تۇركياداعى قايعىلى وقيعاعا بايلانىستى تارتىپسىزدىكتەر باستالدى
تارتىپسىزدىككە قاتىسۋشىلار ۇكىمەت باسشىسى رەدجەپ تاييپ ەردوعانعا نارازىلىق بىلدىرگەن، ونى ۇرى، كىسى ءولتىرۋشى دەپ اتاعان.
نارازىلىققا شىعىپ، ادىلەتتىلىك جانە دامۋ پارتياسىنىڭ ايماقتىق بولىمىنە بەت العانداردىڭ الدىنا ءتارتىپ ساقشىلارىنىڭ توسقاۋىلى قويىلدى. سونىمەن بىرگە ول جەرگە سۋاتقىشتار دا شاقىرىلعان. پوليتسيا قىزمەتكەرلەرىنىڭ گاز تۇمىلدىرىعىن كيىپ العاندارى دا بايقالعان. الايدا ولاردىڭ ارنايى قۇرالداردى قولدانعانى جايلى اقپارات كەلىپ تۇسكەن جوق.
وسىعان دەيىن تۇرىك باسىلىمدارىندا كوش باسىنداعى ادىلەتتىلىك جانە دامۋ پارتياسىنىڭ دەپۋتاتتارى وسى جىلدىڭ ءساۋىر ايىندا سوما ماڭىنداعى كومىر شاحتالارىنىڭ ءبىرقاتارىندا، سونىڭ ىشىندە جارىلىس بولعان جەردە قاۋىپسىزدىكتى ساقتاۋ ەرەجەلەرىن تەكسەرۋ تۋرالى ءوتىنىمدى قابىلداماعانى جايلى اقپارات شىققان بولاتىن.
شەتەلگە ساپارىن شەگەرىپ، سوماعا بارعان ەردوعان وسى جاعدايعا بايلانىستى ايىپتىلاردىڭ ءبارى جازالانادى دەپ ۋادە بەردى. قازىرگى ۋاقىتتا 400 گە جۋىق قۇتقارۋشىلار امان قالعانداردى ىزدەستىرىپ جاتىر.
ەستەرىڭىزگە سالا كەتەيىك، 12 - مامىر كۇنى سوما تۇبىندەگى شاحتادا جارىلىس ورىن الدى. قازىرگى ۋاقىتتا 274 كەنشىنىڭ قازا بولعانى جايلى اقپارات راستالدى. شاحتاداعىلاردىڭ كوبى ۋلى گازدان تۇنشىعىپ مەرت بولعان. جارىلىس كەزىندە وقيعا ورنىندا بارلىعى 790 عا جۋىق جۇمىسشى بولعان، ولاردىڭ ازىرگە جارتىسىنان ازىن عانا قۇتقارۋ مۇمكىن بولدى.
