الەم اپتا ىشىندە: تۇركياداعى كومىر كەنىشىندە ورىن العان ءىرى اپات ەلدەگى قاقتىعىستارعا تۇرتكى بولدى

الدىن الا مالىمەتتەرگە سايكەس، شامامەن 2 شاقىرىمدىق تەرەڭدىكتە ەلەكتر سىمىنىڭ قىسقا تۇيىقتالۋى سالدارىنان دۇرىس جۇمىس ىستەمەي تۇرعان ترانسفورماتور جارىلعان.

سونىڭ سالدارىنان شاحتانى ەلەكتر جارىعىمەن قامتاماسىز ەتۋ جۇيەسى بۇزىلىپ، جەر استىنان ادامداردى كوتەرىپ شىعاراتىن قۇرىلعى جۇمىس ىستەۋىن توقتاتقان.

ءدال جارىلىس بولعان كەزدە جەر استىندا 787 ادام بولعان. جۇما كۇنى تۇركيانىڭ ەنەرگەتيكا جانە تابيعي رەسۋرستار ءمينيسترى تانەر يىلدىز سوماداعى كومىر شاحتاسىندا قازا بولعانداردىڭ سانى 282 ادامعا جەتكەنىن حابارلاعان بولاتىن.

بۇدان بولەك، ونداعان ادام ءىز-ءتۇسسىز جوعالعاندار ساناتىنا جاتقىزىلىپ وتىر.

قازىرگى ۋاقىتتا اپات بولعان جەردە دەنساۋلىق ساقتاۋ مەن وتباسى جانە الەۋمەتتىك ساياسات مينيسترلەرى وقيعانى تىكەلەي باقىلاۋعا الدى.

ال 500 ادامنان تۇراتىن قۇتقارۋ قىزمەتى تاۋلىك بويى شاحتا ىشىندە قۇتقارۋ-ىزدەستىرۋ جۇمىستارىن جۇرگىزۋدە. كۇنى كەشە مانيسا قالاسىنا ۇكىمەت باسشىسى تايىپ ەردوعان كەلىپ، مارقۇم بولعانداردىڭ وتباسىلارىمەن كەزدەسىپ، كوڭىل ايتقان ەدى.

بۇگىن وقيعا ورتاسىنا ەل پرەزيدەنتى ابدۋللا گۇل دە كەلدى. ول اۋەلى جەرگىلىكتى اۋرحانالارعا تۇسكەن جارالى كەنشىلەردىڭ حال-جاعدايىن سۇراپ، مەملەكەت تاراپىنان بارلىق جاردەم بەرىلەتىنىن ايتتى. قازىر اۋرۋحانالاردا 80 نەن استام ءارتۇرلى دەڭگەيدە جاراقات العان كەنشىلەرگە مەديتسينالىق كومەك كورسەتىلىپ جاتىر.

وسى قايعىلى وقيعاعا بايلانىستى كوپتەگەن ەلدەردىڭ مەملەكەت باسشىلارى تۇركيا پرەزيدەنتى ابدۋللا گۇلگە كوڭىل ايتۋ جەدەلحاتىن جولداۋدا. قازاقستان پرەزيدەنتى دە جەدەل حات جولداپ، وندا سۋىت حاباردى تەرەڭ كۇيزەلىسپەن قابىلداعانىن اتاپ ءوتىپ، قايتىس بولعانداردىڭ تۋعان-تۋىستارى مەن جاقىندارىنا كوڭىل ايتتى. سونداي-اق شاحتاداعى اپاتتان امان قالعانداردىڭ تەزىرەك ساۋىعىپ كەتۋىنە تىلەكتەستىگىن ءبىلدىردى.

اپاتتان كەيىن تۇركيادا 3 كۇندىك ۇلتتىق ازا تۇتۋ كۇنى بولىپ جاريالاندى. پرەمەر-مينيستر تايىپ ەردوعان وسى اپتاداعى ەلدەگى جانە شەتەلگە جوسپارلاعان جۇمىس ساپارلارىن وزگەرتتى. پرەزيدەنت ابدۋللا گۇل قىتايعا، ال پارلامەنت سپيكەرى ا ق ش-قا جۇمىس ساپارىمەن بارمايتىن بولدى.

ەنەرگەتيكا ءمينيسترى تانەر يىلدىزدىڭ ءمالىم ەتۋىنە قاراعاندا، شاحتەرلەردىڭ باسىم بولىگى گازدان ۋلانىپ، سونىڭ سالدارىنان جارىق دۇنيەمەن قوش ايتىسقان. ال كەنشىلەردىڭ ءبىر بولىگى، جوعارىعا شىعاتىن ورىننان 4 شاقىرىم قاشىقتىقتا بولعان. بۇدان بولەك جارىلىس ءدال اۋىسىم ساتىندە ورىن الىپ، سونىڭ سالدارىنان جەر استىندا ءبىر اۋىسىمداعىدان الدەقايدا كوپ ادام بولعان. سونداي-اق مينيستر تەحنيكالىق قاۋىپسىزدىكتىڭ ساقتالماۋىنا كىنالى ادامداردىڭ بارلىعى دا جازاعا تارتىلاتىنىن ايتۋدا.

ال ەلدىڭ ەڭبەك جانە الەۋمەتتىك قامتاماسىز ەتۋ ءمينيسترىنىڭ ايتۋىنشا، 14 - ناۋرىز كۇنى شاحتا تولىق تەكسەرۋدەن ءوتىپ، بەلگىلەنگەن قاۋىپسىزدىك ەرەجەلەرىنە تولىعىمەن سايكەستىگى انىقتالعان.

بۇل اپات تۇركيا تاريحىنداعى ەڭ ءىرى توتەنشە وقيعا بولىپ وتىر. جالپى، 1940 - جىلدان بەرى تۇركيا شاحتالارىندا 3 مىڭنان اسا ادام قازا بولدى. اپاتتاردىڭ ەڭ ءىرىسى 1992 - جىلدىڭ 3 - ناۋرىزىندا ورىن الدى. وندا 263 جۇمىسشى قازا بولعان ەدى.

تۇركيا بۇقارالىق اقپارات قۇرالدارىنىڭ جازۋىنشا، ەل باسشىلىعى وپپوزيتسيا تارابىنىڭ بارلىق كومىر كەنىشتەرىن تەكسەرۋگە شاقىرۋىن قۇلاقتارىنا دا ىلمەگەن. 29 - ساۋىردە پرەمەر-مينيستر جەتەكشىلىك جاسايتىن بيلىك پارتياسىنىڭ وكىلدەرى وپپوزيتسيانىڭ ينسپەكتسيا جۇرگىزۋ قاجەتتىلى تۋرالى ۇسىنىسىنا نازار اۋدارماعان.

سوماداعى اپاتقا بۇكىل تۇرىك حالقى قايعىرىپ جاتىر. ادامدار ورتاق قاسىرەتكە وزدەرىنشە ءۇن قاتۋدا. مىسالى ەرزۋرۋم قالاسىندا قانت زاۋىتىنىڭ جۇمىسشىلارى مەن چاناككالەنىڭ قۇرىلىسشىلارى مارقۇم بولعانداردىڭ رۋحىنا قۇران باعىشتاپ، ءبىر كۇندىك جۇمىستارىن توقتاتتى.

قازىر اپات ورىن العان مانيسا قالاسىندا قايتىس بولعان كەنشىلەردى جەر قوينىنا تاپسىرۋدا. قالانىڭ شەتىنەن بەيىت ءۇشىن 5 مىڭ شارشى مەتر جەر ءبولىنىپ، قالا اكىمشىلىگى جەرگىلىكتى تۇرعىنداردىڭ كومەگىمەن 80 ادامدىق قابىر قازدى. مانيسادا مارقۇمنىڭ تۋىستارى جانازا ءراسىمىن وتكىزىپ جاتسا، تۇركيانىڭ وزگە ايماقتارىندا ستۋدەنت جاستاردىڭ قاتىسۋىمەن نارازىلىق شەرۋلەر وتۋدە.

يزميرلىك جاستار قالانىڭ ورتالىعىنا شىعىپ، ءتارتىپ ساقشىلارىمەن تىكەلەي قاقتىعىسقا تۇسۋدە. مۇنداي شەرۋ انكارا، ىستامبۇل مەن ەلدىڭ وزگە وڭىرلەرىندە دە كورىنىس تابۋدا. انكارا كوشەلەرىنە شىققان 500 دەن استام شەرۋشى ۇكىمەتكە قارسى ۇرانداتىپ، پوليسيا قىزمەتكەرلەرىن تاس استىنا الدى.

سوما قالاسىندا دا جەرگىلىكتى جۇرت اراسىندا تارتىپسىزدىكتەر باستالدى. تارتىپسىزدىككە قاتىسۋشىلار ۇكىمەت باسشىسى رەدجەپ تاييپ ەردوعانعا نارازىلىق بىلدىرۋدە. نارازىلىققا شىعىپ، ادىلەتتىلىك جانە دامۋ پارتياسىنىڭ ايماقتىق بولىمىنە بەت العانداردىڭ الدىنا ءتارتىپ ساقشىلارىنىڭ توسقاۋىلى قويدى.

ايتا كەتەرلىگى، حالىقتىڭ مۇنداي قادامعا بارۋىنا اتالعان كەنىشتى يگەرىپ جاتقان

Soma Komur Isletmeleri AS كومپانياسىنىڭ اپاتتى ورىن الۋىنا وزدەرىنىڭ كىناسىزدىگىن ايتىپ، مالىمدەمە جاساۋى تۇرتكى بولعان ەدى. بۇگىندە بۇل كومپانيا ەلدەگى ءىرى ءوندىرىس وشاعى سانالادى. وندا 5 مىڭنان استام ادام جۇمىس ىستەيدى.

اۆتور: مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى