ۇلى ماحابباتتىڭ بەلگىسى رەتىندە سالىنعان ءۇي
گراف ن. شەرەمەتيەۆ پراسكوۆيا كوۆاليەۆانىڭ كىشكەنتاي كەزىندە كۇمىستەي سىڭعىرلاعان داۋىسىنا قاتتى عاشىق بولىپتى.
كەيىننەن كرەپوستنوي تەاتردىڭ بەلدى انشىسىنە اينالعان پراسكوۆيا تابيعي بۇلبۇل داۋىسىمەن عانا ەمەس، ءوزىنىڭ ادەمىلىگىمەن، ەركە قىلىعىمەن دە گراف شەرەمەتيەۆتىڭ جۇرەگىن جاۋلاپ الادى.
جۇرتتان جاسىرىن قارىم-قاتىناس ورناتقان ەكى عاشىقتىڭ ءبىر-بىرىنە دەگەن ىستىق سەزىمدەرىنىڭ كۋاسىندەي ۇل بالا دۇنيەگە كەلەدى.
جالپى، پراسكوۆيا وتە مەيىرىمدى، قاراپايىم جان بولعان ەكەن. جەتىم-جەسىرلەرگە، قايىرشىلارعا كوپ كومەكتەسەدى.
مىسكىندەرگە ساداقا تاراتۋ ماقساتىمەن سۋحاريەۆكا الاڭىنا ءجيى بارادى. سۇيىكتى ادامىنىڭ قايىرىمدىلىق ىسىنەن حاباردار گراف ءوزىنىڭ ايەلىنە دەگەن ماحابباتىن تاعى ءبىر مارتە ءبىلدىرۋ ءۇشىن قاڭعىباس-كەزبەلەرگە، قاراۋسىز قالعان قارتتارعا جانە ەمدەلۋگە، تاماق ىشۋگە اقشاسى جوق كەدەي-كەپشىكتەرگە ارناپ سول الاڭنان كەزبەلەردى قابىلدايتىن ۇلكەن ءۇي سالعىزۋعا بەل بۋادى.
ساۋلەتشى ە. نازاروۆ ازىرلەگەن العاشقى جوبادا بۇل ءۇي اسا ۇلكەن بولماعان. الايدا ۇلىن دۇنيەگە اكەلگەن سوڭ 20 كۇننەن كەيىن قۇرت اۋرۋىنان گرافينيا كوز جۇمادى دا، قايعىدان قارا جامىلعان گراف ايەلىنىڭ دوسى، ايگىلى دجاكومو كۆارنەگيگە دايىن تۇرعان ءزاۋلىم عيماراتتىڭ قۇرىلىسىنا وزگەرىستەر ەنگىزىپ، قايتا جوندەپ شىعۋعا تاپسىرما بەرەدى. كۆارنەگي بۇرىنعى قايىرىمدىلىق ءۇيى مەن اۋرۋحانانىڭ سىرت كەلبەتىن مۇلدەم وزگەرتىپ، جارتىلاي شەڭبەر ىسپەتتى بولىپ كەلەتىن سارايعا سالتاناتتى ءارى بەكزات شىراي بەرەدى.
زالدىڭ اسحاناسى التىن جالاتىلعان مانەرلى بەزەندىرۋلەرمەن ادىپتەلسە، ۇزىن ءدالىزى دوعاعا ۇقساس ءيىلىپ تۇرعان. يتالياندىق ۇلگىدە جاسالعان ترويتسك شىركەۋى ءمارمار تاسپەن قاپتالىپ، جاسىل ءتۇستى اسىل تاستارمەن اشەكەيلەنگەن. قابىرعاسىندا سكوتتي ورنەكتەرى تاڭبالانعان بۇل عيمارات مەموريال-سارايدى ەسكە تۇسىرەدى.
ايەلىنىڭ قايتىس بولعانىنا التى جىل ۋاقىت وتكەندە، كەزبەلەردى قابىلدايتىن ءۇيدىڭ سالتاناتتى اشىلۋىنا ءبىر اي قالعان كەزدە، گراف تا ومىردەن وزادى. دەيتۇرعانمەن ول عۇمىر بويى جيناعان بايلىعى مەن بۇكىل قاراجاتىن پراسكوۆيا اۋلەتىنىڭ اتىنان ءوزى سالدىرتقان ءۇيدى ۇستاپ تۇرۋعا، سونداي-اق، تۇرمىسقا شىققان كەدەي وتباسىلاردىڭ قىزدارىنا جاساۋ الىپ بەرۋ ءۇشىن اماناتتاپ قالدىرادى.
كەيىننەن عاشىقتاردىڭ اراسىنداعى ماحابباتتىڭ سيمۆولى بولعان ايگىلى ءۇيدىڭ اتاۋىن شەرەمەتيەۆ اۋرۋحاناسى دەپ اتايدى.
ازىرلەگەن - سەرىك ءابىلحان
didar-gazeti
