كولدىڭ بالقاش اتالۋ سەبەبى نەدە؟
كولدىڭ قازىرگى اتاۋىنا بايلانىستى حالىق ىشىندە بۇرىننان ايتىلىپ كەلە جاتقان اڭىز بار.
بۇدان كوپ عاسىرلار بۇرىن كولدىڭ باتىس جاعالاۋىن ءبىر باي مەكەندەگەن ەكەن. ونىڭ بالقيا اتتى اسا كورىكتى قىزى بولىپتى.
ول تەك كوركىمەن عانا ەمەس، اقىلىمەن دە، ادامگەرشىلىگىمەن دە ەل اۋىزىنا ىلىگىپتى.
سۇيىكتى قىزدى اكەسى عانا ەمەس، بۇكىل جۇرت ەركەلەتىپ بالقاش دەپ اتايتىن بولىپتى.
جاسى ون جەتىگە تولعاندا بالقيا الىس ەلدەن كەلگەن ەردەن اتتى ءبىر جاس جىگىتكە عاشىق بولادى.
الايدا قازاقتىڭ كونە ادەت-عۇرپى بويىنشا اتا-اناسى قىزدى بالا كۇنىندە اتاستىرىپ، قالىڭ مال الىپ قويعان ەكەن.
مۇنى ەستىپ-بىلگەن قىز بەن جىگىت جاسىرىن قاشپاق بولىپ كەلىسەدى دە، ءبىر ىڭعايلى كەلگەن تۇندە ەكەۋى ەكى اتقا ءمىنىپ قاشادى.
ەرتەسىنە ەكى عاشىق ءبىر قالىڭ قامىستىڭ ىشىنە كەلىپ دەم الۋعا توقتايدى. مۇندا ولار ويلاماعان جەردەن قىرسىققا تاپ بولادى. تال تۇستە اتتارىنا قامىس ىشىندەگى قاباندار تاپ بەرەدى. ەردەن اتتاردى قۇتقارام دەپ جۇرگەندە، قاباننىڭ ازۋ ءتىسى دەنەسىنە وڭدىرماي اۋىر جاراقات سالادى. بالقيانىڭ سۇيىكتى جىگىتىن ولىمنەن اراشالاپ قالۋعا شاماسى كەلمەيدى دە اسىل جارىن جەرلەپ، وزىدە سول جەردە ولمەك بولادى.
ال بۇل كەزدە قاباننان ۇركىپ قاشقان ەكى ات قىز بەن جىگىتتىڭ تۋعان اۋىلىنا كەلىپ ءبىر-اق توقتايدى. ىزا بولعان قىزدىڭ اكەسى جىگىتتەرگە قاشقىنداردى ۇستاپ اكەلۋگە ءامىر بەرەدى جانە ولاردى حالىق الدىندا قارابەت قىلىپ جازالاماق بولادى.
قاشقىنداردى ىزدەپ شىققان جىگىتتەر ات تۇياعىنىڭ ىزىمەن ءجۇرىپ وتىرىپ، قىزدىڭ تىعىلعان جەرىن تابادى. قۋعىنشىلاردى كورگەن سوڭ، اكەسىنىڭ قاتال مىنەزىن جاقسى بىلەتىن بالقيا، قولعا تۇسكەننەن ءولىمدى ارتىق كورىپ، بيىك جاردان كولگە ءبىر-اق سەكىرەدى دە سۋ تۇبىنە كەتەدى.
بۇل اۋىر وقيعا، تراگەديا سول ماڭداعى ەلگە تۇگەل جايىلىپ، بۇدان بىلايعا جەردە كولدى وزدەرى ەركەلەتىپ ايتاتىن، سۇيىكتى جاس ارۋدىڭ اتىمەن حالىق بالقاش دەپ اتاپ كەتكەن ەكەن.
blogtime
