شىعىس قازاقستاندىق وقۋشىلار جازدا كيىز ۇيلەردە دەمالادى
وبلىس اكىمىنىڭ اقپاراتتىق ورتالىعىنان وبلىستىق ءبىلىم باسقارماسىنىڭ مالىمەتتەرىنە سۇيەنە وتىرىپ حابارلاعانداي، جەرگىلىكتى بيۋدجەتتەن وبلىستىق قالالار مەن اۋداندارعا 198 ميلليون 70 مىڭ تەڭگە قارالعان، تاعى 84 ميلليون 283 مىڭ تەڭگە وبلىستىق بيۋدجەتتەن بالالار ءۇيىنىڭ تاربيلەنۋشىلەرىن ساۋىقتىرۋ ءۇشىن بولىنگەن. سونىمەن بىرگە، وسى ماقساتتار ءۇشىن 1 ميلليون 280 مىڭ تەڭگە كولەمىندە دەمەۋشىلىك قارجى جۇمساۋ قاراستىرىلعان. بالالاردى ساۋىقتىرۋ بىرنەشە باعىت بويىنشا، اتاپ ايتقاندا، ساۋىقتىرۋ، بوس ۋاقىتتى ۇيىمداستىرۋ، ەڭبەكپەن قامتۋ جانە تۋريزم بويىنشا وتەدى. جازدا ءتۇرلى تيپتەگى 759 لاگەر جۇمىس ىستەيتىن بولادى. وندا 65295 بالا دەمالادى، ول جالپى وقۋشىلاردىڭ 43 پايىزىن قۇرايدى.
ءبىلىم ءبولىمى باسشىسى اسقار نۇرعازيەۆتىڭ سوزىنە قاراعاندا، مەكتەپ وقۋشىلارىنىڭ جازعى دەمالىستارىن جىل بويعى نەمەسە قالا سىرتىنداعى ساۋىقتىرۋ جازعى لاگەرلەرىندە وتكىزۋ مۇمكىندىگى بار.
سونىمەن بىرگە بالالار ءۇشىن مەكتەپ جانىنداعى لاگەرلەردىڭ جۇمىسى ۇيىمداستىرىلعان. وعان كۇندەلىكتى بارىپ، تاماقتانىپ، مادەني جانە كوڭىل كوتەرۋ باعدارلامالارى قاراستىرىلعان. سونداي-اق وڭىردە 63 بەيىندى، 72 سپورتتىق، تۋريستىك جانە پالاتالىق لاگەرلەر بار. «بالالار ءۇشىن ۇمىتىلماس دەمالىس ەكى كيىز ءۇي لاگەرىندە بولادى. ول 1,5 مىڭنان استام بالانىڭ قامتيدى»، - دەيدى ا. نۇرعازيەۆ.
جاقىن ارادا وبلىستا ساۋىقتىرۋ جانە تۋريستىك نىسانداردى كوبەيتۋ كوزدەلىپ وتىر. جاز ماۋسىمىنىڭ باسىنا قاراي سەمەي قالاسىندا 30 ورىنعا ارنالعان «سارى جايلاۋ» مادەني-ساۋىقتىرۋ ورتالىعى اشىلادى. گلۋبوكوە اۋدانىندا «تولاعاي» جازعى لاگەرىنىڭ كورپۋسى، شەمونايحا اۋدانىندا 11 ۇيگە ارنالعان ستاتسيونارلى لاگەر سالىنۋدا.
ا. نۇرعازيەۆ اعىمداعى جىلى جازعى دەمالىستى ۇيىمداستىرۋدا الەۋمەتتىك جاعىنان قورعالماعان بالالارعا ەرەكشە كوڭىل بولىنەتىنىن اتاپ ءوتتى. قازىر كامەلەتتىك جاسقا تولماعاندار بولىمىندە ەسەپتە 1213 وقۋشى تۇر، ولاردىڭ ءبارى ءجۇز پايىز جازعى ساۋىقتىرۋ دەمالىسىمەن قامتىلادى.
