امەريكاداعى ەڭ ەجەلگى ادامنىڭ سۇيەگى تابىلدى

مەكسيكالىق عالىمداردىڭ ايتۋىنشا، بۇل - امەريكا اۋماعىنداعى ەڭ ەجەلگى ادامنىڭ قاڭقاسى. ولاردىڭ پىكىرىنشە، امەريكاعا ادامدار العاش 20 مىڭ جىل بۇرىن بەرينگ بۇعازى ارقىلى سىبىردەن كەلگەن.

مەكسيكادانىڭ سۋ استى ارحەولوگتارى يۋكاتانا اۋدانىنداعى تۋلۋم ۇڭگىرىنەن امەريكا قۇرلىعىنداعى ەڭ ەجەلگى ادامنىڭ سۇيەكتەرىن تاپتى.

شامامەن 13 مىڭ جىل بۇرىن 15 جاستاعى قىز وسى ۇڭگىرگە سۋ ىزدەپ كەلىپ، جان تاپسىرعان. بىرنەشە مىڭ جىلدان كەيىن وسى ماڭداعى ۇلكەن مۇزدىق ەرىپ، ۇڭگىردى تەڭىز سۋى باسىپ قالعان. ادام قاڭقاسىنىڭ جانىنان 20 عا جۋىق جانۋاردىڭ سۇيەكتەرى دە تابىلدى.

ماريا تەرەزا فرانكو، مەكسيكانىڭ انتروپولوگيا جانە تاريح ۇلتتىق ينستيتۋتىنىڭ باس ديرەكتورى:

- بۇل - امەريكا اۋماعىنداعى ەڭ ەجەلگى ادامنىڭ سۇيەكتەرى. ونىڭ ۇستىنە ولار اناعۇرلىم جاقسى ساقتالعان. ول - 15-16 جاستاعى قىزدىڭ قاڭقاسى. ول وسى ۇڭگىردە قازا تاپقان.

سۇيەكتەردىڭ گەنەتيكالىق ساراپتاماسى باتىس جارتىشارداعى حالىقتىڭ شىعۋ تەگى تۋرالى كوپتەگەن سۇراقتارعا جاۋاپ بەردى. زەرتتەۋ امەريكاعا العاشقى ادامدار سىبىردەن كەلگەنىن راستادى.

پيلار لۋنا، مەكسيكانىڭ انتروپولوگيا جانە تاريح ۇلتتىق ينستيتۋتىنىڭ عالىمى:

- امەريكانىڭ العاشقى تۇرعىندارى پالەوۇندىستەر سىبىردەن كەلگەن. ولار بەرينگ بۇعازىن كەسىپ ءوتىپ، وسى قۇرلىقتاعى ءومىر جاعدايىنا بەيىمدەلگەن.

مەكسيكالىق عالىمداردىڭ ايتۋىنا قاراعاندا، وسى جولى تابىلعان ادام سۇيەكتەرى امەريكانىڭ بايىرعى تۇرعىندارى كىم بولعانىن ايعاقتايدى. ءبىراق جاڭا تاريحي ولجانىڭ ءوزى الەمدەگى زەرتتەۋشىلەردىڭ باتىس جارتىشارىن مەكەندەگەن العاشقى ادامدار تۋرالى پىكىرتالاسىنا تاعى جول اشىپ، تىڭ تاقىرىپقا اينالدى.

24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى