سانكت- پەتەربوردا ءوتىپ جاتقان استانا كۇندەرى اياسىندا ءبىرقاتار شارالار ۇيىمداستىرىلدى- فوتو

 ەلوردالىقتار ەكسپوزيتسياسىندا كوپشىلىك نازارىنا كيىز ۇيلەر مەن حالىق قولونەر شەبەرلەرىنىڭ بۇيىمدارى ۇسىنىلىپ، ءتۇرلى شەبەرلىك سىنىپتارى وتكىزىلدى، سونداي- اق شىعارماشىلىق توپتار ونەر كورسەتتى.

قالا تۇرعىندارى مەن كوپتەگەن تۋريستەر ءۇشىن قازاق ەتنو اۋىلى قىزىعۋشىلىق تۋعىزدى. وندا بولعان ادامدار ەلدىڭ باي مادەنيەتىمەن جاقىنىراق تانىسۋ ءۇشىن ەندى قازاقستانعا كەلۋدى جوسپارلاۋدا.

 نيەۆا جاعاسىندا سانكت- پەتەربۋرگتىڭ قاق ورتاسىندا ناعىز قازاق اۋىلى بوي كوتەردى. اقشاڭقان كيىز ۇيلەر، تەربەلگەن التىباقان - ەۋروپالىقتار ءۇشىن تاڭسىق پەيزاج بىردەن ولاردىڭ نازارىن اۋداردى. بۇل جەر پەتەربورلىقتار مەن كوپتەگەن تۋريستەر ءۇشىن تانىمال بولىپ، قالا تۇرعىندارىنىڭ تاڭدانىسىن تۋدىردى.

قازاقتىڭ تۇرمىس- سالتىن كورسەتۋ، قازاق شەبەرلەرىنىڭ جۇمىستارى ەشكىمدى دە بەيجاي قالدىرمادى. كوشپەلىلەردىڭ مادەنيەتى جۇرتشىلىقتىڭ زور ىقىلاسىن تۋعىزدى: شەبەرلەر كيىز باسۋ، كىلەم توقۋ تاسىلدەرىمەن تانىستىردى، سول جەردە قولما- قول زەرگەرلىك بۇيىمدار جاسالىپ جاتتى.

كەلۋشىلەرگە بولاشاقتىڭ قالاسى رەتىندە قازاقستاندىق ەلوردا - استانانىڭ مۇمكىندىكتەرى سوڭعى يننوۆاتسيالىق نوۋ- حاۋ ارقىلى كورسەتىلدى. قاي جەردە دە اشىقتىق، ىزگى نيەت بايقالىپ تۇردى، ءتىپتى روبوتتار دا ادامدارمەن ورىس جانە قازاق تىلدەرىندە سالەمدەسىپ جاتتى.

«استانا - قازىر شاپشاڭ دامىپ كەلە جاتقان زاماناۋي قالا. حالىقتىڭ جانىن، مىناداي بايلىعىن كەز كەلگەن جەردەن كورە المايسىڭ» ، - دەپ اسەرلەرىمەن ءبولىستى سانكت- پەتەربرگ تۇرعىنى ەۆگەنيي سوروكين.

«ءبىز سىزدەرگە قوناققا بارامىز، سىزدەر دە ءجيى كەلىپ تۇرىڭىزدار» ، - دەدى قالا تۇرعىنى يرينا ۆەشنياكوۆا.

  شارا بارىسىندا گەورگي پولتاۆچەنكو مەن يمانعالي تاسماعامبەتوۆ قازاقستاننان كەلگەن قوناقتارمەن جانە قازاقتىڭ قولونەر تۋىندىلارىمەن تانىسۋعا كەلگەن پەتەربورلىقتارمەن جۇزدەستى.

 سونىمەن قاتار گەورگيي پولتاۆچەنكو مەن يمانعالي تاسماعامبەتوۆ ساۆۋشكين كوشەسىندە سالىناتىن «استانا» ساۋدا- ىسكەرلىك كەشەنىنىڭ قۇرىلىسى ورنىنا كاپسۋلا سالدى. بۇل كەشەندە قازاقستاندىق جانە رەسەيلىك كومپانيالاردىڭ كەڭسەلەرى مەن وكىلدىكتەرى، بانكتەر، مەكەمەلەر، كونفەرەنتسيا وتكىزۋگە ارنالعان زالدار، كورمە زالدارى، سونداي- اق قوس دەڭگەيلى جەراستى پاركينگى ورنالاسادى دەپ كۇتىلۋدە. اتالمىش ورتالىقتىڭ قۇرىلىسى پەتەربورلىق دەلەگاتسيانىڭ بىلتىرعى جىلعى استاناعا ساپارىنىڭ اياسىندا قابىلدانعان ىنتىماقتاستىق باعدارلاماسىنىڭ شەڭبەرىندە جۇزەگە اسىرىلعالى وتىر.

 بۇدان سوڭ گۋبەرناتور مەن استانا اكىمى رەسەيلىك قالانىڭ 300 جىلدىعىنا ارنالعان ساياباقتا ءوتىپ جاتقان «سلاۆيان جارمەڭكەسى» فەستيۆالىن تاماشالادى. ون جىلدان استام ۋاقىتتان بەرى وتكىزىلىپ كەلە جاتقان شارادا رەسەيدىڭ، ۋكراينا مەن بەلارۋستىڭ ءتۇرلى ايماقتارىنان كەلگەن فولكلورلىق ۇجىمدار ونەر كورسەتۋدە. جارمەڭكە قوناقتارىنا جىلى لەبىزىن بىلدىرگەن گ. پولتاۆچەنكو شاھاردا كوپتەگەن حالىقتاردىڭ دوستىق پەن بەيبىت عۇمىر كەشىپ كەلە جاتقانىن تىلگە تيەك ەتتى. ول سونداي- اق كەلەسى جىلى وتەتىن جارمەڭكەگە قاتىسۋعا قازاقستاندىقتاردى دا شاقىردى.

ال ەلوردا اكىمى ي. تاسماعامبەتوۆ جارمەڭكەنىڭ سانكت- پەتەربوردا استانا كۇندەرىنىڭ وتكىزىلۋىمەن تۇسپا- تۇس كەلۋىنە ەرەكشە ءمان بەرىپ، قوس ەل حالقىنىڭ وتكەننەن باستاۋ الاتىن تاريحى مەن مادەني بايلانىستارىنىڭ تەرەڭ ءتۇپ- تامىرى بار ەكەنىن جەتكىزىپ، كەلەسى جىلى وسى ايتۋلى شاراعا شاقىرۋدى قابىل الدى.

سونداي-اق، سانكت- پەتەربوردا ءوتىپ جاتقان استانا كۇندەرى اياسىندا ميحايلوۆ تەاترىندا قازاقستاننىڭ ونەر شەبەرلەرىنىڭ گالا- كونتسەرتى بولىپ ءوتتى. وعان قازاقستاندىق ايگىلى ساحنا مايتالماندارى قاتىستى.

 قوناقتاردى استانا قالاسىنىڭ اكىمى يمانعالي تاسماعامبەتوۆ پەن سانكت- پەتەربور گۋبەرناتورى گەورگي پولتاۆچەنكو قارسى الدى. «استاناداعى سانكت- پەتەربور كۇندەرى جانە سانكت- پەتەربورداعى استانا كۇندەرى ءتارىزدى شارالار ءبىزدىڭ حالىقتارىمىزدىڭ تەرەڭ رۋحاني الەمىن اشا تۇسۋگە مۇمكىندىك بەرەدى. بۇگىن ءبىز پەتەربورعا قازاقستاننىڭ ايگىلى ونەر شەبەرلەرىمەن بىرگە، جاڭا شىعارماشىلىق تولقىنداعى ونەرپازدارىمىزدى دا الىپ كەلدىك. پەتەربورلىقتار قازاقستاننىڭ قازىرگى سۋرەتشىلەرىنىڭ شىعارماشىلىعىمەن تانىسىپ، قولدانبالى ونەر تۋىندىلارىن تاماشالاي الادى» ، - دەدى ي. تاسماعامبەتوۆ.

 ال گ. پولتاۆچەنكو سان عاسىرلاردان بەرى جالعاسىن تاۋىپ كەلە جاتقان ەكى ەل اراسىنداعى دوستىقتىڭ نەبىر سىناقتاردان ءوتىپ، نىعايا تۇسكەنىن جەتكىزدى.

 «ءبىز بۇگىن دە وسى دوستىقتى نىعايتۋ باقىتىنا يە بولىپ وتىرمىز. وعان مىسال بىزگە استانا مەن قازاقستاننىڭ وزىندىك مادەنيەتىمەن سۋسىنداۋعا مۇمكىندىك بەرەتىن وسى تاماشا كونتسەرت بولىپ وتىر» ، - دەدى گۋبەرناتور.

ايتا كەتەيىك، ەرتەڭ ميحايلوۆ تەاترىندا «استانا وپەرا» تەاترىنىڭ ارتىستەرى ونەر كورسەتسە، سانكت- پەتەربوردىڭ مەملەكەتتىك اكادەميالىق كاپەللاسىندا سوليستەر اكادەمياسىنىڭ مەملەكەتتىك كامەرالىق وركەسترىنىڭ كونسەرتى وتەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى