جەلىككەن قىزدار جەر جاردى
ال اتا-اناسىنا حابار بەرۋ قىزداردىڭ ويىنا دا كىرىپ-شىقپاپتى.
ەستەرىڭىزگە سالا كەتەلىك، نارقىز بەن ايدانا 29 - ءساۋىر كۇنى ۇيلەرىنەن شىعىپ كەتىپ، سول كەتكەننەن مول كەتكەن ەدى.
حابار-وشارسىز جوعالعان قىزداردى ىزدەۋگە تۇتاس تالدىقورعان جۇرتى جۇمىلعان-تۇعىن.
پوليتسيانىڭ مالىمەتىنە قاراعاندا، وقۋشى قىزدىڭ ءبىرىنىڭ ۇيىندە ۇلكەن جانجال بولعان. بۇدان كەيىن ول الماتىعا كەتۋدى ۇيعارادى.
ءسويتىپ، وزىمەن بىرگە مەكتەپتە وقيتىن قۇربىسىن دا ەرتە كەتەدى. ءبىراق قالتالارىندا كوك تيىن بولماعاسىن، الىسقا ۇزاي المايدى. اقىرى الماتىعا ۇيالى تەلەفونىن ساتىپ جەتپەك بولادى.
وبلىستىق ىشكى ىستەر دەپارتامەنتىنىڭ ناقتىلاعانىنداي، ولار تەلەفوننىڭ ءبىرىن - 1500 تەڭگەگە، ەكىنشىسىن - 500 تەڭگەگە ساتادى. ارتىنشا، الماتىعا جۇرەتىن اۆتوبۋسقا بيلەت ساتىپ الىپ، قالاعا تارتىپ كەتەدى. تۋعان-تۋىس، تامىر-تانىسى جوق، بوتەن قالاداعى العاشقى تۇندە قىزدار «سايران» اۆتوۆوكزالىنىڭ قۋىس-قالتارىستارىن پانالايدى.
كەلەسى كۇنى ۆوكزالعا جاقىن مەشىتتىڭ جانىنا تۇنەپ شىعادى. ونىمەن قويماي، ەكەۋى قالاداعى بازاردىڭ بىرىندە داياشى بولىپ جۇمىسقا تۇرىپ ۇلگەرەدى.
ال ءۇشىنشى كۇنى قىزدار «شاڭىراق» ىقشاماۋدانىندا تۇنەگەن. قۇقىق قورعاۋشىلار ولاردىڭ قايدا قونعانىن، قايدا تۇنەگەنىن ءالى ناقتىلاعان جوق. بەلگىلىسى قىزداردىڭ بىرەۋىندە تاعى ءبىر ۇيالى تەلەفون بولعان جانە ونى اراگىدىك ىسكە قوسىپ تۇرعان ەكەن. وسى ۇيالى تەلەفوننىڭ ارقاسىندا پوليتسيا وقۋشىلاردى وڭاي تاپتى.
«ءبىز ولاردى «شاڭىراقتان» تاۋىپ، اتا-اناسىنىڭ قولىنا تاپسىردىق. بۇل قىزداردىڭ وتباسى اجەپتاۋىر اۋقاتتى، تۋىستارى قىزدارىن امان-ەسەن تاۋىپ بەرگەنى ءۇشىن پوليتسيا قىزمەتكەرلەرىنە العىس ايتىپ جاتىر. جوعالعان بالالاردى ىزدەۋ كەزىندە ىزدەۋ شارالارىنىڭ بىرنەشە نۇسقاسى قاراستىرىلدى»، - دەيدى بۇل رەتتە وبلىستىق ىشكى ىستەر دەپارتامەنتى باسپا ءسوز قىزمەتىنىڭ جەتەكشىسى كوبەيحان نۇراحمەت.
قىزداردى ىزدەۋگە 148 اسكەري، 200 پوليتسەي، سونىڭ ىشىندە، پاترۋلدىك پوليتسيانىڭ 80 قىزمەتكەرى جۇمىلدى. كريميناليستەر، جەدەل ىزدەستىرۋ قىزمەتكەرلەرى مەن وقۋشىلاردىڭ تۋعان-تۋىس، دوستارى دا اتسالىستى. ءار-ءار جەردە جوعالعان قىزدار تۋرالى حابارلامالار ءىلىندى. الايدا اتالعان ءىس مۇنىمەن اياقتالمايتىن سياقتى. الداعى ۋاقىتتا پوليتسيا وقۋشى قىزدارمەن پروفيلاكتيكالىق اڭگىمە جۇرگىزەدى جانە ولار ۇيلەرىنەن قاشىپ كەتۋگە بەيىم بالالار رەتىندە ەسەپكە الىنۋى دا مۇمكىن.
«جاس قازاق»
