتىڭ تومەنگى پالاتاسىنا ۆاراناسيدان سايلانعان بولاتىن، سوندىقتان دا ءوزىنىڭ تۋعان وكرۋگىنە ات باسىن بۇرۋعا اسىقتى. سونىمەن بىرگە بايقاۋشىلار ونىڭ ءدىني سەنىمى كۇشتى ەكەنىن اتاپ وتۋدە.
تۇسكە دەيىن ول ءوزىنىڭ جەڭىسىن ەل استاناسى دەليدە تويلادى، وندا ءموديدى روك- جۇلدىز سياقتى قارسىلادى، دەپ حابارلادى بي- بي- سي ءتىلشىسى ساندجاي ماحۋمدەر.
مودي باسقاراتىن بحاتاريا دجاناتا پارتياسىنىڭ شتاب- پاتەرىنە بارار جولدا كوشە بويى جينالعان ادامدار ونىڭ ەسىمىن ۇرانداپ، جالاۋلار بۇلعاپ، ونىڭ كورتەجىن گۇلدەرمەن كومىپ تاستادى.
قاۋىپسىزدىكتى پوليتسيامەن قاتار ارميا ساربازدارى دا قامتاماسىز ەتتى.
كەلەسى اپتادا نارەندرا مودي لاۋازىمىنا كىرىسپەك. ونىڭ الدىنداعى ۇكىمەت باسشىسى، سايلاۋدا جەڭىلىس تاپقان ءۇندىستان ۇلتتىق كونگرەسىنىڭ وكىلى مانموحان سينگح رەسمي تۇردە قىزمەتىنەن كەتتى.
بحاتاريا دجاناتا پارتياسى سوڭعى 30 جىلدا ءۇندىستاندا ايقىن باسىمدىلىقپەن جەڭىسكە جەتتى، ەندى ول ەشكىممەن كواليتسياعا تۇسپەي- اق ۇكىمەتتى قالىپتاستىرا الادى.
«ءۇندىستان حالقىنا باسىمدى يەمىن» ، - دەپ مالىمدەدى مودي دەليدە.
