جانۋار كيەسى

ايداۋعا جۇرمەگەندە دە، ايتقانعا كونبەگەندە دە قوجايىنىنان كورەتىنى ءبىر تەپكى .

كورشىمىز بىردە دەگەنىنە كوندىرە الماعان سيىرىن قولىنا تۇسكەن تاياقپەن باستان، كوزدەن، مويىننان ۇرعىلاي جونەلدى .ىزاعا بۋلىققان سيىر يەسىنىڭ تاياعىنان سىتىلىپ شىعىپ، الدىنا كەلىپ قالعان بالانى ءبىر ءسۇزدى دە، تاپتاپ ءوتىپ زىتا جونەلدى .اياق استى ورىن العان وقىس وقيعا بەيكۇنا بالانى اۋرۋحانادان ءبىراق شىعاردى .جاراقاتى دا جەڭىل بولعان جوق.

بالاسىن ەمدەۋگە اقشا تاپپاعان اكەسى امال جوق سيىردى ساتۋىنا تۋرا كەلدى .بالالار اۋزىن اققا تيگىزىپ وتىرعان جالعىز سيىرىن جىلاپ شىعارىپ سالىپ تۇرعان ايەلى كۇيەۋىنىڭ ىسىنە كۇيىنىپ كەتىپ:

 -  كوردىڭ بە مالدىڭ كيەسى ۇرادى. سەنىڭ سيىرعا قول كوتەرگەنىڭ - زەڭگى بابانى وكپەلەتكەنىڭ. كەسىرىڭ بالاعا ءتيدى. ەندى زەڭگى بابانىڭ وكپەسى جازىلمايىنشا قوراڭ قاڭىراپ بوس تۇرادى، - دەپ كەيىدى.

اۋىلداعى جۇرتتىڭ جانىن ساقتاپ وتىرعان وسى مال ەمەس پە؟ سول مالدىڭ قادىرىن بىلمەي قورلايتىندار قانشاما. تاعى ءبىر اۋقاتتى كورشىمىزدىڭ بالالارى:« جەكە شارۋا قوجالىعىن قۇرىپ تاۋعا شىققانىمىزدا  250گە تارتا قويىمىز بار ەدى. ونىڭ ءبىر تالايىن ءوزىمىز ۇرىپ ءولتىرىپ قويدىق. قويدى ساناپ سانىنا جەتە المايتىن اكەمىز كەم شىقسا  «ە، قاتەلەسكەن بولارمىن» دەپ قويا سالاتىن»، - دەپ ماساتتانىپ وتىرىپ اڭگىمەسىن ايتقان ەدى.

ال كەشە عانا ومىردەن وزعان جولداسقۇل اقساقال بار عۇمىرىن شوپاندىققا ارناعان مالجاندى ادام ەدى. ءومىرىنىڭ سوڭعى جىلدارى مىنگەن تورى اتىن سىلاپ- سيپاپ، ەرەكشە باپتايتىن. انشەيىندە ويناقشىپ، ويقاستاپ جۇرەتىن جىلقى يەسىنەن اجىراعان سوڭ، اجەپتەۋىر باسىلىپ، بوساڭسىپ قالدى. ونىڭ مۇڭ باسقان جانارىنان يەسىن ىزدەپ، جابىرقاپ جۇرگەنىن كورەسىڭ.

اۋىلدان الشاقتاۋ ورنالاسقان جولداسقۇل قاريانىڭ بەيىتى باسىنا قاراي جول تۇسكەندە ۇستىندە وتىرعان ادامنىڭ ىرقىنا كونبەستەن ءجۇرىسىن باسەڭدەتىپ كەلىپ يەسىنىڭ بەتىن جاپقان قارا توپىراققا باسىن سالبىراتىپ بىرەر مينۋت تۇرادى. يەسىن ەسىنە الادى-اۋ شاماسى.

مۇنداعى ايتپاعىمىز، مال ەكەش مال دا سۇيىسپەنشىلىكتى، جىلىلىقتى سەزىنە بىلەتىندىگى. ول ءوزىنىڭ قادىرىن تۇسىنە بىلگەن يەسىنە اينىماستاي ادال قىزمەت ەتۋگە دايار. نەمەسە جوعارىدا ايتىلعانداي، ايۋاندىق جاساعاندارعا ايۋاندىقپەن جاۋاپ قايتارۋعا دا ءازىر.

سوندىقتان ونسىز دا سانى ازايعان ءتورت تۇلىگىمىزدىڭ قادىرىنە جەتە بىلەيىك.

الما توپانتاي قىزى

وتانداستار سايتى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى