تۇركياداعى جارىلىس بولعان شاحتادا قازاق جىگىتى جۇمىس ىستەيدى

قانداسىمىزبەن وسى ەلدەگى ۇلتتىق ارنانىڭ مەنشىكتى ءتىلشىسى سۇحباتتاستى. ال، شاحتەرلاردى قۇتقارۋ وپەراتسياسى ءالى جالعاسىپ جاتىر.

بۇگىن بيلىك وكىلدەرى جەر استىندا قالىپ قويعاندار تۋرالى العاش رەت مالىمەت تاراتتى.

شاحتانىڭ ىشىندە ءالى 20 عا جۋىق ادام بار. سوندىقتان، قازا بولعانداردىڭ سانى 300 دەن اسۋى مۇمكىن.

تۇركيا بيلىگىنىڭ العاشقى تاراتقان مالىمدەمەسى - وسىنداي.

الايدا، كەنشىلەر بۇل كورسەتكىش ودان دا كوپ، دەپ وتىر.

وسمان ومەر، قۇتقارۋشى:

- شاحتەرلاردىڭ جاقىندارىنان تۋىسقاندارىن ىزدەۋ ءۇشىن ءوتىنىش قابىلدايتىن ارنايى ورتالىق قۇرىلدى. سول جاقتا قازىر 19 ادامنىڭ ءوتىنىشى قالعان. ال، ول ورتالىققا كەلە الماي قالعان ادامدار دا بار. مىسالى، شاحتانىڭ باسىندا جاعىمدى جاڭالىق كۇتىپ قانشاما ادام وتىر.

ابدۋللاح تەكمان - تۇركياداعى قانداسىمىز. جارىلىس بولعان شاحتادا كەنشى بولىپ جۇمىس ىستەيدى. سول كۇنى دەنساۋلىعىنا بايلانىستى كەزەكشىلىككە شىقپاعان. جالعىز ءوزى ۇيىنە قايتىپتى. ال، قاسىنداعى 25 سەرىگى وسى اپاتتان قازا تاپتى.

ابدۋللاح تەكمان، كەنشى:

- وسىدان 15 كۇن بۇرىن شاحتادا باس بارماعىمدى قىستىرىپ الدىم. دارىگەر ماعان ەمدەلۋگە 7 كۇن ۋاقىت بەردى. جارىلىستان ءبىر كۇن بۇرىن كەلدىم. دارىگەر قايتادان 10 كۇنگە قايتارىپ جىبەردى. ەرتەڭىندە تۇندە جارىلىس بولىپتى.

باقىتجان ومار، ءتىلشى:

قازا بولعانداردىڭ وتباسىنا جان-جاقتان كومەك كورسەتىلىپ جاتىر. بۇگىن ءبىلىم مينيسترلىگىنىڭ قورى مارقۇمداردىڭ بالالارىن تەگىن وقىتۋ تۋرالى شەشىم قابىلدادى. سونداي-اق، ەلدىڭ اتاقتى فۋتبولشىلارى، انشىلەرى ءتىپتى ءبىرقاتار شەتەلدىك جۇلدىزدار شاڭىراعى شايقالعان جانۇيالارعا اقشالاي كومەك كورسەتۋدە. باقىتجان ومار

«قازاقستان»

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى