قورعاس كەدەن بەكەتىندە قىتايدان زاڭسىز ءدارى- دارمەك وتكىزگەن قازاقتار ۇستالدى
«ۇزاق ۋاقىت بويى زاڭسىز جولمەن قازاقستان اۋماعىنا كونتراباندالىق ءدارى- دارمەك پەن ح ت ت كىرگىزدى دەگەن ايىپپەن يمان ونەرگۇل جانە يمان باحىتگۇل ۇستالدى. ولار كونتراباندالىق جۇكتى زاڭسىز رەسىمدەۋ ءۇشىن بىرنەشە رەت جالعان تۇلعالاردى تۋريست رەتىندە پايدالانعان. مەملەكەتكە كەلتىرىلگەن زالالدىڭ جالپى سوماسى 8 ميلليون تەڭگەنى قۇرادى» ، - دەپ جازىلعان حابارالامادا.
اعىمداعى جىلعى 13- مامىردا اتالعان فاكت بويىنشا الماتى وبلىسىنىڭ قارجى پوليتسياسى دەپارتامەنتى قىلمىستىق ءىس قوزعادى.
تەرگەۋ بارىسىندا كونتراباندالىق ءدارى- دارمەكتىڭ شىعارۋ راستىعىن جانە ولاردان ازاماتتاردىڭ دەنساۋلىعىنا بولۋى مۇمكىن قاۋىپتى انىقتاۋ ماقساتىندا سوت ساراپتامالارى وتكىزىلەتىن بولادى.
ايىپتالۋشىلارعا قاتىستى بۇلتارتپاۋ شاراسىن تاعايىنداۋ ماسەلەسى شەشىلۋدە.
