ساپاسى جوعارى، باعاسى تومەن ءونىم

پلاستيكالىق تەرەزەلەر مەن ەسىكتەردىڭ جاقتاۋىن شىعاراتىن زاۋىت يمپورتتىق تاۋاردى الماستىرۋ باعىتىندا جۇمىس ىستەيدى.

جوبانىڭ قۋاتتىلىعى - زاۋىت جىلىنا 7 مىڭ توننا پروفيل وندىرۋگە قاۋقارلى. جوبانىڭ جۇزەگە اسۋى ءۇشىن «بيزنەستىڭ جول كارتاسى-2020» باعدارلاماسى اياسىندا ينجەنەرلىك- كوممۋنيكاتسيالىق ينفراقۇرىلىم تارتىلىپ، ەكىنشى دەڭگەيلى بانكىمەن الىنعان نەسيەنىڭ پايىزدىق مولشەرلەمەسى سۋبسيديالانعان.

ساپاربەك تۇياقبايەۆ، ب ق و اكىمىنىڭ ورىنباسارى:

- زاۋىتتار اشىلعانعا دەيىن بىزگە ساپالى ءونىم گەرمانيا، تۇركيادان كەلەتىن. قازىرگى تاڭدا زاۋىتتىڭ وڭتۇستىك ءوڭىردى تولىعىمەن قامتاماسىز ەتۋگە مۇمكىندىگى بار. ساپاسى ەۋروپالىق تاۋاردان ەش ايىرماشىلىعى جوق، ال باعاسى 15-20 پايىزعا ارزان.

ەلباسى جولداۋىنداعى كورسەتىلگەن مىندەتتەرگە سايكەس، ءقازىر شىمكەنت قالاسىندا قۇرىلىس يندۋسترياسى قارقىندى ءجۇرىپ جاتىر. سالىستىرىپ ايتار بولساق، تەك وتكەن جىلى قالادا 49 كوپ قاباتتى ءۇيدىڭ قۇرىلىسى باستالعان. ال بيىل 111 مەكتەپتىڭ قۇرىلىسى جالعاسۋدا. ياعني، اتالعان ونىمگە دەگەن سۇرانىستىڭ وتە جوعارى ەكەندىگىن كورسەتەدى.

كاسىپورىن اۆستريا جانە گەرمانيانىڭ وزىق تەحنولوگياسىمەن جۇمىس ىستەيدى. جەرگىلىكتى تۇرعىندار شەتەلگە بارىپ، ءوندىرىستىڭ وزىق ادىستەرىن مەڭگەرگەن. ال ءونىمنىڭ ساپاسى ارنايى زەرتحانادا تەكسەرىلەدى. ماماندار تەرەزە جاقتاۋلارىنىڭ 55 گرادۋس اياز بەن 100 گرادۋس ىستىققا توتەپ بەرەتىنىن ايتادى.

مۇرات مامىتبەكوۆ، كاسىپورىن جەتەكشىسى:

- زاۋىتتا 150 ادام جۇمىس ىستەيدى. باس ماماندار شەتەلدە ارنايى كۋرستان ءوتىپ، سەرتيفيكات العان. وندىرىسكە ISO 9001 ساپا مەنەدجمەنتى جۇيەسى ەنگىزىلگەن. زاۋىت ءوزىنىڭ شىعاراتىن ءونىم ءتۇرىن جانە قۋاتتىلىعىن ارتتىرۋدى كوزدەپ وتىر. وعان ءوندىرىس عيماراتى جانە قوسالقى تسەحتاردىڭ مۇمكىندىكتەرى قاراستىرىلعان.

ءقازىر وڭتۇستىك قازاقستان وبلىسىنىڭ بارلىق اۋداندارىندا يندۋستريالدى ايماقتار قۇرىلۋدا. جىل سوڭىنا دەيىن قۇنى 416 ميلليارد تەڭگە بولاتىن 52 جوبانى ىسكە قوسۋ جوسپارلانىپ وتىر.

اۆتورلار: بولات كوكەناي ۇلى، نۇرماحان مۇساتوۆ

24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى