پاۆلودارلىق بوكسشىنى رينگتەن اۋرۋحاناعا الىپ كەتتى

ءجاسوسپىرىم ەكىباستۇز قالاسىندا جاتتىعۋ كەزىندە ەسىنەن تانىپ قۇلاعان.

ول پاۆلودار وبلىستىق قۇراما كومانداسىنىڭ سپورتشىسى رەتىندە بوكستان قازاقستان چەمپيوناتىنا قاتىسۋى كەرەك ەدى.

ءقازىر كومادا جاتىر، دارىگەرلەر كۇندىز-ءتۇنى قاراپ، تۋىسقاندارى ايىعۋىن ۇمىتپەن كۇتۋدە.

قۋانىش جۇمابايدىڭ بەتى بەرى قارادى دەۋگە كەلمەيدى ءالى. وعان ەكى وپەراتسيا جاسالدى. ەكىباستۇز قالاسىندا جاتتىعۋ كەزىندە ەس-ءتۇسسىز قۇلاعان وقۋشىنى وبلىس ورتالىعىنا جەدەل جاردەممەن جەتكىزگەن.

مەديتسينا قىزمەتكەرلەرى باس ميىنىڭ جاراقاتتانعانىن انىقتاپتى.

باقىتبەك تەكىمانوۆ، وبلىستىق بالالار اۋرۋحاناسىنىڭ دارىگەر-نەيروحيرۋرگى:

- بوكستان جاتتىعۋ كەزىندە بالا ىشىنەن ءبىر سوققى الدى، سودان كەيىن جاعدايى ناشارلاپ كەتتى. ەسىنەن ايرىلىپ قالدى. ءقازىر ونىڭ دەنساۋلىعى جاقساردى دەپ ايتا المايمىز. قانداي دا ءبىر بولجام جاساۋعا دا ەرتە.

وقۋشىنىڭ اتا-اناسى شوشىپ قالعان. بالا جاتتىعۋعا جينالعان كەزدە ساپ-ساۋ بولاتىن دەپ قالايشا ەسىنەن تانعانىن تۇسىنبەي وتىر.

مۇرات قۋانىشبەكوۆ، قۋانىش جۇمابايدىڭ اكەسى:

- ول وقۋ-جاتتىعۋ جيىندارىنا كەتكەن، قازاقستان بىرىنشىلىگىنە دايىندالىپ جاتقان ەدى. باسقا ەشنارسە بىلمەيمىن...

بوكس فەدەراتسياسىنىڭ وكىلدەرى بولعان وقيعاعا قاتىستى تۇسىنىك بەرۋدەن باس تارتتى. ال، پروفيلدىك ديسپانسەر دارىگەرلەرىنىڭ ناقتى دياگنوز قويعانىمەن سەبەبىن ايتا المايتىنى بەلگىلى.

قۋاتبەك سەيىتقازين، وبلىستىق دارىگەرلىك-دەنە شىنىقتىرۋ ديسپانسەرىنىڭ ديرەكتورى:

- دەنساۋلىعى ناشارلاپ قالدى. قازىرگى جاعدايدا ەكىباستۇزدان وبلىستىق بالالار اۋرۋحاناسىنا جەتكىزىلدى. باپكەرلەردىڭ ايتۋى بويىنشا، جاتتىعۋ كەزىندە بولعان.

پوليتسيا فاكتى بويىنشا الدىن الا تەرگەۋ جۇمىستارىن جۇرگىزۋدە. ساراپتاما ناتيجەسى شىققان سوڭ كوپ جۇمباق جاريا بولماق.

Baq.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى