سلاۆيانسك ماڭىندا ۇرىس ءجۇرىپ جاتىر

ۇكىمەت اسكەرى سلاۆيانسك ماڭىنداعى سەپاراتيستەردىڭ بەكىنىستەرىنە ارتيللەريادان شابۋىل جاسادى.

سەپاراتيستەر وكىلىنىڭ ايتۋىنشا، 15 - مامىردا باستالعان قاقتىعىس 16 - مامىر كۇنى تاڭەرتەڭ سلاۆيانسكىگە تاياۋ اندرەيەۆكا جانە سەمەنوۆكا سەلولارىنىڭ ىرگەسىندە، كراسنىي ليمان قالاسى مەن كاراگان تاۋىندا جالعاسقان.

15 - مامىردا دونەتسكىدەگى سەپاراتيستەردىڭ ءوزىن- ءوزى جاريالاعان جەتەكشىسى سەرگەي زدريليۋك ۋكراين قارۋلى كۇشتەرىنە 24 ساعات ىشىندە سەپاراتيستەر باقىلاۋىنداعى دونەتسك، ماريۋپول جانە باسقا دا قالالاردىڭ ماڭىنداعى اسكەرى مەن تەحنيكاسىن اكەتۋگە ۋلتيماتۋم قويعان.

تالابى ورىندالماعان جاعدايدا سەپاراتيستەر جەتەكشىسى «ارنايى وپەراتسيا» جۇرگىزىلىپ، ۋكراين اسكەرى «جويىلاتىنىن» ەسكەرتكەن. 16 - مامىردا ۋلتيماتۋم مەرزىمى بىتەدى.

15 - مامىردا ۋكراينا پرەزيدەنتىنىڭ مىندەتىن اتقارۋشى الەكساندر تۋرچينوۆ ۇكىمەت كۇشتەرى سلاۆيانسك قالاسى ماڭىندا رەسەيشىل سەپاراتيستەردىڭ بازاسىن جويعانىن، كراماتورسكىنىڭ وڭتۇستىگىندەگى سەپاراتيستەر باسىپ العان تەلەمۇنارا اۋماعىن باقىلاۋىنا العانىن مالىمدەگەن.

ۋكراينا قورعانىس مينيسترلىگى دە 15 - مامىردا ۋكراين اسكەرى كراماتورسك تۇبىندە بۇلىكشىلەر بەكىنىسىن جويىپ، ءۇش سەپاراتيستى تۇتقىنداعانىن حابارلاعان.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى